وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Thursday, October 25, 2007

اليوم أحدثكم


اليوم احدثكم عن محمد
محمد من مواليد فبراير59.. تخرج من كلية العلوم قسم الجيولوجيا..اكبر اخوته..يعمل اخصائيا للتحاليل في احدي المستشفيات الحكومية منذ عشرين عاما علي الاقل...احبه زملاؤه في العمل لبساطته ومرحه واخلاصه ..حين احتاج احدهم شيئا فكر به..حين احس احدهم بذلك الضيق الذي يجثم علي صدر احد منا جميعا ذهب ليحكي له مكتفيا ببساطة وتلقائية حديثه حين ينصح او يواسي
اليوم احدثكم عن محمد
محمد له ثلاثة ابناء اكبرهم جاءه خطاب التجنيد حديثا...واصغرهم في الثالثة ربما الرابعة من عمره..ورغم مرحه الشديد الا انه كان يعول همهم جميعا دون ان يشتكي ..احبهم واحبوه لدرجة الجنون
اليوم احدثكم عن محمد
محمد يعمل صباحا في المستشفي وليلا في محل تجاري بسيط يمتلكه والده...احبه اهل شارعه كما يحبون ابناءهم..وحين يجلس في محله وحيدا يمسك بسماعة الهاتف ليطمئن علي كل اقربائه وزملائه في العمل..يجد احدهم او احداهن مرهقة او متعبة فيعرض عليها ان ـاخذ اجازة ويقوم هو بعملها..لم يرض ابدا ان ينزل احدي زميلاته في نوبتجيات الليل او الظهر واكتفي بمرح ابتسامته ان يقول لهم ان لديهم اسر وعائلات بينما هو الرجل دوما في الشارع
اليوم احدثكم عن محمد
ومحمد من السهل جدا ان تعرفوه..شارب رفيع..وجه طيب بسيط هادئ..يرتدي دوما ملابس كلاسيكية..ربما تجده علي دراجته مبتسما..يرفع يده لتحية هذا وذاك في بساطة وتلقائية..لم يغضب منه احد او يغضب في حياته احد
اليوم احدثكم عن محمد
قرر محمد اخذ يوم الخميس اجازة عن العمل ليستريح...ثم فوجئ به زملائه في العمل صباح الخميس نشيطا مبتسما كعادته..سالته احداهن لماذا جئت فهز كتفيه قائلا في بساطة انه قد استيقظ مبكرا ولم يجد ما يفعله فارتدي ملابسه وذهب الي العمل...اعد كوبا من الشاي..استغرق في العمل كعادته..وبالرغم من كونه اخصائيا ذهب بنفسه الي المخزن ليحضر احد الاجهزة الطبية ولم يطلب ذلك من احد العمال
اليوم احدثكم عن محمد لان محمد - ببساطة - رجل عادي في الخمسين من العمر لم يشكو من اي مرض احبه الجميع لبساطته وخلقه وابتسامته الهادئة
عاد محمد من المخزن ليمزح مع احدي بنات زميلاته..احس بدوار وأرجع ذلك الي تلك الرائحة الكريهة التي في المخزن
اليوم احدثكم عن محمد لان محمد - ببساطة - هو ذلك الابن البار والاخ البار والصديق الذي تمناه الجميع
اليوم احدثكم عن محمد لان محمد - ببساطة -هو اب حنون وزوج محب
اليوم احدثكم عن محمد لان محمد قد مات
بدون مقدمات وبعد اصابته بذلك الدوار انتقل الي العناية المركزة في المستشفي الذي يعمل بها ..تحسنت حالته في الثالثة وتوفي في الرابعة والربع
محمد الغنام...زميل امي في العمل والذي شهدني طفلا ومراهقا وشابا ..قد توفي اليوم في الرابعة والربع
البقاء والدوام لله وانا لله وانا اليه راجعون

Friday, October 19, 2007

تاج.اه والله تاج

تاج لذيذ جدا جالي من غالية صاحبة مدونة بكرة اكيد احلي..وزيزي صاحبة مدونة البئر والظمأ...وانا بقالي كتير مجاليش تاج..والفقي لما يسعد بقي يجيله نفس التاج مرتين..صحيح التاج ده اتاخر في نزوله كتير..بس لظروف انقطاع النت عندي وسوء الحالة المزاجية فترة أجلت نزوله

بس الاول انا عايز اقول كلمتين كدة

توضيح بالنسبة لبوست الحياة دون شبكة امان..مع احترامي لكل التعليقات اللي جت واللي اتفق معظمها في ان ربنا هو شبكة الامان اللي الواحد بيرتكن ليها بس ده مكنش قصدي من البوست
ببساطة انا كان قصدي..انت بتقعد تفكر..تحط كذا احتمال..علي اساس لو احتمال منهم فشل يبقي عندك بديل..ممكن ده يخليك تحس بامان ويديك ده نوع من الاستهتار لوجود البديل..تخيل بقي لو مفيش بديل؟؟؟
حتتمسك قوي بالاختيار اللي في ايدك..تمام؟

بس ده كان قصدي

والحق يقال يعني انا كتبت البوست ده في ظروف معينة كنت مذبذب وبفكر في موضوع البدائل ده

بس مع تغير الظروف دي انا بحمد ربنا ان في شبكة امان بدل الواحد ميقع علي جدور رقبته


الحاجة التانية انا بقالي فترة مش برد علي الردود وده للاسباب اللي ذكرتها قبل كدة..مزاجي مش حلو وبفكر علي طول..والنت كان مفصول فترة...يمكن مش مبرر بس محبش ردود من نوع شكرا ع المرور
في حاجة كمان..بتغاظ قوي قوي من الردود اللي ملهاش علاقة بموضوع البوست..زي العدد الجديد من مجلة كذا او تعالي شرفني وزور مدونتي المتواضعة وكدة... مش عارف انا لوحدي ولا باقي المدونين معايا في الموضوع ده..انا مش بعارض الموضوع ده بس علي العموم في شات بوكس ..ارمي السلام..خد فنجان قهوة ..نسكافيه..حاجة ساقعة...وقول اللي يعجبك ..ولا ايه؟؟
اخر حاجة بقي قبل ممشي...دوت سبوت متوقفة لمدة لا يعلمها الا الله..نظرا لظروف النت الوحشة عند مها المشاكسة اللي بتخطف الميكروفونات مش عارفين نعد اي حاجة جديدة برغم الافكار الكتير اللي في الدرافت اه والله..بس اعداد البرنامج نفسه بياخد مجهود خصوصا ان نص الحلقة بنخطف من بعض الميكروفون..لحد ربنا يسهل ميدخل عندها النت تاني ونشتري عدة جديدة ميكروفونات وخلافه حتلاقو بلالين ومارشات عسكرية وانوار وحنعمل افتتاح تاني لدوت سبوت ان شاء الله
يلا مش حطول عليكو...سلام بقي ونتقابل البوست اللي جاي

اه صحيح نسيت التاج

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟
عصر جمال عبد الناصر
مش حنقول بقي عبد الناصر كان صح ولا غلط..كان ديكتاتور...كان شايف اخطاء أعضاء قيادة الثورة ومكنش بيحاسبهم عشان اصحابه..مفيش حد ينكر ان ايام عبد الناصر كان الشعب المصري كله بيحلم نفس الحلم وعايش نفس الطموح ورا زعيم واحد قدر بكاريزما قوية جدا انه يبقي محط انظار العالم

اول اولويه فى حياتك عيلتك ولا شغلك ولا اصحابك؟
بنفس الترتيب كدة
عيلتي
ثم شغلي
ثم اصحابي

ايه اكتر حاجه بتحبها فى رمضان؟
الهدوء
رمضان دونا عن شهور السنة كلها بيبقي فيه جو هدوء وصفاء نفسي غريب
حتي النهار في عز الزحمة بحس ان في هدوء
صوت محمد رفعت في الراديو قبل الفطار
صلاة المغرب الجماعة اللي بابا بيبقي مصر نصليها سوا كلنا قبل الفطار جماعة
اصوات الجوامع ساعة التراويح
عصير قمر الدين
السحور
والصلاة وقراءة القران والقيام

اوصف ليا اجمل فطار ممكن تفطره
مفكرتش حقيقة في الموضوع ده قبل كدة لاني مجربتش رمضان بره البيت اصلا
بس افتكر اننا مرة انا واصحابي فطرنا عند واحد صاحبنا وكان فطار جوه جميل قوي خصوصا اننا كنا لسة في اول سنة لينا في الكلية وكنا بنتعرف علي بعض

اول مرة فعلا الاحظ ان اللي كانوا في الفطار ده هم اصحابي اللي لحد دلوقتي مسبناش بعض

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟

العدالة مش سهلة ولو انا حاكم علي مجموعة من الافراد حيختلف منظور العدل نفسه
لو مجموعة افراد اعرفهم حيبقي الموضوع صعب لان ممكن تفرق قوي العلاقات الشخصية في الحكم
لكن بالنسبة لي انا اعرف اذاي وامتي اكون حيادي جدا والحيادية اهم صفات العدل
جايز لو معرفهمش حيبقي تحقيق العدل اسهل كتير
واللي حعمله عشان اعرف اني عادل حعمل استفتاء واضربه واخلي نسبته 99% لان اكيد حيبقي في معارضة
لكن كفاية قوي اني احس بصدق ابتسامة المجموعة اللي انا بحكمها لما تشوفني وتسلم عليا عشان اعرف اني عادل
لان الابتسامة دي بالذات صعب قوي تتزيف


اللى بيبوظ الحكام .. نفسهم؟ ولا الشعب؟ ولا الحاشيه المقربه؟

اللي بيبوظ اي حاكم بعده عن رعيته
وده اللي بيسمح لأي حاشية مقربه انها توصله تقارير مزيفة عن اوضاع مش موجودة
والشعب كمان ممكن يبقي سبب في بوظان الحكام لما يتساهل في معرفة حقوقه وحدوده وتطبيق قانون بلده بصورة صحيحة
علي رأي المثل يا فرعون ايه فرعنك قال ملقتش حد يلمني

مين أكتر اعلامي مصري بتحترمه؟

حمدي قنديل..مني الشاذلي

قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟
لا .. ما قريتوش..ايه علاقته بالموضوع؟؟

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
معرفش ابقي حاجة تانية غير اني ابقي مهندس ودي حقيقة وعن تجربة
بس ميمنعش اني ادخل مجال التدريس..انا شايف ان فيا ملكة توصيل المعلومة ..يستحسن مدرس رياضة..فيزياء
ايه تانى بلد تتمنى تعيش فيها بعد مصر؟
إيطاليا.. أسبانيا .. او اليونان

اوصف ليا ترتيبات اجمل فرح ممكن تحضره؟؟
ممكن يكون فرح منظم جدا ومفيهوش غلطة بس ميعجبنيش
ترتيبات اجمل فرح ممكن احضره ممكن يبقي بسيط جدا او معقد جدا انا بطبيعتي متطرف جدا ومعنديش وسطية
لكن اهم حاجة ان اجمل فرح ممكن احضره الفرح اللي حبقي سعيد فيه من قلبي

بتراعي كلام الناس والقيل والقال؟ لو اه او لو لا قول لى ليه؟
سؤال صعب
بس لا مش براعي كلام الناس والقيل والقال
مهما عملت صعب جدا انك ترضي كل الناس ولا حتي نسبة كبيرة منهم
قريت مقولة - اعتقد انها لتشرشل - اننا نخسر ثلاثة ارباع انفسنا لنكون مايريده الاخرين
وبصراحة كفاية اللي خسرته قبل كدة ..من الاخر معتش عندي حاجة اخسرها
يعني مادام مش بغلط في حد ولا بتعدي حدود ولا عادات المجتمع اللي انا فيه يبقي مفيش بني ادم ممكن يقول عليا حاجة غلط الا اذا كان هو عايز يغلط اصلا
وده انا مش حسعي اني ارضيه او اني اعرف رايه فيا اصلا


صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والاحصنه هتكون سعيد؟
سعيد؟؟؟؟؟؟؟؟؟؟؟
من غير موبايل ولا كمبيوتر؟؟
معتقدش لاني معرفش اركب حصان ومش حبقي سعيد لما اعدي جنب حد راكب حصان يعفر الدنيا

السعاده هى؟

المعني الوحيد اللي صعب جدا توصفه او تسمكه
لكن سهل قوي انك تحسه

عندك أمل ؟؟ أسبابك ؟
اكيد عندي امل
والاسباب اني لو مفيش عندي امل مش حعرف اعيش ولا اخطط لمستقبلي

لما تحب تهرب من كل شئ بتروح فين؟

انا متعودتش اني اهرب

بس في حالات الغضب والنرفزة الشديدة بيبقي ليا تكنيك عشان ابعد لحد مبقي هادي

لاني في عصبيتي لا بشوف ولا بسمع وممكن اعمل مصيبة..بجد مش تهريج

وانا متنرفز
بجري ع الكمبيوتر احط السماعات الهيدفون في وداني
اشغل اغنية مايكل جاكسون
Bad
وبعدين اغنية
Beat it
واقعد افكر بقي في اللي مضايقني وغالبا بوصل لحل

لما ببقي مخنوق قوي بتوضا واصلي ركعتين

لما ببقي متنرفز قوي بلعب
Medal of Honor
لأنها فعلا بتمتص كل الطاقة اللي جوة الواحد سواء ايجابية او سلبية


امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟

ياااااااااااااااااااااااااه
انا قلت الكلمة دي كتير قوي الفترة اللي فاتت
لما معتز صاحبي جاب يوسف
في حفلة خطوبة اختي الصغيرة
لما ابن خالتي الصغير دخل الكلية
بس المشكلة اني مش حصدق اني كبرت ويوم محموت وعندي 70 سنة وحواليا احفادي برضه مش حصدق اني كبرت!!!

لما بتعمل عمل خيرى بيكون ايه هو دافعك الاول؟
اي خير بيتعمل بيبقي لوجه الله

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
الحمد لله مش بشرب سجاير
واشمعني ست يعني؟؟انا في العام بشمئز جدا من اي بني ادم بيشرب سجاير

بتعرف ايدك اليمين من الشمال ازاي؟
ايدي الشمال لابس فيها الساعة
ايدي اليمين بمسك بيها الماوس


ايه اكتر اله موسيقيه بتحبها
الجيتار الاسباني زي موسيقي ارميك
والناي الشرقي جدا والقانون والعود

فى رأيك ليه الذوق والنخوه اتعدموا؟
هم اتعدمو؟؟؟
يعني كل اللي عايشين دلوقتي معندهمش لا ذوق ولا نخوة...؟؟؟
مش نحسس ع الكلام ولا ايه؟؟
هم متعدموش والدليل علي كدة شوف اي ست عجوزة بتعدي الشارع ولا راجل وقع من طوله تعبان وشوف كام واحد حيساعده
شوف لو واحد عربيته اتعطلت في الشارع كام واحد حيزق معاه
بس يمكن عشان احنا مش بنعرف نبص علي نص الكباية المليان وبنحب نقول علي نفسنا اننا وحشين شايفين انهم اتعدمو


ايه الحاجه اللى لو حصلتلك تبقى سعيد قوى؟؟؟
أحس اني فعال جدا في مكاني وان صعب قوي حد يستغني عني..دي حاجة بتخليني سعيد قوي

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
اجنس عربيات


البحر و لا النيل؟؟؟
البحر...بدون تعليق
انا لسة متعرفتش علي النيل!!

مركب و لا طياره؟؟
حقيقة انا لا جربت ده ولا ده بس الشئ لزوم الشئ
يعني لو رحلة عايزة انجاز يبقي طيارة
لو استجمام يبقي
بس الاغلب طيارة لاني بتخنق بسرعة

مجنون و لا عاقل؟؟
اعقل المجانين
او يمكن اجن العاقلين
بس عاجبني قوي التناقض ده لان محدش حيقدر يقول انه فاهمني
لاني مش فاهمني انا شخصيا

تقرأ كتاب و لا تتفرج عليه فيلم؟
انا اساسا غاوي قرايه جدا
يعني بحس اني بتفاعل مع الكتاب اكتر
غير ان الفيلم بيقولب دماغك وخيالك في صورة معينة
كتير كتب قريتها وشوفتها سينما وتليفزيون وحسيت انها كانت احسن كتير لما قريتها
زي الحفار مثلا والكافير
وكتييييييييير جدا

تحب بقي تمرر التاج ده لمين؟؟

نياهاهاهاهاهاهاهاهاهاهاهاها

مستني السؤال ده من بدري

اكيد اكيد مها غربة وطن زميلة الكفاح

اكيد اكيد علي الالفي تفاصيل..رخامة يعني عشان انا عارف انه مش بيحب التاجات

الناس دي بقي اول مرة ابعاتلها تاج يارب متكسفنيش

عقد فل

One True thing

ميزو..بيجاسوس المصري

مزمز شجرة بداخلي

بيرو..احلي حب

رضوة..ساعة الغروب...نياهاهاها شرير انا ها؟؟

ايه..الوان ايويه

جوسي

بحاول اكون

حكايه..محمد العدوي

حقل التيوليب الاحمر

يوسف المصري...الساعة 6

Me Myself&the world

عيون السهر

حدوتة

دكتور روفي...انين الناي

عيون ضيقة

Noony's Stuff

Nado

ونتقابل التاج اللي جاي..انا مسبش حقي ولازم لازم ادبس زيزي وغالية في تاج







Thursday, October 11, 2007

ملاحقة السعادة..عن التخاريف نتحدث




حينما لا تكون كالاخرين..تعلم جيدا قدراتك وطموحاتك التي لا يستوعبها
عالم بأسره..وتسير في عالم يمتلئ بالوجوه..وجوه سعيدة..وجوه غاضبة..وجوه تبدو عليها الملاحة والكلاحة..البلادة والاقدام..كل يسير في عالمه الخاص منهم من يمتلئ قلبه بطموح فاق طموحك ومنهم من ارتضي بما حقق في حياته ..تعلم جيدا ان الرضا عملة صعبة لمن هو مثلك..مقامر مغامر لو ملك النجوم جميعها ما ارتضاها
ولو ان النجوم لدي مال نفت كفاي اكثرها انتقادا



هل شعرت يوما بطعم الخيانة...حين يضربك اعز الناس في ظهرك بطعنة خنجر مسمومة تترنح من هول الصدمة لا الالم...لا تصدق؟..ربما لم يصدق قيصر قبل موته بلحظات قليلة ماحدث من بروتس...ربما اتسعت عينا سيف بن زي يزن في ذعر يمتزج بدهشة وألم لا حدود له...ليس كل ألم كألم الخيانة..فكر جيدا قبل ان تجيب..هل اكتسبت من الاصدقاء ما يجعل ظهرك امنا من غدر ضربة من عدو ..وربما من صديق؟؟؟؟




حين تري معان تفتقدها...ضحكة صافية من القلب..مباراة كرة تجمع اصدقاء الصبا...تشجيع حماسي ..صرخة مفعمة بالاثارة في لعبة ملاهي..صور دقيقة كشظايا الزجاج الصغير التي تدمي وتؤلم لكنه ليس الالم الناتج عن كبر الالم بل تعدده


قال:اتعتقدين ان فوستر قتل كل هؤلاء؟؟

قالت:نعم
قال:أخت جيني والجميع؟؟

قالت:نعم
قال:بدون أي شك؟؟
قالت:بالتأكيد
قال:ماذا كنتي لتفعلي؟؟...لا تجيبي فكري بالامر .. العدالة والحقيقة اين يتقاطعان؟؟؟؟؟


اقشعر بدني حين قالها ال باتشينو في نهاية ذلك الفيلم 88 دقيقة
الحقيقة والعدالة اين يتقاطعان؟؟؟
حين تري باطل وتحاول تصحيحه ماذا لتفعل..ماذا اذا صعب عليك تصحيحه..ماذا اذا وجدت العائق وراء العائق وراء العائق حين قررت ان تصحح خطأ او تقر خطيئة...ماذا كنت لتفعل..لا تجيب وفكر بالامر

ماذا اذا قادك تفكيرك في تلك النقطة الي كينونة هامة
ان تبدو ام ان تكون؟؟؟
ان تبدو علي حق..ام ان تكون علي حق؟؟
ماذا اذا وجدت اناسا تتفنن في ان تبدو علي حق..يصدقها من حولها في حين انك تري مالا يراه الاخرون
تري زيفا وادعاء
تجد انك تعيش تحاول ان تكون علي حق فلا يصدقك الا من يصدق من يبدو علي حق
تحاول ان تبدو علي حق فتفشل لانك تحاول جاهدا ان تكون علي حق
ان تبدو..ام ان تكون...؟؟
لا تجيب وفكر بالامر
ان تبدو...ام ان تكون؟؟
الحقيقة والعدالة..اين يتقاطعان؟؟؟




ربما اذا فكرت ..ما الذي ينقصك كي تكون بطلا اسطوريا..أهي الفرصة التي لا تتاح؟؟أم هو الزي الاسطوري الذي غالبا مايأتي حينما تأتي تلك الفرصة لتكون بطلا اسطوريا...ربما فكرت في ان تكون خفيا او تملك القدرة علي الطيران..تري مالا يراه غيرك وتسمع عبر الجدران المغلقة...ربما امتلكت القدرة علي قراءة الافكار؟؟
تري كيف تشعر حين تملك مالا يملكه غيرك؟؟حين تمتلك قوي تعلم جيدا انك تستطيع استخدامها في خدمة العالم او تدميره...هل تشعر بالمسئولية الملقاة علي عاتقك؟؟..هل تفكر حين تجد نفسك في مفترق الطرق..بين الابيض والاسود ذلك الخيط الواهي الذي يقنعك بأن ماتفعله نابع من قوي الخير داخلك حتي لو قتلت اطفال ونساء وحرقت الزرع؟؟..حين تضيع معالم الوحشية والبراءة وتجد لكل ماتفعل مبرر وعذر وسند؟ هل تقوي علي الاعتراف بالخطأ؟؟؟

حين تعلم عيوبك كلها وتبحث وسطها عن ميزة لا يحولها عقلك علي الدوام الي عيب...حين تقرر ان تتغير وتعلم جيدا انك أضعف من ان تتخذ قرارا بالتغيير...حين تري حياة مفعمة بالامل تنهار حثيثا كقطرات المياه التي تتسرب الي سد منيع وتخترقه وتتشرب به جدران ذاك السد حتي ينهار..فقط تدعو الله ان تكون النهاية سريعة بلا ألم ...تدعو الله ان يهبك قوة لا تمتلكها كي تستطيع استكمال طريق لن تنهيه ...ربما لانك اضعف من ان تنهيه.

بالنسبة اليك هو احد الوجوه التي تطالعها صباحا ...كثيرة هي تلك الوجوه التي تطالعها صباحا ولا تعدو لنا اكثر من وجوه...كلما فكرت في ان ذلك الوجه خلفه حياة كاملة..ابن وابنة في سن المراهقة..اب عجوز يرعاه..ربما دين يثقل كاهله..لن تعرف عن ذلك شئ لانه بالنسبة لك لا يعدو وجها لا تراه الا لفترة..وجه يستيقظ مؤمنا بعدالة توزيع الارزاق وان من خلقه لن ينساه...يظل في عمله الذي تتساءل كيف يقضي فيه نهاره كله دون كلل ولا تعب..يراك ويري غيرك وغيرك فانت ايضا بالنسبة له..أحد الوجوه التي تطالعه صباحا..تتسع دوائر تلك الحياة كدوائر الموج الناتج من القاء حجر في بركة مياه ساكنة..تظل تكبر وتكبر وتكبر حتي تتلاشي..تتلاشي منتظرة ذلك الحجر الذي يحركها من جديد


ماذا اذا سمعت تلك الكلمات وانت تشعر بضميرك مثقل بالخطايا والاثام؟؟
الايام
مبتنساش
مهما حتقفل . باب ورا باب
مهما حتهرب..مش حتسيبك...اكيد حتجيبك بكشف حساب
عيد حساباتك
شوف في حياتك
جاي منين علي فين
مهما حتقوي
هي الاقوي
كله سلف ودين
الايام مهما ادتلك
مش حتسبلك شئ ببلاش
الايام حتسيبلك وهتحسبلك
متستقواش
عيد حساباتك
شوف في حياتك
جاي منين علي فين
مهما حتقوي
هي الاقوي
كله سلف ودين

حين تظل تطارد ذاك المعني المبهم الغامض الذي يهبك ذاك الشعور بالراحة ..حين تأمل بتلك اللحظة التي تتنفس فيها الصعداء ويزاح ذاك الحمل الثقيل من صدرك لتستطيع التنفس من جديد

حينها تعلم جيدا انك تظل تطارد السعادة وتلاحقها في كل مكان غير عالم بانها تأتيك حينما لا تلاحقها بل تأتيك لأنك تستحقها

حينها تفكر انك ربما لاتفعل كل ما بوسعك كي تستحقها