وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Friday, January 26, 2007

ألا تكون أنا...!!!




ألا تكون أنا..فهذا جيد لأنك حينئذ لن تكون كالبركان الذي يختبئ تحت جبل جليدي..كرة من النارمشتعلة بالعصبية والاندفاع تتظاهر بأنها كرة من الثلج غاية في الوداعة..لن يكون عليك كتمان السخط والغضب المستعر في اعماقك خلف قناع التحضر والتهذيب,وبالرغم من ان غضبك له مايبرره الا انك لابد ان تكبته و تبدو هادئا كي تسير حياتك وعملك كما ينبغي..




ألا تكون أنا..فهذا جيد لانك حينئذ لن تعد الايام القليلة المتبقية علي انتهاء عامك الثالث والعشرين ..تحاول الا تنظر في تلك الورقة الحمقاء التي كتبت بها ما تتمني ان تحققه قبل ان تبلغ عامك الرابع والعشرين والتي تعلم جيدا انك لم تحقق منها سوي اقل القليل,عالما ان مالم تحققه سوف يملأ تلك الورقة الحمقاء الاخري التي تعدها لتعدد ماتتمني ان تحققه قبل ان تبلغ الخامسة والعشرين غير عالم اذا ماكنت بالفعل سوف تحقق ذلك او انك ستكتشف في سن الستين ان ما تمنيت ان تحققه قد اصبح مجلدات ضخمة من الاوراق الحمقاء..




ألا تكون أنا.. فهذا جيد لانك لن تندم علي كلمة تفوهت بها اولم تتفوه بها في اوانها..لن تحاسب نفسك علي ترددك او اندفاعك..لن تضع كل الاحداث علي نفس المائدة في ذات اللحظة..تتذكر هزائمك قبل انتصاراتك فتشعر بذات الالم والمرارة التي شعرت بها حين هزمت..لن تضطر ان تعيش مثقلا باخطاء ارتبكتها او لم تتمني ارتكابها ..اشياء توجب عليك فعلها في لحظات معينة ولم تفعلها..




ألا تكون أنا..فهذا جيد لانك لن تضطر الي ان تبحث عن شئ لا تدريه لكنك تحتاجه بشدة..تشعر ان حياتك لن تستقيم مالم تجده وستظل افكارك مشوشة تهشم بعضها البعض فلا يبقي منها الا شئ ما لاتدري كنهه لكنه يتلاءم بشدة مع ما تبحث عنه..ذلك التعطش الدائم نحوالمجهول..




ألا تكون أنا ..فهذا جيد لانك بهذا سترضي عن واقعك ولن تبحث عن الكمال لانك تعلم جيدا انه لا شئ كامل ولكن الا تكون انا يجعل ذلك الوسواس يهمد ويهدأ..ذلك الوسواس الذي يجعلك لا ترضي عن اي عمل قام به غيرك وربما قمت انت به شخصيا لانك تعلم مسبقا ان نتيجة ذاك العمل لن ترضيك..




ألا تكون أنا.. فهذا جيد لانك لن تري انك تستحق الافضل لا لشئ الا لانك انت ..




ألا تكون أنا.. ..فهذا جيد لانك لن تشعر بأن بداخلك طاقة هائلة لا تسطيع توجيهها...أحلام وطموحات تحتاج الي عمر اخر وحياة اخري وظروف اخري..




ألا تكون أنا ..فهذا جيد لانك بهذا انسان طبيعي سوي يعيش علي هذا الكوكب ويتنفس هواءه..لن تشعر بانك مقيد بقيود ثقيلة من الغربة وعدم التأقلم..الا تكون انا هذا جيد لانني لا انتمي الي هذا العالم المعقد..ككائن من كوكب اخر مطالب بان يعيش في هذا العالم العجيب عاجزا عن التـأقلم...يهتف من حوله تأقلم يا احمق فلن تجد عالما اخر لتعيش فيه لكنك تعلم جيدا انك لن تستطيع التأقلم مهما حاولوا..ومهما حاولت


Wednesday, January 24, 2007

لا تصالح...أمل دنقل

لا تصالحْ


!
.. ولو منحوك الذهب
أترى حين أفقأ عينيك،
ثم أثبت جوهرتين مكانهما..
هل ترى..؟
هي أشياء لا تشترى..:
ذكريات الطفولة بين أخيك وبينك،
حسُّكما - فجأةً - بالرجولةِ،
هذا الحياء الذي يكبت الشوق.. حين تعانقُهُ،
الصمتُ - مبتسمين - لتأنيب أمكما..
وكأنكما
ما تزالان طفلين!
تلك الطمأنينة الأبدية بينكما:
أنَّ سيفانِ سيفَكَ..
صوتانِ صوتَكَ
أنك إن متَّ:
للبيت ربٌّ
وللطفل أبْ
هل يصير دمي - بين عينيك - ماءً ؟
أتنسى ردائي الملطَّخَ بالدماء..
تلبس - فوق دمائي - ثيابًا مطرَّزَةً بالقصب ؟
إنها الحربُ !
قد تثقل القلبَ ..
لكن خلفك عار العرب
لا تصالحْ ..
ولا تتوخَّ الهرب !


(2)
لا تصالح على الدم .. حتى بدم !
لا تصالح ! ولو قيل رأس برأسٍ
أكلُّ الرؤوس سواءٌ ؟
أقلب الغريب كقلب أخيك ؟!
أعيناه عينا أخيك ؟!
وهل تتساوى يدٌ .. سيفها كان لك
بيدٍ سيفها أثْكَلك ؟
سيقولون :
جئناك كي تحقن الدم ..
جئناك . كن - يا أمير - الحكم
سيقولون :
ها نحن أبناء عم.
قل لهم : إنهم لم يراعوا العمومة فيمن هلك
واغرس السيفَ في جبهة الصحراء
إلى أن يجيب العدم
إنني كنت لك
فارسًا،
وأخًا،
وأبًا، ومَلِك

Sunday, January 21, 2007

التفكير المزدوج..2

الطنجيرة وفلسفة القينعور
تيجي تعدل -بلاش تعدل - تقول رأي ولا اقتراح معين في شغل حد نلاقيه يقولك "ياعم ده شغلي..ده أكل عيشي ..دانا
في المهنة دي من ايام الحملة الفرنسية ..".اهم حاجة ميطلعش نفسه غلطان ولا يسيب الورقة فاضية..ماشي
شوية ييجي يقولك..علي فكرة كدة غلط..المفروض تعمل كذا وكذا..أمال الخطبة العصماء اللي قالهالك من شوية دي ايه؟..رد عليه..قوله ..معلش ده شغلي يقولك "ياسيدي لاخاب من استشار..واسمع من هنا وارمي من الناحيى التانية لو كنت غلطان ...!!" بس شفت بقي سهلة اذاي؟
الله يرحمها جدتي كانت دايما تقولي "اللي ع الشط عوام..", شوف اي ماتش كورة أكيد الكلمة دي اتقالت"ماهو اصله مدرب حمار كان المفروض يهجم بـ 3 ويخلي حمادة راس حربه "..صح؟
أكتر من كدة؟.."ياعم دكاترة مين هم بيفهو حاجة؟ المثل بيقولك اسأل مجرب ولا تسأل طبيب عارف ليه..عشان بهايم مش بيهمهم الا الفزيته وبس"..مع الاعتذار للأطباء
حاجة تانية.."المفروض تبقي قوي معاها متعودهاش علي انك تسمع كلامها حتي لو صح..لازم تعرف مين الراجل ومين الست"ويضرب جرس التليفون يقوم اخينا ده عشان يرد تسمع طراطيش كلام.."ايوة يابنتي..صاحبي ع الكافيتريا...مش سهر ده الساع...خلاص مروح..سلام" وييجي بيضحك ويقولك..تعالي بقي موصلك ونكمل كلامنا في العربية عشان جايلي تليفون مهم علي تليفون البيت!!..علي فكرة الموقف ده حصل قدامي بالنص زي المواقف اللي فاتت
وبكدة أي حد ممكن يبقي في لحظة,خبير سياسي درجة اولي..حجة في الاقتصاد..عالم دين..دكتور باطني ..زير نساء..حلال مشاكل ..طبيب نفسي..مدرب كرة..الخ الخ الخ
لا واللي اكتر من كدة انه مثلا ميقولش ان ده رأيه هو..لا ده هو ده الصح وده المفروض اللي يحصل عشان الحياة تستقيم والسلام يحل و"تنام الحملان بجوار الذئاب"..وممكن ميكونش كمان رايه..ممكن يكون راي حد تاني ويتبناه لدرجة انه يدافع عنه اكتر من لو كان رأيه
لا وكمان ايه..قليل قوي اللي يقول معرفش..اسال اي حد عن اي حاجة لازم حيجاوبك..قوله مثلا"عارف الطنجيرة"..يقول وهو مكسوف..ايه الطنجيرة دي..قوله..الطنجيرة ياعم اللي بنبقي مع النجار اللي بيعمل بيها..علي طول حيقاطعك..ااااااه افتكرتها ياعم مسمهاش طنجيرة اسمها ..بالرغم من ان مفيش حاجة اساسا اسمها طنجيرة
فعلا "اللي ع الشط عوام",,,وان شاء الله للحديث بقية
يتبـــــــــــــع

Sunday, January 14, 2007

هل تتمني ان تكون دوريان جراي...؟

دوريان جراي هو صبي برئ وسيم ,اعجب به احد الرسامين فاختاره ليرسمه في لوحة اختارها لتعبر عن قمة الطهر..وبعدما رسمها راها دوريان حزن حزنا شديدا..تلك الصورة ستبقي شابة الي الابد في حين ان ملامحه ستشيخ مع مرور الزمن..وتساءل هل الخطيئة تبدو علي ملامح صاحبها؟..هل تحفر الاثام والاخطاء ملامحها علي وجهه النضر لو اخطأ ؟ تمني وقتها لو تشيخ تلك الصورة بدلا منه وتحمل اثامه
اعطاه احد اصدقائه كتاب اعجب به كثيرا..وبسببه تحول الي النقيض..اخذ يخطئ ويخطئ ويخطئ دون ان يبدو ذلك علي ملامحه..تحول الي صورة براقه لشخص طاهر برئ في حين اخذت الخطيئة تتخر في روحه شيئا فشيئا..لفد تحققت امنيته وها هي ذي صورته تشيخ وتحمل اوزاره بدلا منه..حملت ملامح الصورة كل القسوة ...نظرتها عابثة مذنبة..احب فتاة واغتصبها وقتلها وحين بحث اخوها عن قاتلها وراه, لم يصدق ان هذا الصبي هو من فعل ذلك ..اعتذر له انه لابد من وجود خطأ..راي الرسام ما الت اليه صورته..وفي النهاية طعن قتل دوريان الرسام وطعن اللوحة وكان المشهد الاخير للخادم الذي وجد صورة لسيده كما عرفه شاب نضر ..وبجواره كهل هرم قبيح الهيئة يرتدي خواتم سيده
ان التلخيص يفسد الامر برمته..يقال انه كلما كانت القصة جيدة كان ملخصها اسوأ ,انها قصة الكاتب الاشهر"أوسكار وايلد"..وهي قصة رائعة اسمها - كما خمنت -" صورة دوريان جراي"..السؤال هو
هل تمنيت ان تكون دوريان جراي؟
فكر جيدا للحظات قبل الاجابة.. ما اقصده واضح ولا يحتمل ان تفكر بأي طريقة اخري..
هل تمنيت الا تحمل ملامحك اثار اخطائك؟..من منا لم يخطئ في حياته خطأ كبيرا سبب جرحا لانسان ربما عرفه وربما لم يعرفه؟..هل انت واثق من نقاء سريرتك؟..ألم تتمني يوما لو عاد بك الزمن الي الوراء ففعلت كذا وكذا..ربما اعتذرت لفلان..ربما اخذت قرارا خاطئا فتتراجع عنه..ربما ندمت علي علاقة ما..ألم تنظر يوما الي شخض ما نظرة المته..كلمته كلاما جارحا..ضغطت عضلات فكيك من الغضب..زممت شفتيك في قسوة.؟
ربما حدث هذا وربما لم يحدث..ولكنك ستظل دائما تتساءل..ألا اتمني ان احظي بتلك الفرصة التي حظي بها دوريان جراي؟
يتــــــــبع

Saturday, January 13, 2007

الصفحة الاجتماعية...اقلب البوست لو حتزهق


















طبعا مقدرش اقول انا وعلي الالفي ..حبيبي..اصحاب قد ايه بالرغم من خلافاتنا المتعددة..هو شايفني واحد معندوش لا قلب ولا احساس وبرمي كلام زي الطوب ..بس والله للمصلحة...لكن غير النقطة الصغيرة دي احنا فعلا اصحاب جدا ومن زمان..ليه انا بقول كدة؟..مش عارف..ربما لان الحاجة الكويسة اعتقد الوحيدة -غير ان صوته حلو- اللي عملها هي انه عرفني علي عالم المدونات ده..فعلا عالم محترم وراقي وكله صدق..اكيد كله صدق لان كل واحد بيقول اللي جواه..دي الحاجة الوحيدة اللي مفيهاش اي شبهة ادعاء..يعني مثلا مش شات غرضه التعارف وبالتالي "انا مهندس عصام32سنة مهندس كمبيوتر" وهو اساسا واد16سنة في ثانوي عام..هنا مفيش كدب..واللي يكدب في مدونته يبقي انسا ن مريض...اكيد مريض..لان الكدب من غير غرض يبقي مرض..يعني الواحد بيكدب عشان يبرر..يحكي..يجمل صورته..لكن لما يكدب عشان مجرد الكدب يبقي مريض..ولا ايه



كنت عايزاقول ايه؟؟؟ايه؟؟؟...اه..علي عنده حفلة يوم30/1 اللي جاي..تقريبا حتبقي في ساقية الصاوي...حفلة من نوعية الحفلات اللي بيغتو فيها"ماشية السنيورة كدة هو" و"متحسبوش يابنات ان الجواز راحة"بس اوعدكو حتحبوها,علي الالفي لو غني ريان يافجل حتعجبك جدا وحتطلبها تاني وتاني..واهي فرصة نغير جو..بس لو سمحت ياعلي تغني مضناك جفاه مرقده عشان انت عارف انا بحبها قد ايه..




ايه كمان...دعوة للجميع عايز ابدأها من دلوقت..احنا شباب مثقف متعلم لازم نعرف حقوقنا كويس..وعشان نعرف حقوقنا لازم نقرا الدستور..انا لسة مشحون من اللي شفته بجد وعشان كدة لازم اعرف حقوقي اللي الدستور والقانون كفلهولي ..انا ححاول ادور علي نسخة كاملة الكترونية وانزلها بس لو معرفتش...ماعلينا عامة انا حدور علي الدستور واقراه وافهمه وادعو الجميع لذلك
وكدة ميت لون وكدة ميت لون والكل سيربح المليون


الدور بقي علي الاعتذار..انا بعتذر علي صيغة الجمع اللي اتكلمت فيها عن الشرطة والجيش..اكيد كل مجال فيه الكويس وفيه الوحش بس الوحش طغي علي الكويس وواجب كل ضابط نزيه شريف وكويس انه يستغل سلطته في الخير ويوقف الضابط الزبالة عن حده..دول بيسيئوا لكل رجال الشرطة..وعامة انا حعتبر كل رجل شرطة وحش الي ان يثبت العكس..

وان شاء الله للحديث بقية..ان شاء الله








Friday, January 12, 2007

وهل يوجد مايقال اكثر؟

اذكروا معي قول محمود درويش" انا لا اكره الناس ولا اسطو علي احد..لكني ان جعت اكلت لحم مغتصبي..فحذار اذن من جوعي ومن غضبي
...
حين اغضب يتحول العالم الي عالم ثنائي الابعاد..صور متحركة تفقدني اي احساس بأي وقت ..ولا اعلم ما الذي افكر فيه ولا ماذا افعله..ذلك لانني لست عنيفا بطبعي...لكن مارأيت اليوم افقدني اي تعقل..اتعلمون ما يحدث داخل قلاع الحماية المصرية المعروفة بأقسام الشرطة؟؟
الشرطة التي تؤدي ذلك القسم المؤثرالخاص بخدمة الوطن والمواطنين..اي وحوش تلك التي تستتر خلف بزاتها الرسمية ؟أي سادية تلك؟
اهذا ما يدرسونهم في كليات الشرطة؟
هل بعدما رأيت استطيع ان اثق بأحدهم...وعلي قدرته علي حمايتي..وحمايتنا جميعا؟
ربما خرجت كلماتي مزعزعة واهنة ركيكة ولكني في تلك الحالة التي اريد فيها ان اصرخ غضبا واضرخ غضبا ..نحن شعبا لا يعلم حقوقه ولو علمها لادرك ان رجل الشرطة مثلنا جميعا..انسان وليس اله يملك المقدرات...وكأنهم جميعا يحملون مصر ذلك الجميل الخالد ..نحن قادرون علي حمايتكم ولابد لكم من دفع الثمن..اتاوة حقيرة..مثلهم مثل رجال الجيش الذين يحملون مصر ذلك الجميل الخالد -بدوننا لما قامت الثورة ولاصبحتم محتلين تعيشون حتي الان تحت نير الملك والاحتلال - نحن من اعطيناهم ذلك الحق المغتصب المكتسب بوضع اليد..نحن من نهابهم وهم لايستحقون تلك الهيبه المزعومة..ربما احترم طبيبا يحمل حقيبته في الرابعة فجرا لينقذ مريض..مهندسا يقف في الصحراء القاحلة ليبني ..فلاحا يزرع..لكني لن احترم ابدا ضابط شرطة يعذب مواطنا في قسم الشرطة بغرض او بدون غرض..
لن أفعل مايفعله المدونون واطلعكم علي تلك الفيديوهات المأسوية..يكفيني غضبا مشاهدتها..بالاضافة الي الكلام البذي التي تمتلئ بها والتي اشفق عليكم من سماعها...لكني اقولها الان ..لن اهاب شرطيا بعد الان لو كنت قد هبته من قبل...ساسعي لان اعرف حقوقي الكاملة حتي لا يعترضني حقير هاتك للاعراض وانا لا اعرف مايجب فعله..هم ذاهبون والله تعالي يهمل ولا يمهل"ونتركهم في طغيانهم يعمهون" صدق الله العظيم
...
أنا...لا اكره الناس ولا اسطو علي أحد...
ولكني ان جعت أكلت لحم مغتصبي...
فحذار اذن من جوعي...
ومن غضبي ...

Thursday, January 11, 2007

التفكير المزدوج..1

العلاج السحري وازدواجية التفكير...
معظم الشعب المصري ان مكنش كله.. فهلوي
اه والله..كلنا نعاني من شئ ما اسمه العلاج السحري..العلاج السحري ببساطة انك عايز نعمل اللي يعجبك وتأيف عليه ظروفك..خد عندك مثلا:
"ياباشمهندس..انا بشرب 3 علب سجاير في اليوم وبكح كتير وصدري واجعني" شئ طبيعي اللي يشرب سجاير بالكمية دي يحصله كدة قوله"خلاص متشربش او قلل السجاير" يقول"مقدرش والعيال والقرف ودي اللي بننفخ فيها بدل منطق ونموت .."..ومش حتخلص من الفوايد العظيمة للسجاير اللي حيطلعهالك,يعني انا المفروض اطلع من جيبي العلاج السحري اللي يخليه يشرب 3 علب في اليوم وميكحش..!!
"والله مخنوق ومفلس والمرتب بيخلص في 10 منه..انت عارف بقي كرت التليفون والخروج والفسح..مش عارف احوش حاجة ولا اكون نفسي ولا ولا.."مين مرتبه مش بيخلص اول ميقبضه اصلا ده لو كان شغال؟ تيجي تقوله"خلاص قلل مصاريفك شوية..بلاش 3 او4 كروت في الشهر " يقولك"اذاي..انت مش عارف الظروف والتليفون مهم بالنسبة لي وانا محتاج اغير جو واتفسح و...و..."تقوم انت بقي المفروض تعمل ايه؟برافو..تطلع العلاج السحري اللي يخليه يصرف زي مهو عايز والمرتب يتبقي منه اللي يحوشه عشان يكون نفسه ويتجوز..قال يعني
قيس علي كدة بقي"بحب ومش عارف ارتبط باللي بحبها....باكل كتير ومش عارف اخس.."ودي بقي ازدواجية التفكير..الموضوع ده كبير ومش كفاية كلام عليه مرة واحدة بس بجد انا ببقي متغاظ جدا من اللي ييجي يقول كدة..
اللي خلاني اتكلم في الموضوع ده مشكلة كبيرة مقابلاني اليومين دول...بسهر كتير وانام متأخر ومش بعرف اصحي للشغل بدري..ولو صحيت بيبقي بالعافية..محدش عنده حل....؟
و...اكيد اكيد - ان شاء الله - للحديث بقية...
يتـــــــــبع

Tuesday, January 09, 2007

كل سنة وانت طيب

كل سنة وانت طيب!!

السنة دي موسم اعياد..عيد الاضحي ..راس السنة...اعياد اخواننا المسيحيين لذلك اقول للجميع كل سنة وانتو طيبين جميعا و....اه انا فين؟معلش مسمعتكش انا موجود ياسيدي بس والله معرفش اني وحشتكو..بس تصدقو بجد وحشتني مدونتي..وانتو كمان...

ايوة..سامعك ياستي متزعقيش...انا اتشغلت جدا...معلش ظروف مرض مفاجئة مكنتش اتوقعها..وبعدين جالي شغل جديد في الحكومة – متضحكش شايفك اه في الحكومة – مهندس مشروعات في الحي..الله يبارك فيك ياسيدي...كنت بقي بلف اللفة العادية بتاعة الحكومة..ورق ثم ورق ثم ورق...موظف يكلمك كويس وتاني يكلمك وحش..يلا ماعلينا ربنا ياخـ...يسامح الجميع..!!

جينا بقي ليلة راس السنة واحد صاحبي قالي تعالي ننزل..عادي...انا منزلتش راس السنة من حوالي..يعني10سنين كدة ..اه والله من ثانوية عامة...عند بيتزا بينو – مطعم مشهور في بورسعيد – بيحتفلو براس السنة العاب نارية وصواريخ ..عادي ايامها كنا صغيرين بقي ..المهم بقي قلت حيبقي زي ايامها وحتبقي سهرة حلوة ..قرب الساعة 12 لقيت تجمهر..عربيات امن كتير واقفة مفهمتش ليه - بس فهمت بعدين -..شباب كتير واقف قلت عادي الاحتفال بدأ..وبعد كدة بقي..!!

قمة الهمجية...مش ممكن يكون في همجية بالمنظر ده..تكسير زجاج من الشبابيك..شباب بيكسر مصابيح نيون في الشارع..لا وزعلانين ان الشرطة مانعاهم!!..جايز انا مش عارف اوصفلك المنظر كويس عشان ده ميتقالش..لكن ممكن لقطات سريعة تقربلك الموقف. راجل كبير شرطة بيقول انا خايف عليكم ...شباب بيجري..زعيق..واحد واقف بيصور بالموبايل..زجاج بيتحدف..واحد بيجري مع اصحابه ويقول"حكومة حكومة"..واحد بيسال امين شرطة طب نروح منين؟..كوردون ادام بنك بيقع..شباب بيجري من رصيف لرصيف خايف يقع عليه زجاج...يلا يا ولاد ال..مش حتمسكونا...عربيات بتجري خايفة يقع عليها اي حاجة..واحد بيكلم واحد في الموبايل..خلاص حستناك عند محطة البنزين..

هل ياتري قمة الرجولة والاحساس بالذات انك تتحدي شرطة بلدك ؟معتقدش..هل احتفالك بسنة جديدة او سنة غارت في داهية يخليك تخرب البلد اللي انت ساكت فيها..مظنش..طب فيه ايه..؟نتخيل الموقف من غير شرطة كانت حتبقي مدبحة..كله بيدوس علي كله..بس مايحتسب بجد لشباب بلدي انهم مقربوش لبنت ماشية..الموقف بجد اللي يحتسب يحتسب لرجال الشرطة..بجد الله كان في عونها اليوم ده..صحيح كانو في قمة العصبية لكن مفيش ايد اتمدت تضرب حد..مفيش عصاية جت علي حد..

صحيح احنا مش في قمة التحضر لكن علي الاقل ممكن نقبل بحد معين من الهمجية ..الهمجية اللي متحولكش لانسان غابة كل همه يتحدي السلطة..اللي تخليك حيوان متعطش للعنف والمزيد من العنف..
عن نفسي..انا ححاول معملش اي تصرفات همجية في 2007 ..تعالو نبدأ بجد نقيم نفسنا واللي بيعمل اي تصرف ميلقش بأدميته والتكريم اللي ربنا ادهوله ميعملوش..نساعد بعض ونحمس بعض لحاجة كويسة اولها..نبطل همجية..وللهمجية انواع..

و...طبعا للحديث بقية...!!