وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Sunday, June 10, 2007

حواديت وحبة حبشتكانات


أقطع سلسلة النكد والعكننة المسماة فضفضة والتي أعلم جيدا انها ستستمر لفترة لا بأس بها - كان الله في عون الجميع
وذلك للعودة الي محاولتي لأكون اجتماعيا اعشق الزحام والتهاني وما الي ذلك و...ده معناه من الاخر ان البوست ده فيه شوية اعلانات علي طلبات علي دعوات علي حبشتكانات كتير محدش يزهق بقي.. ...ساعات الكلام بالفصحي بيخنق علي فكرة لولا اني قررت من فترة اني احسن لغتي العربية لاني ظبطت نفسي مرتين تلاتة بحلم بالانجليزي..اه والله..ربنا يخليلنا بقي الام بي سي اكشن
نبدأ بقي في السريييييييع



ادعوا لمنة


اكثر ما أعجبني في تلك الحملة هي ان منة قد اصبحت رمزا لجميع طلبة وطالبات الثانوية العامة التي يخوضون امتحاناتهم هذه الايام..من الصعب الا يكتمل الدعاء لمنة ولجميع دفعتها من الثانوية الازهرية وغير الازهرية,كما أعجبتني الفكرة نفسها..ولهذا تحياتي لجميع من نظم تلك الحملة..ودعواتي لمنة ولجميع دفعتها بالنجاح والتفوق ان شاء الله
وطبعا لا تنسوا جميعا ان تدعوا لمنة ولتخلصوا الدعاء..عندها عشرين مادة يا اخواننا واحنا امتحنا 5 مواد بضرب النار..ربنا معاكي ويوفقك




طلب هام جدا جدا جدا



أخوكو- اللي هو انا عشان انا عارف اللي قاعدلي وبيغلس عليا علي طول وحيسألني مين ده -ملول لاقصي حد..واللي متابع اكيد ملاحظ اني ميعديش شهرين الا لما اغير التيمبلات ..واقعد شوية واغيره تاني..انا طبعي كدة دايما احب التغيير
المهم اني كل مرة تضييع مني لينكات وازعل قوي اني معرفش اجيبها تاني..ونظرا لاني حغيب اسبوع كامل...رجاء شخصي من مدون غلبان -برضه اللي هو انا -اللي ييجي ياريت يحطلي لينك المدونة بتاعته..ده معناه ان اللي ييجي يحطلي لينك مدونته في التعليق بلاش كسل..وانا لما اجي ان شاء الله حلف علي كل مدونة وحعلق بالونة كبيرة عليها شكر لكل بلوجري وبلوجراية حطلي لينك مدونته





مليش حظ معاه







من 30/1 اللي فات وانا بحاول احضرله حفلة..وكل ميعمل حفلة يطلعلي عفريت من تحت الارض يخليني معرفش احضر..واخر حفلة عملها في الساقية مع فرقة صبا كانت يوم 3/6 كان اول يوم في كورس المنحة اللي شكله مش حيعدي علي خير وكان نفسي فعلا اروح
المشكلة اني عارف ان صوته حلو..وعارف ان حفلاته حلوة..وعارف ان علي الالفي من الاصوات اللي فعلا مش حتتكرر..ومن البني ادمين اللي مش حتتكرر -طبعا انا مش حقول ده مدح ولا ذم
علي العموم انا سامع طراطيش كلام انه حيعمل حفلة في شهر 7..نداء انساني يا عم علي لأخوك الغلبان ابعد عن يوم الاحد والثلاثاء والخميس لو في النصف الاول من الشهر واي يوم يارب حتي يكون يوم جريس في اي اتمون في الشهر لو في نص الشهر التاني
صحيح زي المثل مبيقول بعد العيد ميتفتلش كحك...وعشان انا فعلا مش فاكر انا قلت ولا لا فأنا حقول تاني..كل سنة وانت طيب ياعلي وعقبال منحتفل بعيد ميلادك المتين...او ذكراك الله اعلم بقي



وفي فقرة التهاني باعياد الميلاد احب اقول لاختي الصغيرة..مها..الكلام نوعان..كل سنة وانتي طيبة ...وطبعا عيد ميلادها كان من قرن برضه..بس طبعا انا صاحب الذوق كله ..وكنت مجهز بوست جميل عشان عيد الميلاد الجميل ده بس منشرتوش لاسباب مش فاكرها..علي العموم الرسالة وصلت خلاص..كل سنة وانتي طيبة يا مها وربنا يخليكي لينا تملي حياتنا ضحك وضحك وضحك
****************************
واضاءت سماء القاهره


القاهره..المدينة العجوز التي للاسف لا استطيع ان اشعر بيها..ربما شعرت بعبق الحسين الساحر..عبق الاهرام الخالد..الا ان ما اشعر به غير ذلك هوالشعور بالغربة والضاله..المكان الوحيد الذي يشعرني بما شعر به جليفر في بلاد العماليق..كائن ضئيل لايكاد يري ولا يشعر به احد...تكاد تري اهلها في حالة عدو مستمرة..ايقاع سريع متلاحق يشعرني بانني ثابت وكل من حولي يتحرك كأن من يقصد مكانا لو تأخر ثلاث ثوان فقط لن يجده
وبالطبع فان (القاهره منورة بأهلها)..ولكن لن يضيرها ان تزداد اضاءة في الاسبوع المقبل..والسبب هو زيارة المبجل المفخم اعزه الله دوما صاحب هذه الكلمات -اللي هو انا يعني عشان الرخم اياه - لها في دورة تدريبية لمدة اسبوع لها ذلك الاسم الرنان
دورة تدريبية في الكود المصري لانشاء الطرق
وذلك في مجمع بحوث الاسكان والبناء..ولذلك فلسوف يستقل المفخم المبجل اعزه الله دوما اتوبيس الساعة 5 صباحا لان الدورة الساعة التاسعة صباحا في الدقي التي يعلم الله اين هي..عامة هي تجربة فريدة من نوعها وخبرة جديدة تضاف الي رصيد خبراتي
التي تتنامي باستمرار
*************************************
وأخيرا..منذ انتكاستي السابقة وابتعادي عن التدوين فترة تقارب من شهر فقد حان وقت الاعتذار..الاعتذار لجميع اصدقائي في ذلك العالم الرائع والذين قصرت جدا في متابعة اخبارهم واعمالهم...وشكر لكل من تابعني علي مدار الستة اشهر السابقة..كل من اسهم بكلمة في تعليق...كل من عبر وقرأ ولم يعلق..كل من وقف بجواري في المحنة الاخيرة..لهم مني كل التقدير والشكر والاعتذار
مازلت في تلك المرحلة الانتقالية وعدم الاستقرار..مازلت اشعر بانني اصبحت غريبا علي ذلك العالم بعد ان امسكت معظم مفرداته..لكني في تحسن..كما قلت في بوست سابق انا قادر علي فعل المعجزات..وبالفعل انا كذلك..ولكني احتاج الي تلك العصا السحرية..الصبر..لن يأتي كل شئ كما اتمناه اذن فلأعطه بعض الوقت
هناك مفاجأة ما اعد لها منذ فترة وسوف اعلن عنها بعد عودتي من الدورة ..هناك العديد من الكلمات تبحث عن منفذ لها تتخبط في رأسي..بوستات لها عناوين رنانة مثل وداعا بحر البقر..وفلاش باك..اعلان؟بالطبع هي مدونتي وهذا كلامي فلم لا اعلن عنها طالما
قادر علي ذلك؟

3 comments:

DAVUTKURKUT said...

In the name of Allah, the Beneficent, the Merciful. Say: He, Allah, is One Allah is He on Whom all depend. He begets not, nor is He begotten. And none is like Him.

maha said...

سلام عليك يا احمد
ياااه بقالي زمن مجتش هنا ...
بقي بتحلم بالانجليزي
ايه ده ؟؟؟طب فيه ترجمة ؟؟؟
:)
.........
اللينك بتاعي؟؟؟؟
انت نسيته ؟؟؟
ماااااااااشي
مش قايلاه
هه
........

مع انك كنت خرجت من مود المدونة ذات اللون الاسود ...ليه بس رجعنا تاني ؟؟؟
...
ربنا يسهل و تضبط مواعيد حفلة علي معاك و ان شاء الله نحضرها كلنا
....
كل سنة و مها اختك طيبة و عقبال مليون سنة
.........

"و السبب هو زيارة المبجل المفخم اعزه الله دوما "
اد ايه واثق في نفسك
:)
...
فعلا القاهرة نورت يا احمد اهلا بيك ...علي فكرة ..كتير فعلا بحس اني ضايعه فيها و الناس تحسهم بيجروا و تعبانين او الصبح تحس ان مع انهم ماشيين رايحين شغلهم بيكونوا الي حد ما لسه نايمين
...وتيرة الحياه فيها سريعة اوي ..يا تري اتعودت عليها و لا لسه ؟؟؟
.........
..
ربنا يعينك يا احمد و ان شاء الله ترجع لقواعدك سالما في بور سعيد و ان شاء الله تتحسن احوالك و نفسيتك
ربنا معاك و ان شاء الله مش هيضيعك
خلي هدفك دايما قصاد عينك و علي بالك
ربنا معاك
سلام
مها

علي الألفي said...

واد يا احمد
ما تزعلش قوى كدة
انا عرفت خلاص معاد الحفلة الجاية
و هى اللي مش هاعغذر اى حد مايجيش فيها
الحفلة هاتكمون يوم 5/7
و على فكرة هو يوم خميس
و انت تقدر تغيب يوم من الكورس مش مشكلة
و على فكرة عايز اقوللك ان مش اى حد الساقية بتديله يوم الخميس كدة
يعني الموضوع كبير و لا زم تييييييييييييجييييييييييييييييييييييييي