وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Thursday, June 02, 2011

تاج الثورة...كاميكازي النكهة



ين كنت أثناء مظاهرات 25 يناير؟ 
الصبح كنت في الشغل...رجعت فتحت الجزيرة عشان اتابع اللي بيحصل في التحرير خصوصا اني من بورسعيد وكنت حاسس الموضوع حيبقي كبير...طبعا بالليل انفعلت جدا بالناس اللي ماتت وتحول الهتافات من حرية وعدالة اجتماعية للشعب يريد اسقاط النظام...طبعا حياة اي واحد مات مش قليلة ومادام بقي فيها دم يبقي فيها دم علي حاجة كبيرة.

هل كنت تتوقع أن تؤدي هذه المظاهرات لثورة؟ 
الثورة بالنسبة لي بدأت يوم 28يناير...التظاهرات قعدت في مناوشات مع الشرطة والنظام لحد يوم الجمعة...طبعا الصورة كانت مختلفة تماما في السويس...في الوقت اللي كنا بنغني ياحبيبتي يامصر كان اهالي السويس في حرب طاحنة مع الشرطة وهم بيغنو
يابيوت السويس يابيوت مدينتي. استشهد تحتك وتعيشي انتي

ماذا فعلت وقت إنقطاع الإتصالات والإنترنت؟
انقطاع الاتصالات ماثرش كتير في بورسعيد...يمكن اثر معايا عشان كان ليا اصدقاء في التحرير كنت بكلمهم واطمن  عليهم وعلي اللي بيحصل هناك...التاثير الاكبر كان في انقطاع الانترنت لأن فعلا اقوي واكبر تنظيم سياسي وجهاز اعلامي ايامها كان الفيس بوك...الاخبار كانت بتجيلنا من التحرير مباشرة ولا اقوي محطة اخبارية في العالم وكان في تفاعل كبير بيننا.

ماذا كان رد فعلك بعد إعلان تنحي مبارك؟ 
جمعة التنحي11فبراير..بعد كل المناوشات مع النظام ظهر مبارك يوم الخميس في خطابه الشهير اللي رفع بيه ضغط الشعب المصري كله...يومها انا فاكر اني كتبت ستيتس علي الفيس بوك قلت  الراجل ده مش ماشي...نلم شنطنا ونطلع ع السعودية احسن يارجالة...افتكر ان الموضوع بالنسبة لي بقي ثار شخصي لما عرفت ان احمد اهاب زميلي في الكلية اتقتل...وكنت نزلت كذا مظاهره في بورسعيد يومها قررت اني انزل ومش راجع البيت الا لما يتنحي ..لميت اصحابي ونزلت عند المسجد التوفيقي اللي كان حيطلع منه المظاهرة..الكوميدي بقي في الموضوع اني ملقتش حد خالص كاني لوحدي نازل المظاهره انا واصحابي..لمينا بعضنا بقي ورحنا علي كافي اتغدينا بره وقضينا اليوم..في الكافي كانو فاتحين العربية وكان فيها خبر عن بيان من قصر الرئاسة بعد قليل..وزي متعودنا بعد قليل دي يعني ساعتين تلاتة بس كنا قاعدين علي اعصابنا...افتكر يومها برضه كان في الكافيتيريا ظباط شرطة بلبس ملكي حاطين سلاحهم الميري ع الترابيزة قدامهم والمنظر استفزني جدا لدرجة اني كنت حتخانق معاهم لولا الناس اللي في الكافيتيريا واصحابي هدوني...ظهر عمر سليمان بطلعته البهية وقال في بيان لم يتعد 40ثانية

بسم الله الرحمن الرحيم"
ايها المواطنون، في هذه الظروف العصيبة التي تمر بها البلاد، قرر الرئيس محمد حسني مبارك تخليه عن منصب رئيس الجمهورية وكلف المجلس 
الاعلى للقوات المسلحة ادارة شؤون البلاد، والله الموفق والمستعان. 

كانت فرحة مابعدها فرحة...اتنطتت في الكافي وانا بصرخ..اخيرا اتنحي..اخيرا اتنحي..وسجدت سجدة شكر 
لربنا..كانت فرحة محستهاش في حياتي قبل كدة...قلت لنفسي اخيرا بقي لينا كرامة و صوت

ما شعورك تجاه إستمرار وجود مبارك فى شرم الشيخ؟ 
متغاظ...ودمي محروق...الراجل ده بقي مواطن عادي علي درجة رئيس سابق...زيه زي اي مجرم...ومتهم بقتل المتظاهرين والفساد السياسي والتربح وجرايم الواحدة منها بس تخليه يتدفن حي مش يتسجن بس...حاسس ان المجلس العسكري بيجامله والقضاء بيجامله وده بيشيل من الثورة اهم مافيها..العدالة...شرعية الثورة بتقول انه يتحاكم...والسؤال اللي سألته وبيفرض نفسه ع الساحة الوقت لو كان الجيش اللي قام بالثورة وكان المجلس العسكري هو مجلس قيادة الثورة كان مبارك وكل الفاسدين دول متحاكموش للوقت؟؟
افتكر اني قريت عن شاوشيسكو وان الشعب لما قام عليه اعدمه في ميدان عام...رغم تمسكنا بمبدا الثورة البيضاء لكن ميجيش الوقت ان مبارك يماطلو في محاكمته ويضغطو علي صبر الشعب قوي كدة في الوقت اللي المدنيين والمتظاهرين والاعلاميين اللي بيقولو كلمة حق بيتحولو للنيابة العسكرية والمحاكمات العسكرية والحكم بيطلع في وقت قليل بكتير..فعلا اداء المجلس العسكري والنائب العام موضع شك ومساءلة في الموضوع ده

هل إتفاجئت بحجم فساد النظام السابق؟ وضح؟ 
هو الواحد كان عارف ان في فساد بس مش للدرجة دي...كل يوم بتفاجئ...في الوقت اللي اكتر من 70%تحت خط الفقر تسمع عن مليارات الدولارات وملايين الامتار من الاراضي المنهوبة...ده غير الفساد السياسي...والاعلام ..والصحافة...البلد دي كان فيها طاعون بينخر في جسمها لحد مابقي الجسم متاكل وبالي وشكله وحش...مع اول قرص مضاد حيوي فاق بس ده ميمنعش ان المرض لسة بيقاوم وفترة العلاج حتبقي كبيرة والنقاهه حتبقي اكبر.
 


هل غيرت الثورة شئ ما فى داخلك؟
 كتير...تخيل واحد دايس علي رقبتك وكابتك ومعيشك في خوف اكتشفت فجاة انه عامل زي البيضة..قشرتها رقيقة قوي بس انت اللي خايف تكسرها...لما كسرتها كسرت حاجز الخوف اللي جواك قبل اي حاجة...كمان بقيت متابع اكبر للساحة السياسية وقريت كتير عن نظم الحكم والقانون والحقوق المدنية...بعد الثورة قررت محدش يضربني علي قفايا تاني لان معتش في خوف خلاص
كمان حسيت بالمسئولية...البلد دي جيلنا اللي في ايده يخليها دولة عظمي...البلد دي المفروض تقوم علي كتافنا احنا وده والله ماهو كلام انشا..ده حقيقي...كفاية قلق كل واحد وهو رايح يدي صوته في استفتاء تعديلات الدستور و ...حاسس ان صوته حيفرق..كانت اول مرة ادخل لجنة انتخابات بالمناسبة

هل لديك تفسير للإنفلات الأمني؟ 
الانفلات الامني عملية ابتزاز واضحة من قوات شرطة اكتشفت فجاة ان محدش عاملها هيبة ولا خايف منها زي زمان..ويانرجع زي الاول يا نسيبكو للحرامية والبلطجية بس علي مين...الشعب كله علي رنات دلوقت

مصر رايحة على فين؟ 
حستعير كلمة الساخر العظيم جلال عامر...اللي بيسال مصر رايحة علي فين مش يسال قبل مايركب الاول؟؟
مستقبل مصر في ايدينا..ياتمشي في طريق الدول العظمي...ياتنتهي الثورة بخلافات بين الليبراليين والعلمانيين والاخوان ونرجع نتقسم تاني ونثبت كلمة عمر سليمان ان ملناش في الديمقراطية...بلاش نشمت حد فينا...لازم نكون واعيين جدا للي بيحصل وللي بيحاول يثطاد في الميه العكرة واللي ميهموش غير السلطة وبس.

فى رأيك من هو " أحد قيادات الجيش " الذي يتصل دائماً ببرنامج (آخر كلام)؟!!!!ا 
هو احد قيادات الجيش...واضحة يعني

احب اضيف انا بقي اسئلة للتاج ده بعد اذن ياسمين يعني

كان شعورك ايه لما الجيش نزل يوم جمعة الغضب؟
من يوم الجيش مانزل وانا مش مطمن وقلقان...يوم مانزل قلت دي احكام عرفية وحظر تجول وشوية والشعب كله حيبقي في السجون العسكرية ومبارك حيحكمنا بالحديد والنار اكتر ما كنا...لكن اتفاجئت من موقف الجيش بصراحة...اتفاجئت في الاول واتغظت بعد كدة وحسيت انه في مقاعد المتفرجين خصوصا يوم موقعة الجمل والبلطجية اللي سارحة في الشوارع...بس ده ميمنعش ان الثورة قربتنا من الجيش اكتر وعرفنا انها مؤسسة الي حد ما محترمة وملهاش في العك اللي كان مالي البلد...وتعامل ظباط وعساكر الجيش كان راقي قوي...بقول كان لحد ماحنا اللي جرأناه علينا وبقت الشرطة العسكرية بتعتقل المتظاهرين وبتضربهم بالعصي الكهربية...ربنا يعدي اليومين بتوع المجلس العسكري دول علي خير لأن انا شايف فعلا ان اداؤه بقي مثار تساؤل

ايه اكتر صورة شايفها بتعبر عن الثورة؟؟

وايه الاغنية اللي اول مبتسمعها بتفتكر الـ18يوم بتوع الثورة؟؟
ازاي...محمد منير
صوت الحرية...هاني عادل

12 comments:

مصطفى سيف said...

كلنا نشاركك القلق منذ يوم 28 يناير حين دخلت الدبابات المناطق السكنية
وحين يتم تحويل مدنيين الى محاكمات عسكرية اعجبتني اجاباتك الوافية التي قد تضيء بعد ظلمة تلك المرحلة التي نقف عليها بين اضطرابات وخلافات تصل لحد التخوين
تحياتي

عمرو فكرى said...

حلو اوى البوست ده

بس (انا بحبك يا بلادى) مابتفكركش بالثورة؟

أحمد عيسي said...

مصطفي سيف:انا شفت علي محطة السي ان ان ان الجيش نزل قبل اي قناة عربية بنص ساعة تقريبا وساعتها مكنتش مطمن ولحد الوقت

عمرو فكري:بحبك يابلادي محبتهاش قوي..بيني وبينك مبحبش الاغاني المسهوكة ههههههههههههه

نورتوني يا جماعة...ياااه وحشني قوي الرد ع التعليقات

طالبة مقهورة ..درجة أولى said...

:)
حاسة اني منشكحة بكل حرف
لما بلاقي حد فاهم وبيقول اللي بفكر فيه بالظبط الفرق اني مش هقدر اعبر بالروعة ديه

عجبتني اوي
"البلد دي كان فيها طاعون بينخر في جسمها لحد مابقي الجسم متاكل وبالي وشكله وحش...مع اول قرص مضاد حيوي فاق بس ده ميمنعش ان المرض لسة بيقاوم وفترة العلاج حتبقي كبيرة والنقاهه حتبقي اكبر.
"
والله الواحد مش متخيل اصلا لو الثورة ديه مكنتش طلعت برانا كنا عملنا ايه..الحمد لله

:)

وجع البنفسج said...

اول زيارة للمدونة ..
استمتعت باسترجاع ايام وذكريات الثورة ..
قلوبنا كانت معكم ومازالت .. ربنا يعدي الايام على خير وتوصل مصر لبر الامان

تقبل تحياتي ان شاء الله من المتابعين

أحمد عيسي said...

:طالبه مقهورة درجة اولي
ياباشا ليا الشرف اننا بنفكر زي بعض...بس اعتقد اني عجوز عنك شوية...واضح ان مستوي تفكيرك عجوز زيي
نورتيني وشرفتيني وابقي تعالي بقي اللي بيدخل مدونتي مرة مش محتاج عزومة

وجع البنفسج:اللهم امين يارب يعدي بينا بر الامان
نورتيني

البِـئرُ والظمّأْ said...

yaah ya a7mad
fakr el 2l2 w el23da odam el tezeera 24 sa3a.w darb el nar f el shar3
w ana nzlto legan sha3bia be sakakeen

bgd kant aiam tganen

أحمد عيسي said...

فعلا كانت ايام حلوة...بس شكلها جايه تاني قريب يا زوزة...

قهوة بالفانيليا - شيماء علي said...

يوم 28 انا كنت مش قادرة افهم ايه اللي بيحصل في البلد
بس بطء مبارك و سخافة قراراته همة أكتر حاجة خليتني مؤيدة لمحو مبارك مش لإسقاطه بس
غير خطاباته الوحشة اوي
اللي معرفش اذا كان هو مدرك لمدة وحاشة و غباوة ما يقول و لا لأ !!
الحمدلله
فاضل البناء :)
إجاباتك للتاج فيها نوع من البساطة و الحميمية ..
:)
كوباية شاي بقى :)

أحمد عيسي said...

شيماء علي
بعد تفاعلات جامدة علي الفيس بوك مدونتي نورت بيكي ده اكيد

مفيش شاي...انا من عشاق القهوة انتي نسيتي ولا ايه

mohamed-hashem-mostafa said...

وصف دقيق ورائع للاحداث ياعيسي وكان تاريخ فارق بالنسبه للبلد

أحمد عيسي said...

هاشم حبيبي...زميلي في الكفاح والمظاهرات اللي مكناش بنلاقيها...فاكر يوم التنحي يا شيكا؟