وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Tuesday, August 28, 2007

كركبة

كركبة

من فترة وانا حاسس بكركبة جامدة..لخبطة شديدة جدا..مرة ابقي فوووووق قوي ومرة ابقي مش قادر اتنفس من كتر مانا مخنوق..الكركبة دي خلتني افضل ابقي وحيد لفترة علي الاقل عشان ارتب اللي جوايا واعرف اجابة السؤال الابدي..هو في ايه؟؟ وعشان كدة انا عايز اعتذر اعتذار الشديد جدا لكل اللي مش قادر اتابعهم ومش عارف حتي ارد علي تعليقاتهم....اعتذار لكل اللي بيكلمني وبيسأل عليا وبيطلب يشوفني وبتحجج وبرفض..انا عارف اني بخسر ناس كتير كل يوم سواء من اصحابي في عالم التدوين او براه بس فعلا لاول مرة اقول ان مش بايدي حيلة في اللي جوايا..عارف اني حبقي عايز وقت طويل جدا عشان ارجع علاقاتي لمسارها الطبيعي..لحد الزن اللي في دماغي يهدا ويستقر..لحد معرف انا رايح فين اقول لكل اللي انا عارف انهم اصحابي فعلا
بدون سبب...اسف جدا

مرحلة جديدة

القصة اني داخل علي مرحلة جديدة في حياتي..بالاحري اني اقول انها المرحلة اللي المفروض انها تبدا حياتي..بداية الطريق اللي ممكن اقول اني كنت بدور عليه ..الخوف اللي جوايا من اني انهي المرحلة دي قبل متبدأ..الحاجة الوحيدة اللي مقدرش اخلي طبيعتي المقامرة تيجي جنبها هي مستقبلي ..عشان كدة بحاول اكون مستعد للمرحلة دي كويس جدا... محتاج كل ذرة في تفكيري وعقلي برغم كدة حاسس اني مشتت ..جايز عشان التوتر والقلق المسيطر عليا جدا..انا عارف اني رجل اللحظات الاخيرة وان الوقت اللي في ايدي حيتسرب شوية شوية لحد ملاقي نفسي علي بعد خطوات قليلة قوي من المرحلة دي من غير معمل حاجة


كل اللي ممكن اطلبه من كل اللي اعرفه..من كل اللي ممكن يدخل ويقرا الكلام ده بجد يدعيلي..لاول مرة في حياتي ابقي خايف الخوف ده..والاكتر اني مش عارف اقول لحد اني خايف..كل تصرفاتي بقت العكس تماما والكل بيسأل ليه وانا مش عارف اقول اني خايف..


مهو يانبقي قدها...يانسيبها للي قدها..يارب يارب اكون قدها


ذكريات من بوست فات
افتكر جملة قلتها في بوست كتبته يوم عيد ميلادي

ستتراكم الاحلام التي لم احققها
الي العام التالي وبالتالي فان الحديث عن ذلك به نوع من اليأس..ربما لم احقق كل ما
اردت ولكن هذه مزية الشباب..ان تنظر لوضع شبه ماساوي وتبتسم في ثقة وتقول انا قادر
علي فعل المعجزات
هذا ما أشعر به اليوم
تحديدا...انا قادر علي فعل المعجزات

من ذكرياتي اللي مش من زمان قوي
فيديو ملوش علاقة بمود النكد اللي فوق خااااااااالص



video


اليوم:من ايام شهر سبتبمر2006

الشخصيات

  • احمد عيسي اللي هو أنا..مهندس بيتعلم سواقة جديد
  • محمد حلمي اللي بيصور طالب في كلية طب وابن خالة أحمد وبيتعلم سواقة معاه
  • الحاج حمودة اللي بيعلمهم السواقة
  • اشخاص ثانويين

المكان: خلف كورنيش بورسعيد



الحدث:انتقال احمد لمرحلة هامة جدا في حياة اي واحد بيتعلم سواقة جديد..المرشديير

Saturday, August 25, 2007

Monday, August 13, 2007

ارغي يا عم الامووووووور

اكتشفت الفترة اللي فاتت حاجة لذيذة قوي
انا مصاب بمرض اسمه العصاب الاكتئابي الانبساطي
طب والله فرحت قوي قوي...لولولولولولييييييي
ال انا ناقص
عارفين لما الواحد يبقي مبسوووط قوي وبيضحك ويهزر
يشوف الدنيا منورة قوي
خطواته واثقة بتدب في الارض...عينه بتلمع..ضحكة ثقة في وشه
وفجأة
الدنيا تسود زي هجوم السحاب الرمادي علي نور الشمس في نوة شتا مفاجئة
يتخنق ويحس بتقل علي صدره
يبقي حاسس انه حتي مش طايق يشيل رجله من ع الارض
عارفين الاحساس ده؟؟؟
اهو هو ده بالضبط العصاب الاكتئابي الانبساطي
******************************
يا سبحان الله
اقرا الاهرام ولا الاخبار الاقي الدنيا حلوة قوي ومصر ام الدنيا وجميلة ومفيهاش مشاكل
كل الناس عايشة كويس وكل المرافق شغالة
وفكو الحزام فكو الحزام
اقرا الدستور وصوت الامة احس ان البلد بتغلي
مفيش مسئول مش بيرتشي
مفيش قسم بوليس مفيهوش تعذيب
مفيش واحد في السلطة مش بيعمل مؤامرة
جالي اقتناع غريب ان في مقالات جرايد فكو الحزام دي بيبقي ناقصها جملة لازم تتكتب
مراسلنا في كوكب الارض!!!!
******************************
صحيح حد شاف مسلسل ليلة القبض ع البلكونة؟؟؟؟
ده مسلسل اجنبي جامد جدا لسة حينتجوه قريب ان شاء الله
بيتكلم عن بلكونة سيكو بتموت المصريين في لندن وسكوتلانديارد بجلالة قدرها مش عارفه تقبض عليها
والبلكونة السايكو دي عاملة زي القتلة المتتابعين بتوع امريكا اياهم اللي تلاقي الواحد فيهم ماشي بعربية فان طول الليل عشان يموت البنات اللي شعرهم اصفر
او الرجالة الزنوج
او تلاقيه مثلا مش بيموت حد الا يوم تلات او بيقول ان نداء الرب قاله انه يموت 41 تشكيلة رجالة علي اطفال علي ستات وبعدها يرمي نفسه من ع الجبل
البلكونة دي مش بتموت الا المصريين اللي ناويين يكتبو مذكراتهم وينشروها
وطبعا البلكونة دي في قمة العبقرية انها تخدع بوليس زي سكوتلانديارد اللي بيقبض ع المتهم من بصمة دخان سيجاره مارلبورو
بصراحة بقي المصريين هم اللي غلطانين
يعني خلاص كانت الدنيا ضاقت بالليثي ناصف قائد الحرس الجمهوري ايام عبد الناصر والسادات انه يكتب مذكراته في لندن؟
ولا سعاد حسني اللي انتحرت كانها فوق منط حمام سباحة ولاقوها بعيد عن البلكونة السايكو بعشرين متر؟
ولا اشرف مروان اللي الموساد بجلالة قدره معرفش يوصله وكان قاعد مجعوص في البلكونة السايكو اياها ال عامل بيتعالج ال ؟؟
لا وايه كمان دي بلكونة قادرة وواصلة وجبارة
دي احتمال كمان تكون هي اللي رمت دودي الفايد بعربيته بسواقه بالاميرة ديانا ولفقت التهمة للعمود الغلبان اللي العربية خبطت فيه وزمان سكوتلانديارد قابضه عليه ظلم دلوقتي وبتحاكمه علي جريمة مرتكبهاش
******************************
ماما الحكومة عايزة تحول مصر كارت مش خط
ده اللي جه في بالي وانا راكب تاكسي النهاردة سمعت السواق بيتكلم مع محصل كهربا علي نظام جديد حيخلو فيه الكهربا بالكارت
وطبعا عشان انا كنت لسة صاحي من الكهف وخايف العملة اللي معايا متعجبش السواق مسألتش وسبتهم يتكلمو
يعني اذاي كارت كهربا؟
يعني لو انا شحنت الكهربا بكارت والكارت خلص الدنيا تظلم؟؟
ولا حلاقي العداد بيقول لقد نفذ رصيدكم وخلي بقي الظلمة تنفعكم؟
المهم ان واحد دخل في الحوار وقال ده كمان الميه حيخلوها بكارت
يا نهار ..ملوش لون؟؟؟؟؟
الميه كمان بكارت؟؟؟؟؟؟؟
هو احنا كنا لاقيين الميه عشان يعملوها بكارت؟؟
ده انا حتي سمعت وانا في الكهف ان في تورة عطشي في مصر وان مرافق المياه بتنهار رغم التأكيدات ان كله تمام والميه مغرقه الدنيا ده احنا حتي عايزين نعمل ترشيد للميه اللي بالهبل اللي مش عارفين نوديها فين
طب افرض الشبكة وقعت وانت الصابون مغرقك تحت الدش
تستني بقي لما حد ينزل ويجيب كارت ويشحن؟؟
ولا ممكن تشحن ع الهوا اسرع عشان الصابون ميعميش عينيك وتروح المستشفي متلاقيش معاك رصيد في كارت العلاج؟؟؟
كنت قريت علي ان استهلاك الاسرة المصرية في الانترنت 2 جيجا بس في الشهر عشان كدة ماما الحكومة حتعمل كارت نت فيه 2 جيجا بس حجم تبادل معلوماتي (يعني داونلود وابلود وكاش وكوكيز بينزل عندك ع الجهاز) ولو زودت تجيب كارت زيادة رصيد الجيجا بــ8جنيه
زي الـ800 مكالمة المجانية فاكرنهم بتوع المصرية للاتصالات اللي مكنش حد بيعرف بيروحو فين ولحد دلوقتي تلاقي في بند مكالمات زيادة يعني زيادة عن الـ800 اللي اتلغو اساسا
شفتو بقي ماما الحكومة خايفة عليكو اذاي
يعني بدل متسهر انت وهي ع النت تعملولكو حاجة مش مفيدة زي اي بحث عن اي كتاب محترم ولا حاجة تساعدك في الدراسات العليا مثلا مثلا تقوم تنام احسن عشان تصحي بدري
لا وايه كمان دي حتعلمكو اذاي تستفيدو بوقتكو ع النت وتعملوحاجات مفيدة زي الشات وتنزيل الاغاني الهادفة زي العنب والخضار لان الاغاني الوحشة التانية مساحتها كبيرة وحتخنقك
صحيح يعني ايه احتياجات الاسرة المصرية في استهلاك الانترنت... يعني قاسوها اذاي..وياتري عارفين الجيجا دي بتتاخد اذاي ولا حيجيبو حاجة ياخدو فيها؟؟؟؟
******************************
وانا في اولي اعدادي كان معايا واحد كان مهزئة الفصل
امعة وملوش شخصية من الشخصيات الباهته اللزجة اللي لما كنا نحب نضحك كنا بنوقفه ونقوله غني يا حجازي
وكان بيغني اغنية السد العالي ويقلد عبد الحليم حافظ
كبر حجازي وسمعت انه بقي شاعر..عادي
كبر وسمعت انه في حركة كفاية...عادي جدا
كبر وسمعت انه مسيحي من وهو عنده 16 سنة لأن السيد المسيح جاله في رؤيا في المنام وده خلاه يدرس المسيحية واللاهوت واقتنع تمام الاقتناع ان المسيحية هي الدين الصح وان الاسلام يدعو للارهاب وبيغرس جوه المسلمين الخوف والرعب من العذاب عشان كدة بيتعبدو غصب عنهم مش حبا في العبادة
اه انا بتكلم عن محمد حجازي اللي رافع قضية علي الدولة عشان يشهر مسيحيته هو ومراته وابنه
كان صاحبي وزميل دراسة
ومن معرفتي بيه غاوي شهرة وامعة وملوش شخصية ومش من النوع اللي له موقف اساسا في اي حاجة
بالضبط عامل زي عادل امام في شاهد مشفش حاجة..نفس الطريقة ونفس الطباع
السؤال اللي بيفرض نفسه
انجلترا او فرنسا مش فيها مسلمين؟؟
والمسلمين هناك اقليات؟؟
حد من مسلمي فرنسا طلب تعديل دستوري يمنع ان يكون الديانة الرسمية هي المسيحية؟؟؟
السادات قال قبل كدة انا رئيس مؤمن لدولة اسلامية
لا جدال في ان مصر دولة اسلامية وان المسيحيين فيها اقلية
بس مش اقلية مضطهدة
لا جدال في ان الدين عند الله الاسلام
وان جميع الديانات كانت تمهيد لنزول خاتمة الرسالات
الديانة الشاملة لجميع التعاليم والشرائع
لا جدال انه لا اكراه في الدين
من شاء ليؤمن ومش شاء ليكفر
الجميل بقي انه استشهد بالايه دي بالذات وقال ان الاسلام بيدي الحرية للانسان انه يكفر لكن ميديهوش الحق انه يؤمن بديانة تانية
اكيد شايفين حجم تفاهة التفكير...تفاهة كومبو حجم عائلي مش كدة؟؟؟؟؟؟؟؟
معتقدش ان الاسلام خسر كتير لما محمد حجازي ارتد عنه واعلن انه مسيحي
ومعتقدش ان حد مصدق المسلسل البايخ اللي بيقوله
اللي يسيب دينه عشان مش مقتنع بيه سهل يخون بلده عشان مش مقتنع بالنظام سهل يرمي مراته لو حد اقنعه بست تانية وسهل يرمي ولاده عشان مش مقتنع بيهم
ومش محمد حجازي اللي يستاهل الضجة دي