وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Saturday, June 16, 2007

انا جـــه..عود احمد يا عم احمد

لحظات من البوست السابق

القاهره..المدينة العجوز التي للاسف لا استطيع ان اشعر بيها..ربما شعرت بعبق الحسين الساحر..عبق الاهرام الخالد..الا ان ما اشعر به غير ذلك هوالشعور بالغربة والضاله..المكان الوحيد الذي يشعرني بما شعر به جليفر في بلاد العماليق..كائن ضئيل لايكاد يري ولا يشعر به احد...تكاد تري اهلها في حالة عدو مستمرة..ايقاع سريع متلاحق يشعرني بانني ثابت وكل من حولي يتحرك كأن من يقصد مكانا لو تأخر ثلاث ثوان فقط لن يجده وبالطبع فان (القاهره منورة بأهلها)..ولكن لن يضيرها ان تزداد اضاءة في الاسبوع المقبل..والسبب هو زيارة المبجل المفخم اعزه الله دوما صاحب هذه الكلمات -اللي هو انا يعني عشان الرخم اياه - لها في دورة تدريبية لمدة اسبوع لها ذلك الاسم الرنان
دورة تدريبية في الكود المصري لانشاء الطرق وذلك في مركز بحوث الاسكان والبناء..ولذلك فلسوف يستقل المفخم المبجل اعزه الله دوما اتوبيس الساعة 5 صباحا لان الدورة تبدأ الساعة التاسعة صباحا في الدقي التي يعلم الله اين هي..عامة هي تجربة فريدة من نوعها وخبرة جديدة تضاف الي رصيد خبراتي التي تتنامي باستمرار




****************************************

نقطع برامجنا لهذا الصباح لنذيع عليكم هذا النبأ العاجل



هذا وقد عاد بسلامة الله الي ارض بورسعيد الباسلة السيد المبجل المفخم المهندس احمد عيسي يوم الخميس الموافق 14/6/2007 في تمام الساعة السابعة اعزه الله دوما وجعله زخرا لجميع طرق وجسور وكباري مصر المحروسة بعد رحلة استغرقت اربعة ايام


مارشات عسكرية...مارشات عسكرية..مارشات عسكرية


هاااااااااااااااا...هاااااااااااااااااااا..هااااااااااااااااااااااا


****************************************

سيادة المبجل المفخم اعزه الله دوما ماهو انطباعك عن زيارتك الاخيرة للقاهره؟


احم..في الواقع..كانت زيارة مثمرة جدا وأتت بنتائج ايجابية للغاية..وأشكر شعب القاهره الشقيق لحسن الاستضافة


سيادة المبجل..سيادة المبجل..أأ..ماذا عن التنقل داخل القاهره..هل واجهتك اي مشاكل في التنقل داخل القاهره خاصة مع الزحام الشديد والحر الخانق في الفترة الاخيرة؟


في الحقيقة انني لم اسع الي اي سيارة خاصة بل احببت ان اشارك الجماهير العادية وسائل المواصلات العامة وذلك للاحساس بمعاناة المواطن العادي..حتي انني لم اسع الي حراسة خاصة بل اكتفيت بان اسير منفردا وسط الجماهير


هاااااااااااااااا...هاااااااااااااااااااا..هااااااااااااااااااااااا


سيادة المبجل..هل من الممكن بالتصريح بتفاصيل زيارتك الاخيرة؟


هي تفاصيل لا تهم احدا..لكنه كان اسبوعا ممتعا للغاية..ولا أحب ان اطيل عليكم في تفاصيل كثيرة في ذلك المؤتمر القصير..الا اذا احببتم ان تقفوا خمس ساعات متصلة


ههههههههههه هههههههههههه هههههههههههههههههه


اشكركم جميعا ..الي اللقاء.الي اللقاء


****************************************
في أعقاب الزيارة الأخيرة التي هزت الرأي العام للمبجل المفخم المعظم اعزه الله دوما يسعدنا ويشرفنا ان يكون معنا في هذا اللقاء ليحكي لنا تفاصيل رحلته الاخيرة



كاميرا2لقطة كلوز...ابعدي كاميرا 4 سموث...كرين...هاتلي الباكجروند ميدان رمسيس




لما تبقي في القاهره وتحب تسأل حد...لازم تختار حد شكله من اهل القاهره..يعني شكله مستعجل وبيجري وطهقان ومش ناقص حد يوقفه عشان يسأله علي حاجة شايف انها تافهه اصلا..بكدة تضمن انه حيدلك صح عشان يخلص منك ولو ميعرفش حيقولك امشي لاخر الشارع واسال تاني


ولما يقولك امشي لاخر الشارع اوعي تفرح وتفتح حنفية الامل وتقول الدنيا بدات تحلو..لأن اخر الشارع بلغة اهل القاهره مش اقل من450 متر -يعني بالبلدي 450 خطوة تقريبا - ولما توصل اخر الشارع اسال حد تاني عشان يدلك لان المشاوير في القاهره مش بالساهل كدة


ولو ركبت اتوبيس متعملش بيه ولا باشا وتروح تقعد علي كرسيك زي مبتعمل في بورسعيد وتدفع الاجرة وانت نازل ..اولا لان لا السواق ولا الركاب فاضيين لجنابك عشان تنزل وتدور علي فكة وتحاسب..ولا الشوارع في القاهره تستحمل انه يقف لمدة اكبر من 6 ثواني علي اكبر تقدير..وعشان كدة بتدفع تمن التذكرة وانت ع الباب وبعد كدة تدخل جنابك تقعد مستكنيص علي كرسيك لحد متوصل وتقول للسواق بمنتهي الادب انك نازل


وانت داخل بقي تبقي مجهز الاجرة جنيه وعشرة صاغ..متستعبطش وتسأل ليه العشرة صاغ دي..متستعبطش وتدي السواق جنيه ونص عشان يديك الباقي ولا تديله جنيه وتقوله مجتش علي العشرة صاغ ولو اديته جنيه وربع متستناش باقي ولوقالك مفيش فكة بمنتهي الادب تروح علي كرسيك عشان توسع السكة للي وراك لانك لو وقفت شوية حتلاقي الاتوبيس اتحرك فجأة وسعادتك اتكبيت علي وشك ولا وقعت في حجر اي حد


وعلي فكرة متتوقعش ان الاتوبيس بيقف عشان تنزل..بيمشيك علي اقل سرعة تقدر تنط فيها منه وهو ماشي ولو وقفت واستنيته يقف واصريت علي موقفك وحقك الطبيعي انه يقف عشان تنزل حتلاقي شلوت في..ظهرك رماك من الاتوبيس عشان زي مقلنا الناس مش فاضيه لدلع جنابك


ولو نزلت المترو - ياعيني ع المترو - وانت راكب من رمسيس ورايح الجيزة مثلا..الدقي مثلا ..ولقيت الناس فوق بعض لدرجة ان واحد وشه لازق في الازاز بتاع الباب زي الافلام وقعدت تفكر ياتري حتدخل وانت واقف ولا حتنزل بين الرجلين عشان تلاقي لنفسك مكان وتدعي ربنا ان واحد بس ينزل عشان تاخد مكانه..وتحلق علي اقرب باب عشان تدخل منه..عادي جدا..افتكر انك في رمسيس..مركز الكون..اي حد بيروح اي حتة بيروح رمسيس..عشان كدة متستغربش لما تلاقي موجات التضاغط والتخلخل اللي قريت عنها شايفها قدامك زي فيلم متريكس وهي في الهوا اللي خارج مع الناس وفجأة تلاقي عربية المترو فاضية..يبقي ايه؟؟يبقي عادي جدا..انت راكب من رمسيس


ولو سألت واحد بجلباية اركب منين وقالك موقف عبود اسال تاني؟لييييييييييييييييييييييييييييييييه؟ لانك حتركب اتوبيس مفكوك لو فرمل حيتقسم بالنص وحتفضل واقف وبعد متوصل وتسأل سواق طيب بدقن بيضا علي موقف بورسعيد حيقولك...ياااااااااه انت ايه جابك هنا؟شوف بقي انت تركب المؤسسة - هي اسمها كدة - ومن هناك تركب المرج حتلاقي هناك عجل يوديك بورسعيد..اركب بقي المؤسسة في ميني باصات صاج مطبقة وسواق مغطي دماغه بشاش وقطن ومتعور - متسألش من ايه - وتلاقي جنبك مستشفي فخم اسمه مستشفي النيل وتركب من هناك المرج..متستغربش المشوار ساعة بالضبط..واوعي تفتكر انك حتلاقي العربيات قدامك وانت تختار منها ليييييييه؟قاعدة ال400 متر ياباشا انت نسيت؟..مفيش مشوار في القاهره اقل من 400متر..تنزل من ع الكوبري وتمشي لحد المترو الباكية التانية ان شاء الله عربيات بورسعيد وحمد الله ع السلامة

واللي يقولك ليه تركب من الترجمان مادام ممكن تركب من رمسيس عند السكة الحديد,,نط في كرشه وارميه ع الارض واقعد اضرب فيه بالشلاليت ولو لقيتها مش كفايه عضه في رقبته زي عمنا سبايك ولا انجل مصاصين الدماء الحلوين دول لاني قعدت اسبوع امشي من رمسيس للترجمان عشان ملقتش المكان السري الغريب اللي الناس بتركب منه من رمسيس علي بورسعيد

لكن في الاخر..كان اسبوع من امتع اسابيع حياتي بالرغم من اي حاجة حصلت..اتعلمت في حاجات كتير علي المستوي المهني والشخصي ..واهم درس اتعلمته اننا احنا اللي بنبني معابد كبيرة من الخوف والرهبة ونقدسها ونبجلها ونكبرها لحد متسيطر علينا

وحمد الله علي سلامتي ..وعمار يا بورسعيد

14 comments:

maha said...

سلام عليك يا احمد
حمد لله علي السلامة
:)
...
كان هذا حوارا مع المبجل احمد و اليكم التعليق علي الاحداث

من امام المارشات العسكرية اليكم مها تهنئ المبجل بسلامة الوصول
و تحيي حضرتكم اكتر علي التواضع ...انسان متواضع يشارك الجماهير الحياه العادية بدون خوف الايدي الغادرة ... فلا يصاحبه الوفد الامني في شوارع القاهرة
معرضا حياه سيادته للخطر في سبيل عدم ازعاج الشعب القاهري

:)
,,,,,,,,,
واضح انك عانيت يا احمد من زحمة القاهرة و سرعة الحياه فيها
...
حلو اي موضوع العشرة صاغ دي و كويس انك مسألتش ايه لزمتها لان بقالها سنة و محدش فاهم هي موجودة ليه
..
المشكلة اللي بتقابلني في الموضوع ده ان دايما الفكة تقع مني :(
بس الحمد لله حليتها ب10 صاغ ورق
:)
.....
المترو بالرغم من كل الزحمة اللي فيه بس تخيل لو كل الناس دي في مواصلات عادية .تفتكر كان حد هيعرف يروح شغله ؟؟؟
.....
الحمد لله انك رجعت بالسلامة
اهم حاجة انك تكون عرفت الطريق السري اللي بيوصل من رمسيس لبور سعيد عشان لما تنور القاهرة تاني
متسالش السواق الطيب بدقن بيضا

نورت القاهرة الفترة القصيرة دي و حمدلله علي سلامة الرجوع
و فعلا عمار يا بور سعيد
:)
سلام
مها

شيماء الجيزى said...

اتفق معاك بشدة
محلاكى يا بورسعيد

..........
فى حتت اركب من رمسيس دى
نط فكرشة اوى
انا قعدت ادور عليها
بقالى سنه
وبردو مبركبش غير من الترجمان
او الماظه
شوفت الترجمان الجديد
بقى ايه ولا كلمه
..............
اتعلمنا كتير يا احمد
ولازم نتعلم ولا ايه؟
يلا سمدله على الحلامه
ولونها متأخره
بس اهو
سلامات بقى

Anonymous said...

ياسلام عليك يا أحمد لما تحبكها
ايه المشكله يعنى
انا العادى بتاعى انى بامشي يوميا اكتر من 5 كيلومتر
اعتبرها رياضه مفيده
احسن حاجه انك ماتسألش حد أصلك مستحيل تقابل حد يقولك مش عارف
وتبص تلاقى دار الافتا بقت حواليك
انت تبقى تجيب خريطه معاك احسن
عموما حمد لله على سلامتك
كايرو نورت بيك
ياريت تبقى تقولى هى فين الترجمان دى
انا بقالى 8 سنين عايشه هنا ومش عارفه هى فين
:P

فوكيره said...

حمد لله على السلامه يا احمد
بقالى كتييييير مجتش هناا

القاهره --مكان مجنون وغرييب
اصيل ومش اصيل بيجمع كل متناقضات الدنيا
الواحد لو راح هناك مشوار بيتعلم منه فما بالك باسبوع
وما بالك بالي عايشين فيها

يلا اهى بردو حته من بلدنا

نشكر سياده المبجل المعظم المفخم
وكل الحجات الكتير الي في الدنيا
على البوست ده

Ahmed EIssa said...

ياااااااه
بقالي كتير مقعدتش القعدة دي ارد ع الكومنتات
وحشتوني بجد ووحشتني القعدة دي
ونقووووووووووووول الو
مها:الله يسلمك يا مها
جبتلك شيكولاته علي فكرة لما جيت
قعدت ادور يامها علي سفارة بورسعيد في القاهره ملقتهاش
الشعب القاهري شعب شقيق ومكنش ينفع ازعجه بمواكب وبتاع..كفايه المواكب التانية
الحمد لله قعدت اسبوع هناك اتعودت علي الايقاع السريع واول مجيت بورسعيد نمت ورجعنا تاااااااني للهدوء والراحة والمشي بالراحة
سيبك بورسعيد دي نعمة
عرفت بيركبو منين من رمسيس اخيرا اه والله والمكان كان قريب مني قوي ورحته قبل كدة بس الغريب اعمي بقي
مش محتاجة اوصيكي تيجي تاني

شيماء الجيزي:الله يسلمك
شفتي الترجمان الجديد
هو اسمه اساسا ميناء القاهره البري سامعه يا وينكي؟
انا مقدرش اوصلك بالضبط هو فين..بس هو ورا رئاسة حي عابدين لاخر الشارع بطريقة شعب القاهره الشقيق انا كنت بخرم من حتة اسمها مقار
معتقدش ان بنوتة زيك ممكن تمشي في المكان ده
اه سوري انا بكلم شيماء.زطب مش تستني يا وينكي انا جاي خروح فين
بصي لحد مموت وانا بتعلم..انا مش مغرور لدرجة اني اقول اني مش بتعلم
صحيح مها قالت نقطة مهمة ان الناس دي كلها لو كانت في مواصلات عامة مش مترو كان الوضع حيبقي اذاي؟
سؤال نرفعله القبعة
يوووووه
الله يسلمك يا شيماء ومش حوصيكي باخوكي الغلبان

وينكي:انتي تمشي 5 كيلو براحتك انا امشي 5 كيلو ليه في عز الحر
يابنتي دي بورسعيد كلها متجيش 5 كيلو
طب والله مفي مشوار في بورسعيد بنزل قبله بساعة دي ابدا
يلا..استني هنا امشي كمان بخريطة؟هو انا في صحراء النقب
الحمد لله اتعاملنا مع الموقف..بس الناس هناك خلقها ضيق شوية
الترجمان بقي اسمه مينا...انا قلت الكلام ده قبل كدة؟حاسس اني قلته
الله يسلمك وعقبال متنوري بورتسعيد

جوسي:وايه اللي خلاكي بقالك زمان متجيش؟جايز عشان كنا قافلين للتجديدات المعنوية ..ابقي تعالي علي طول..بصي احنا بنرش ميه علي الساعة 7 الصبح ابقي تعالي بعدها عشان متتبهدليش من الميه
لالالا متشكرنيش ده واجبنا يابنتي
والقاهره انا حسيت فيها فعلا باحساس غريب قوي وانا سايبها
زي مكون...سبت قلبي هناك
ابقي تعالي متتاخريش..عملتي ايه في الامتحانات صحيح؟

buffy said...

bgd ya ahmed motwad3 gdn welcome back ya m3lm

أحمد سلامــة said...

حمد الله عالسلامة يا ابو حميد
يل راجل طب كنت قوللي
معلش بقى
المهم انك اتبسطت
نفسي ومنى عيني ان حد يجي القاهرة مايشتكيش من المواصلات
مش ممكن فعلا المشكلة متسرطنة في القاهرة عن اي بلد تانية
الحمد لله انك رجعت بورسعيدك الجميلة بالسلانة
وانشاء الله المرة الجاية تكون حفظت التنطيط ده

Ahmed EIssa said...

بافي:الله يسلمك..متواضع..مين قال؟انا المبجل المفخم اعزه الله دوما!!

احمد سلامه:والله يابوحميد انا كان نفسي اقول للناس كلها علي الاقل كنت لقيت حد ينجدني !!
شئ طبيعي ان 15 مليون واحد بيتحركو مع بعض في نفس البلد..كويس ان فيه هوا مكفيهم اساسا مش مواصلات..
المرة اللي جايه؟يابني انا لو كنت قعدت يومين بس كان زماني المحافظ
شرفتني يابوحميد..ابقي تعالي

فوكيره said...

الامتحانات ميه ميه جلالتك يا فندم

زحل الفلكي said...

حمد لله على السلامة يا ابو حميد
معلش جت متأخره شويتين ثلاثة بس انت عارف بقا 3 لسه واخد افراج من حوالى 4 ايام بس
وطبعاً في خلال ال 4 ايام دول بتخلص كل اللي كان المفروض يخلص في 4 سنين

عامة حمد لله على السلامة
وبشرك اني بسعي لمثل هذا الاسبوع
وادعيلي بقا

اه على فكره انا لما فكرت اسأل في مصر
كنت حاطط في دماغي امشي من معرض الكتاب للحسين
من غير معرف السكه
وعملتها يا باشا
ال 400 متر ال
قول 4000 كيلو
:D:D:D:D

محض روح said...

حمدالله على السلامه

احنا الدنيا عندنا زحمه فوق الارض وتحت الارض
بس انته قولت حاجه استغربتها
هو انته ممكن تسأل
وميتوهكش
احنا عندنا الافتاء ده مزاج
انا عمري مسئلت حد وقالي معرفش
لزم يتوهني الاول

على العموم اديكي خت خبره
تحياتي

Ahmed EIssa said...

جوسي:كويس انك طمنتيني عليكي ياجوسي..انتي عارفه انا بحب اطمن علي الرعايا دايما خصوصا لما انشغل عنهم فترة

كتاتني:الله يسلمك يا كتاتني..الله يكون في عونك انا عارف انك لسة خارج من امتحانات..الف سلامة عليك المهم ..انت
كويس؟
طب انت مشيت من معرض الكتاب للحسين بمزاجك...يعني محدش توهك..شوف بقي لما واحد يوديك عشان تركب من موقف غلط وترجع تاني
بس سيبك..الحركة حلوة برضه..عشان كدة انت خسيييييييت بقي..ياعيني؟من الحسين لمعرض الكتاب؟
ابقي تعالي ياواد ده بيت عمك ها..

محض روح:ياااااه طب والله ليكي وحشة
ايه يابمني يعني عشان غبت شوية تنسيني
كدة؟
الله يسلمك ياستي
بصي الناس هناك مش فاضية.زيعني لو واحد ولا واحدة وقف عشان يسالهم لازم يخلصو منه في السريع..افتاء بقي ولا مش افتاء..بس حقيقي هناك الكل بيفتي
تشربي شاي؟

gogo we bas said...

الى الاستاذ العظيم المبجل..... اطال الله عمره.. الاستاذ احمد عيسى


الله يطمنك يا شيخ.. مش البوست ده قديم بس عيب قوى اعدى عليه وماردش

اللى بتكلمك دلوقتى.. هت.. والله ماقدرة انطقها
هتروح القاهرة الشقيقة من بعد بكرة ولمدة شهر كامل كورس

ولحسن حظها العظيم انها مانزلتش القاهرة قبل كده غير مرة .. امبارح وجربت شوية حاجات من الحاجات اللذيذة اللى انت بتحكى عليها من الصبح

فحبيت اقولك بس.. الله يطمنك

gogo we bas said...

اه... بالمناسبة..هو الركوب من رمسيس ده مستحيل ولا حاجة؟؟؟


اصلهم برضه قايلنلى اركبى من رمسيس اسهل .. ايه اللى يوديكى الترجمان؟!! مش بقولك طمنتنى

بس كويس ادينى عرفت حبة معلومات عشان الصدمة ماتبقاش شديدة قوى

ربنا يستر