وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Thursday, July 12, 2007

فراشة وربطة عنق وطريق

ربطة عنق
تلك المرحلة العبقرية من عدم التفاهم التي وصلنا اليها ابي وانا والتي جعلتنا نختلف حتي في كيف ان عقد ربطة العنق العريضة تختلف عن الربطة الكلاسيكية التقليدية جعلتني اطلب من بائع ربطات العنق ان يعقدها ..بالفعل تعقد بنفس الطريقة...لا بأس من ان اكون احمقا من ان لاخر فهذا يضفي علي الحياة لمسة محببة
فراشة
فراشة تضيع حياتها كله في مطاردة الاضواء...استرعت انتباهي بينما وقفت اراقبها تطير حول مصباح معلق علي نافذة ذلك المحل...تدور وتدور بينما هي متشبثة بتلك المساحة الضئيلة الأكثر اشعاعا...يعميها الضوء بينما هي متشبثة به كأملها في النجاة..ترتطم بالمصباح ..يحرقها تبتعد وجلة ولكنها ماتزال تتشبث بتلك المساحة الضئيلة...يعميها الضوء..ترتطم بالمصباح...يحرقها...لا تعلم انها تترك عالما خلفها لا يحرق ولا تعمي اضواؤه... يعميها الضوء..ترتطم بالمصباح...يحرقها..تحدد معالم عالمها وتقيد نفسها سجينة لاضواء لا تدوم بينما فراشات اخريات لا تضيع حياتها بهذه العبثية ..لاباس فهي فراشة حمقاء والا تكون الاحمق الوحيد في هذا العالم يضفي علي الحياة لمسة محببة
مفترق طرق
قابلنا احدي صديقات اختي المتزوجات حديثا بينما نحن في المعدية...حينما افكر في الحياة بهذه الطريقة اجد انني الوحيد الذي لم يجد طريقه الخاص بعد...لم يعد هناك ذلك المذاق الذي كان موجودا لعصير القصب منذ عام واحد ..عام واحد تغيرت تضاريس عالمي تماما واصبحت شتلة صبار وحيدة وسط صحرائي الخاصة انظر فأجد هذا يقضي اجازته مع خطيبته الاخر لديه ابن يشبهه تمام الشبه بينما الاخر يسافر مع زوجته...كل وجد عمل مستقر وحياة مستقرة بينما انا..لا زلت
..... انا...راعي البقر الوحيد الذي لم يروض بعد...اعلم جيدا انني مررت بذلك المنحني الذي يمنح حياتي هدوءا لن يدوم..مررت ولم اره وربما رايته ولم انتبه ..كعادتي احب ان اسير في عشرة طرق مختلفة لاختار الثاني عشر الذي لم اجربه..احب ان تبقي احتمالاتي قائمة وفي نفس الوقت احب ان يكون كل منها محددا ثابت الملامح ...اعلم ان تلك العاصفة التي ستقلب حياتي راسا علي عقب سوف تاتي ولسوف تغيرني كليا...وبينما استعد لذلك التغيير اتذكر جيدا انني لست احمقا دائما وان الحياة لها تلك اللمسة المحببة دوما

29 comments:

maha said...

سلام عليك يا احمد
هي مش كراكيب اوي يعني
بس ساعات بنحس اننا لازم نتكلم حتي لو كلامنا مش مترابط او مفيش علاقة صله
بينه و بين نفسه
...
اولا الكرافات
متضايقش من الخلاف بينك و بين والدك في وجهات النظر ..فاكر مرة قلت لي في البوست بتاعي انهم دايما شافنا اطفال و معاملتهم لينا مهما كانت حلوة او قاسية فده من حبهم و خوفهم علينا
...
فراشة
جميل اوي التأمل للفراشه في فاترينه نورها بيعاكس عينيك ...و الفراشه تعاكس النور
الكلام عنها حسسني انه اسقاط علي حاجات كتير .علي بشر و شخصيات ممكن اكون عرفاها
..حسيت ان الفراشه دي مسكينه اوي ...بتدور علي نور الحياه في موتها
..
كتير مننا بيمشوا في طريق فكرينه بداية حياه و هو اخرها
......
مفترق طرق
عارف يا احمد انك مستعجل دايما ...لو كل واحد استقرت حياته في لمح البصر .دراسة و تعليم و شغل و حياه مستقره وسط اطفال و بيت هادي
...
"و عسي ان تكرهوا شيئا و هو خير لكم و عسي ان تحبوا شيئا و هو شر لكم "

خليك صبور شوية
ممكن لو ربنا اداك كل اللي انت عاوزه ممكن متفرحش بيه لاي سبب
او يمكن يديهولك و ياخده منك في لحظة
و ساعتها ممكن تنهار بجد
..
ليه تستعجل ...
ممكن بعد لحظة تتغير الحياه و الكون كله ..المهم مين يصبر و يستني اللحظة دي ؟؟؟
:)
ربنا يوفقك يا احمد و يرزقك بكل اللي تحلم بيه في الوقت المناسب
سلام
مها

buffy said...

bgd post gamd gdn ya ahmed i love it so much enta bt3rf t3br bshakl gmel gdn mo5tlef 3n ay 7d hope u r ok ya prince yalla salam

Anonymous said...

قريت فضفضاتك بس ماعنديش اللى ارد بيه عليها
على فكره
انا عامله تجمع بلوجرى جامد جدا بمناسبة نجاحى وتخرجى على خير
التفاصيل على مدونتى الصغنونه..اللى من غير فذلكه

S H A H said...

اتمنى لك الراحة في الطريق الاثنى عشر, بس خليك زي ما انت راعي البقر الذي لم و لن يتم ترويضه

و سلام مؤقت

شفّاف said...

مساهمة أعجبتني
أسجل حضوري

سلامي لك

one true thing said...

ايه الجمال ده بس
والله البوست هو اللي عبقري مش مرحله الصراع
أنا قولت حد جامد من بتوع التنمية البشرية محدش سمع كلامي
ايه الدماغ ديه دماغ كباتشينو

اولا أحييك على الجمع بين التلات حاجات
أنا قريت البوست 3مرات اني احاول اوصل للشي اللي بيربط التلات حاجات ببعضها مش لاقيه بس على بعضه عاجبني

ثانيا كل حاجه منهم على حده فيها حكمه تنفع بوست لوحده
ثالثا بجد موضوع الفراشه ده تشبيه رائع بس الواحد لما بتعلق بشي مش بيبقى شايف انه وراء عالم وتركه هو الشي اللي بتعلق بيه بيبقى عالمه كله

اخيره حاجه جامده اووي مفترق طرق تشبيهك لنفسك بالصبار الوحيده جامد جدن
الحاجه الغريبه هو ايه اللي وصل الناس كلها للحاله دي حاله اللاشي اي عدم استمتاعك باي شي حتى ولو كان منذشهور له مذاق اخر لديك
جميل اووي اني ابقى عارف نفسي عاجبني اوي موضوع العشر طرق ده والاجمل انه رغم كل المتناقضات الفظيعه اللي انت شايفها الا انك لسه متفائل وحاسس ان للحياة لمسة محببه

بجد بوست انحني له اعجابا وتقديرا
على فكره يافندم انا ردت على حضرتك عندي ومستنيه ردك عليه

gogo we bas said...

فراشة
تقريبا صورة مبسطة لحياة اغلبنا... بنجرى بكل قوتنا ورا الشئ الامع المسطع.. اى شئ منغير تفكير المهم حواليه اضواء او ملفت
المهم ان غالبا بتكون النهاية اننا بنكتشف انه ليس كل مايلمع ذهبا..

عابرة السبيل said...

سلام عليكم ...اقدر ابشرك ان دى اول مرحلة واول خطوة فى طريق الارتباط والزواج ..انك تحس بالوحدة والفراغ ...
موضوعك مش موضوع انك تحس انك احمق ..سورى يعنى ...الموضوع انك تحس انك بقيت مش ماشى مظبوط زى باقى الناس
ما تخافش قريب هتلاقى الوردة اللى تنور صبارك
سلام عليكم

Ahmed EIssa said...

ونبدأ بقي في السرييييع واعتذر جدا عن التأخير

مها:اقل مايقال عن تعليقك انك عارفاني كويس جدا..انا بقي اللي بقيت بحس انك بتشوفي بوستاتي بعيوني انا..خصوصا جملة بتدور علي نور الحياة في موتها
كتير بيدورو علي نور الحياة في موتهم ومش بيلاقوه عشان النور بيكون عاكي عينيهم
سلام يامها

بافي:الموضوع ان البوست ده بمواقفه حصلو فعلا جايز عشان كدة وصلك بسرعة
ميرسي علي كلامك الرقيق قوي
سلام يانهي

Ahmed EIssa said...

وينكي:معقولة.؟ملقيتيش اللي تردي بيه؟مروة اللي ب لسان معرفتش ترد
احمد ياااااااارب
بس بجد انتي اعصار مرح وانطلاق
تجمع الاوبرا حيبقي صعب شوية عشان حبدا اذاكر بقي عيب بقي انا مقضيها بلطجة طول السنة
نورتيني
سلام يامروة


شاه:مادام سلام مؤقت يبقي ده تعليق مؤقت
ههه..اوعي تكون بتزعل من الهزار بقي
انا صعب الترويض ياعزيزي متقلقش علي اخوك
شرفني حضورك..سلام ياشاه

الشفافية:وان اسجل ردي ياعزيزي
شكرا لحضورك واتمني اشوفك تاني
سلام يا شفافية

نفسنا said...

ندعوكم لزيارة العدد الثالث لمجلة نفسنا

اسلام رفاعى said...

انت لمست الواقع فى الموضوع ده اوى
...........
سعيد جدا بزيارة دونة حضرتك الرائعة دى

Ahmed EIssa said...

وان ترو ثينج:احم احم الكلام الكبير ده بيخلي وشي يحمر واتكسف علي فكرة
انا دماغ كابتشينو؟؟؟؟يابنتي الكابتشينو بقي زي العصير خلاص..مشروبي الطبيعي دلوقتي قهوة دوبل في كباية...
بصي هو التلات مشاهد مرتبطين بخيط رفيع قوي قوي بس مش موضوع حكمة موضوع ان فعلا في ناس بتضيع حياتها كلها في عبثية زي الفراشة وخلافات عقيمة زي موضوع الكرافت..ودي طريقتي العادية في اني اجلد نفسي وافكرها اني مقعش في طريق مش صح
سنة الحياة في التغيير واللي النهاردة كويس بكرة بيبقي وحش ودي حالة عامة بيفرضها تقدم الانسان في السن وزيادة خبرته في الدنيا

شرفتيني يا افندم

جوجو وبس:اولا في مصادر سرية قالتلي انك كنتي في حفلة علي الالفي ..طب يابنتي مجيتيش عرفتينا بنفسك ليه؟؟؟

ثانياطبيعة الحياة دلوقتي فرضت علينا عبثية مالهاش نهاية فعلا زي الفراشة اللي حتموت علي الضوء..ممكن تبقي في حاجة شداك قوي ومركز فيها قوي وسايب دنيا وعالم تاني عشانها في حين انها مممكن يكون فيها نهايتك مش حياتك
شرفتيني وبتشرفيني دايما

عابرة السبيل:ممممممممم؟
وحدة وفراغ ومش ماشي مظبوط زي بقيت الناس يبقي كدة اول طريق الارتباط والزواج؟؟؟
ياااااه
ده انا المفروض كنت اتجوز بقي من ساعة متخرجت
طبها مش بستخف بكلامك انا بس بهزر
وفعلا رايك جدير بالاحترام جدا خصوصا ان في واحد صاحبي اتجوز بس فترة زحالة زي دي
تخيلي اول مرة اخد بالي من الموضوع ده
انتي كدة اللي طلعتيها في دماغي
نورتيني في اول زيارة ليكي متبقاش الاخيرة بقي
زي مبيقولو اول زيارة مش بتتحسب..حشيلها من الكاونتر

نفسنا:حاضر ..والله بتابع المجلة ومجلة حلوة فعلا..تحياتي للمجهود بجد

اسلام رفاعي:عشان الموضوع اساسا من الواقع قوي..كل اللي فيه حصل وانا مجرد نقلت المشاهد وافكاري ساعتها
برضه اول زيارة يا اسلام
ابقي تعالي تاني انا بجدد الكافي شوب وحتلاقيه علي ايدك اليميني فوق الشات بوكس ..قريبا يعني مش دلوقتي

الطائر الحزين said...

لمست أكثر من جرح يا أخى

ا- ان كان ربطة العنق الكلاسيك ستكون سببا من اسباب البر لوالدك اغتنمها
طبعا انا عارف انها الصراع بين القديم والحديث

2- اما الفراشة عندها أمل دوما فى السعى وراء النور مهما كانت الصعوبات والحروق

3- كل من حولك وجد الطريق على حد زعمك لكن هل سألت نفسك من وجد السعادة ؟؟؟

تحياتى

Ahmed EIssa said...

الطائر الحزين:رد منطقي وبيقول علي دماغ مترتبة حلو
وحرد عليك نقطة نقطة

الموضوع ربطة العنق كان خلاف في وجهات النظر مش اكتر..عادي يعني بيحصل موصلش اكيد للعقوق او تشابك بالايدي..الحج قال انها بتتربط زي الكلاسيك وانا قلتله لا بتتربط ربطة تانية..بس

الفراشة سعيها وراء النور طبيعة مش ارادة لكن تقول ايه للي ارادته في انه يسعي ورا حاجة ممكن تموته وتقضي عليه وفي عالم تاني كبير هو سابيه لمجرد مطاردة السراب؟؟

السعادة معني مطاط قوي.وليها درجات واللي اتكلمت عنهك علي اول درجاتها تفتكر ايه اللي يخليهم مش سعداء؟؟
شرفتني بجد..واحب تشرفني علي طول

hoda omran said...

والله يااحمد ما زعلانة ولا اقدر ازعل منك بجد
كان عندى ظروف ومش بدخل عند حد
وبجد ميرسى لسؤالك الرقيق
انا هرجع تانى اعلق عالبوست استنانى
:)))))

Hadota ... حدوتة said...

الاختلاف مابين الاجيال موجود على طول على ابسط الحاجات
ممكن تلاقى الاب زعلان ان ابنه مش بيحب الاكل الفلانى
عادى بتحصل

اما الفراشة بقى فيها اللى غلطانة
انا لما بحاول فى الحاجة مرة واتنين وتلاتة يعنى بديها حقها واحس انها مصرة تكسرنى وتحرقنى زى الفراشة كده بحس انى بضيع وقت فتلاقينى مشيت وسبتها
وانا بعتبر دا قمة الحكمة
اصل العمر فيه قد ايه نضيعه فى محاولات فاشلة وامل مستحيل


بالنسبة لمفترق الطرق
انا حسة بكلامك
لان يمكن كتير لما بنشو اللى حوالينا استقروا وعاشوا حياتهم بيجيلنا الاحساس دا
ربنا يكرمنا كلنا ونلاقى الطرق اللى نهايتها خير ان شاء الله

بس انا بقى عاوزة امشى بطريق فى عريبة
:p

تحياااتى
انا اول مرة اجى مدونتك
بس عجبتنى جدا

Ahmed EIssa said...

همسات:ربنا يعدي الظروف دي علي خير يا
بنتي وترجعي تنوري التدوين تاني
وانا مستنيكي بقي

حدوتة:نورتينفي اول زيارة ليكي للحظات ويارب تكون زيارات متكررة بقي يا ست الكل

الموضوع اتطور خلاص مبقاش صراع اجيال بقي حرب بين اجيال خصوصا ان الاستاع في الهوة فعلا بقي بشع
بس انا محبتش اوضح الاختلاف قد محبيت اوضح ان ساعات فعلا الناس دي بتبقي عندها حق والخبرة بتاعتهم مش صغيرة حتي لو الموقف ده بان في حاجة صغيرة زي ربطة كرافت

لو فكرتي واي حد فينا فكر حيلاقي اي حد فينا كان زي الفراشة دي في يوم من الايام..بس ياتري مين فاق من عبثية الموقف ومين لا
فعلا عندك حق في قمة الحكمة اني اسيب اللي لا جدوي منه

انا برضه بقول ان المشي علي الطريق ده بقي مستحيل..عايز عربية ..حفضل ماشي علي طول؟؟؟
بس مش عارف ليه انا طولت في موضوع الاستقرار ده جايز عشان انا مش برضي عن اي حاجة بسهولة ودايما بطمح للاحسن
نورتيني
واتمني تفضلي منوراني علي طول

EMALMADA said...

Hello from Almada portugal
Have a nice day

Ahmed EIssa said...

You just make my day emalmada thanks for coming by

ساعه الغروب said...

اولا

انت عارف كويس اوى اوى انى كنت محتاجه اقرا الكلمات دى فى توقيت زى دا اوى

انا لفتت نظرى اوى الفراشه اكيد
كتير اوى الواحد بيبقى مصر على انه يتعامل مع الحد او الحاجه الى بتالمه اوى وبيبقى عراف انها مسيرها هتنهى حياته او هيقابل معاها نقطه نهايه غير محببه
بس للاسف والله اعلم باه بروح التحدى ولا التطفل ولا ايه بيكمل للنهايه

انا عن نفسى كتيييييير اوى بعمل كدا
بالرغم من انى ببقى شايفه النهايخ بوضوح الا نانى برضو بتصرف "بحماقه"زى ما انت قلت

كمان لفت نظرى اوى صوره مفترق الطرق انا من سنييييييييين كتييييرها ىو وانا المشهد دا بجد لما بيقابلنى بقف قدامه صامته شارده الذهن
مش عرافه افكر ولا اتصرف ولا عارفه مين الطريق الاصلح

وبحمد ربنا انه فعليا يعنى على الواقع كطريق مش قابلنى ولا مره فى حياتى لكن عمليا قابلته كتير وكنت غالبا ما بختار غلط

او يمكن كل الطرق كانت بتبقى دى نهايتها

بجد مش عرافه اوضحلك ازاى البوست لمسنى اوى ويمكن كمان ساعدنى فى انى اخد قرار كان لازم انى اخده من زمان

؛)

شكرا ليك

بجد شكرا ليك

hoda omran said...

تحفة وفلسفة حلوة اوى خاصة فى فراشة
اكتر واحدة عجبتنى مفترق طرق يمكن كتير مننا كدة
واصبحت شتلة صبار وحيدة وسط صحرائي الخاصة
صعب اوى التعبير ده
كل شوية اسلوبك بيبقى احسن من اللى قبله
بجد تحفة

صاحب البوابــة said...

سعدت للغاية بقراءة تلك التأملات

تحياتي أحمد

------------

أرجو أن تنضم لنا في حملة ( أفضحوا تجار الكيف )

التفاصيل في مدونتي

تحياتي

Ert3ashat said...

بوست جميل

شوف يابني انا اهو بريق واحد بس و برضه مافيش فايده :)

ربنا يتولانا

Ahmed EIssa said...

ساعة الغروب:اذيك يا رودي ايه اخبارك؟؟؟؟
ممممممممممم
كل الطرق نهايتها كدة؟؟؟
كاتب امريكي سادي شوية اسمه كافكا كانت كل طرقه نهايتها كدة..تلاقي البطل محكوم عليه بالاعدام من غير سبب او حد بيطارده افتكرت قوي النظرية الكافكوية في التعامل لما قريت كلمتك دي
مش كل الطرق نهايتها كدة والا مكنش حيبقي في نجاح
ومكنش حيبقي في قرار صح وقرارا غلط
في كتيرر قوي بيبقي الطريق قدامنا واضح واحنا اللي مش شايفينه وللاسف ممكن نعدي عليه ويبقي قدامنا وبرضه منشوفوش
في كتير قوي بيبقي اللي بيضرنا قدامنا وبنصر عليه
حماقة فعلا
نورتيني يارضوة واتمني القرار ميكونش في دم عشان مشلش همه

همسات:طب اقول ايه بعد الكلام الحلو ده؟؟؟؟
:)
مش حشكرك بقي انك جيتي ..اي وقت المدونة تحت امرك ..ولسة بقي لما افتح فرع كافي لحظات فوق الشات بوكس..قريب ان شاء الله

صاحب البوابة:سعيد بمرورك
وحاجي اشوف حملة تجار الكيف
بس اجي لوحدي ولا في بوكس؟؟؟؟

ارتعاشات:ياسيدي ربنا يتولانا جميعا
لوحدك مع حد,,مش بتفرق4 مانت عارف
سعيد بمرورك وابقي تعالي تاني بقي

~ Bato0ot ~ said...

ahmed 3esa
ana m2rtsh el post bas isa hrg3 a2rah
ana 3yza ashkorak awy 3ala kalamak fel modwna 3ndy
bgd kalamko koloko shg3ny eny a2of 3ala regly besor3a w mrdtsh arg3 keda rg3t b khabar 7elw :)
forgive me 3ala ens7aby w thnx 3ala ur support :)

شيماء الجيزى said...

عارف يا احمد

اجمل شئ انك تكتشف انك مش الاحمق الوحيد

لان شعور الاحمق الوحيد

شعور صعب

وبالتالى

جميل انك تكون مش الاحمق الوحيد

..............

احمد

ازيك يا شيخ

الموضوع ده بجد رائع
يمكن لانى حسه

انى مش الاحمق الوحيد دلوقت

تحياتى

Ahmed EIssa said...

بطوط:حمد الله علي سلامتك نورتيني
والف مبروك النجاح
شيماء الجيزي:ياااااه وسع ياجدع
اذيك يا شيماء ايه اخبارك وحشتني تعليقاتك والله
هو انتي لسة حاسه انك مش الاحمق الوحيد دلوقت
المفروض اي حد يعرفني يحس بكدة
ههههه
نورتيني يا شيماء

~ Bato0ot ~ said...

akher soura de mn cast away .. b7b awy ama byo2af w ytl3 el map w yqrar hyrou7 fen

mawdo3 7elw w 7elw enak matkonsh el a7maq el wa7eed :)