وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Monday, February 18, 2008

25

ما اختلف هذا العام تحديدا عما سبقه هو معرفتي بكم الحماقات التي استطيع ان افعلها بمعدلات قياسية...اليوم ينتهي عاما صاخبا بجميع مقاييس الصخب مقارنة بعامي الماضي...ماقلته سابقا عن اقترابي من نفسي اكثر وتعرفي علي ما أريد تحقيقه وما انا قادر علي تحقيقه ومايجب علي تأجيله ربما اراه الان محض هراء...ربما امتلأ عالمي بالهراء دون ان اعي
********************
نفس عميق...دون اي علامات تعجب او دهشة...اليوم اتم عامي الخامس والعشرين...عادتي في ذلك اليوم ان يمر شريط في رأسي يحتوي اهم احداث العام..ربما لصخب هذا العام اعتبر كل احداثه مهمة...ربما صرت اكثر واقعية او اكثر يأسا..لكني مازلت اعلم ان بداخلي الكثير والكثير
********************
نفس عميق...ابتسامة هادئة...اليوم اتم عامي الخامس والعشرين فلماذا اليأس..ولماذا الاحباط...ربما لأني جنوني الطموح...متسرع مندفع تغلي دمائي بسرعة...احتفل هذا العام باصابتي باول حالة ارتفاع ضغط دم...ادماني القهوة والنسكافيه الي حد اقترب من حافة الحد الجنوني
********************
نفس عميق...ابتسامة واسعة..ذلك الشعور الغريب بأنك ابتعدت تماما عن عالم الطفولة البرئ والمراهقة الحالم لتدخل بخطوات مترددة الي عالم الرجولة الاسر الغامض..ربما مازلت تعتبر نفسك طفلا دخل عالم الكبار..يقلد مايفعله الكبار..الان انت رجلا يراك احدهم فيقلدك..لا بأس..ربما تري نفسك لست بمثل اعلي..لسة قدوة يشار اليك بالبنان...ماتغير في حقا في اول ايام العام الجديد هي رغبة التغيير..التمرد علي ما انا عليه
********************
اتذكر ماكتبته سابقا
ألا تكون أنا..فهذا جيد لانك حينئذ لن تعد الايام القليلة المتبقية علي انتهاء عامك الثالث والعشرين ..تحاول الا تنظر في تلك الورقة الحمقاء التي كتبت بها ما تتمني ان تحققه قبل ان تبلغ عامك الرابع والعشرين والتي تعلم جيدا انك لم تحقق منها سوي اقل القليل,عالما ان مالم تحققه سوف يملأ تلك الورقة الحمقاء الاخري التي تعدها لتعدد ماتتمني ان تحققه قبل ان تبلغ الخامسة والعشرين غير عالم اذا ماكنت بالفعل سوف تحقق ذلك او انك ستكتشف في سن الستين ان ما تمنيت ان تحققه قد اصبح مجلدات ضخمة من الاوراق الحمقاء
يبدو انني بعيد النظر بالفعل!!!
*********************
لا اريد افساد ذلك الهدوء النفسي الذي اعتبره من عداد النسبيات...ربما حان الان وقت الاحتفال

5 comments:

maha said...

سلام عليك يا احمد
كل سنة و انت طيب و بالف خير يا ب و السنه دي تحقق كل اللي تتمناه و نفسك فيه يا رب
اولا انا فرحانه جدا لان اخيرا بقيت رقم واحد تاني في التعليقات "الموضوع ده بيفرق معايا اوي :)"
المهم
ثانيا بقي يا سيدي
ليه كل الاحباط و اليأس ده ؟؟
ممكن مش كل حاجة انت كنت متوقع انها تحصل كانت في ساحة الواقع ..لكن اكيد السنة اللي فاتت عليك من عمرك مكانتش كلها كوارث و ضغوط منغير لحظات كان فيها ابتسامة او فرحة حقيقية ..
بما ان شريط حيات مر ادامك.. ليه شفت بس المشاهد اللي عشتها بحزن و احباط ؟؟؟
مفيش اي موقف فرحك ؟اي يوم حسيت انه اروع يوم عدي عليك في حياتك ؟
مفيش حتي يوم قلت اني اتعلمت فيه حاجة مهمة و زادت فيه خبرتي في دنيتي و لو بالقدر البسيط ..لكن اكيد في لحظة حبيتها او وقت كنت حاسس فيه انك مع نفسك مالك الدنيا كلها و انت مرتاح نفسيا شوية ؟؟
ااقولك ..ممكن تفكر تاني و حاول تجيب الورقة بتاعة احلامك اللي لسه محققتهاش ..متبصلهاش باحباط.. لكن هتلاقي حاجات منها متنفعش تتحقق و حاجات ممكن تتريق عليها لانها حصلت منغير ما يكون لك ايد فيها و حاجات تانية ان شاء الله تتحقق ..المهم بلاش تكون محبط و متضايق كده
اخر حاجة ..مش معني ان عندك 25 سنة انك كبير في السن ..فيه ناس كتير عندهم من عمرهم سنين طويلة لكن جواهم لسه عايشين بروح اطفال جميلة و فيه ناس صغيرة في السن لكن جواها هموم و الم و كأن عندها الف سنة ..
..
متضايقش يا احمد ..
enjoy your life ..enjoy every moment
كل سنة و انت بالف خير
سلام يا احمد :)
مها

lyssandra said...

لا اريد افساد ذلك الهدوء النفسي الذي اعتبره من عداد النسبيات...ربما حان الان وقت الاحتفال

بعد اللي انت قلته ده ومش عاوز تفسد الهدوء النفسي ؟ أمال لو مش هدوء نفسي كنت عملت ايه ؟

بص يا احمد بطل تبص للأمور بطريقة انا حققت ايه وانا ماحققتش ايه . انا عارفه ان الطموح العالي هوا اللي بيخلي الواحد يدور ايه اللي أنجزه وليه انجازه قليل او مش زي ماكان عاوز بس برضه لما تفكر بالطريقه دي هاتخنق نفسك ..
انا عن نفسي مافتكرش ف مره اني احتفلت بيوم ميلادي وانا مبتسمه ومرتاحه غير مرات قليله جدا وبصراحة مش فاكراها اساسا وده كمان قبل مافكر انا كمان في انجازاتي
السنه اللي فاتت دي - اخر عيد ميلاد يعني - كنت نفسي ماحدش ياخد باله من اليوم ده وكان نفسي اليوم يعدي وخلاص من غير مافتكر انه يوم عيد ميلادي
بس لقيت اخويا جايبلي سمكه .. اه والله
وفرحت بيها جدا رغم اني قبلها بشويه كنت باعيط من الاحباط
لكن شوف هديه صغيره اوي خلتني حسيت نفسي طفله وساعتها نسيت الدنيا
بلا انجازات بلا طموح ووجع قلب
فضلت قاعدة جنب السمكه ييجي كده كام اسبوع قليلين بس لغاية ماتاخد ع المكان

شوف .. الخلاصه يعني .. دوّر علي اي حاجه صغيره ترسم ابتسامه واسعه -من الابتسامات الحقيقيه مش التهكميه - علي وجهك وقول لنفسك كل سنه وانت طيب


كل سنه وانت طيب وبخير والسنه اللي جاية باذن الله تفتكر كل الكلام الكبير اللي انت قلته قبل كده وتضحك عليه

gogo we bas said...

لا يا راجل؟؟؟!!!!

ولزمته ايه الاحتفال بس؟

لا لا ماتجيش على نفسك بس
وفر وفر... ولا تورت ولا جاتوهات ولا حاجة خالص

الظاهر عليك بتهرب صح

على فكرة..
انا همنع تصدير الورق لبيتكم

وعلى فكرة برضه.. انت بدأت تحبطنى انا شخصيا.. حرام عليك يابنى انا لسه صغيرة

ماعلينا بقى

كل سنة وانت احسن من اللى قبلها يارب
وتكون دايما بخير.. قول امييين

momken said...

كل سنه وانتى طيب

فين بقى حتتين الجاتوة والحاجه الساقعه
وسندوتش الانشون والجبنه الرومى

مش عاوز اتقل عليكى واقولك وحجبات كنتاكى

هو انت هتم خمسه وعشرين كل وم ولا ايه

كل ربع قرن وانت طيب
ولا تحب اقولك مبروك اليوبيل الفضى

تحياتى

أحمد عيسي said...

مها:وعليكم السلام يامها
والله يابنتي انا عارف ظروف النت عندك...فين الواجب بتاع زمان لما كنتي بتبقي اول كومنت علي طول
بالمناسبة دوت سبوت كدة شكلها قفلت فور ايفر ...ماعلينا نرجع للكومنت بتاعك
السنة اللي فاتت كان فيها مواقف كتير قوي واحداث سعيدة انا مقلتش انها كلها كانت وحشة بس للاسف محققتش فيها كل اللي انا عايزه
ده ميمنعش ان فيها ايام فعلا ولحظات سعادة حقيقية
ميرسي ع النصيحة..حاضر ياستي

ليساندرا:لو مكنش فيه هدوء نفسي كنت ضربت نفسي بالنار..بس المسدس اللي عندي مفيهوش رصاص للاسف
محدش جابلي سمكة حلوة كدة تفرحني في عيد ميلادي...بصي في واحد اسمه السحيلي عندنا في بورسعيد في شارع اسمه اوجينا..بيبع رصاص وكدة..متخدمنيش في 6 رصاصات؟؟؟
وانتي طيبة ...وفعلا زي مقلتي...المشكلة في الطموح العالي..اعمل ايه بقي في نفسي مش بهدي!!!

هاجر:مهو انا محتفلتش اهو..مع ان كنت عايز احتفل احتفال جامد قوي والله..يلا بقي معلش
والله كنت حاطط صورة تورتة كبيرة بس متعملهاش ابلود البوست طلع اقرع كدة
وانتي طيبة...منورة دايما كدة..ومعلش اني احبطتك
امييييييييييييييين

ممكن:حبيب قلبي شكلك داخل تايه مش عارف بتكلم حد ولا حدايه بس ميرسي علي مرورك ووانت طيب وبخير ان شاء الله