وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Saturday, January 26, 2008

اعتذارات بالجملة


جوجو قالتهالي من الاخر
سؤال برئ واتمنى تجاوبه وماتزوغش من الردود كالعادة..امتى ناوى تخرج نفسك من المود المهبب ده
فكها بقي ربنا يكرمك

يوسف قالي وانا بتكلم معاه ع المسنجر
مفيش حاجة تستاهل يا صاحبي

مها قالت
انت ممكن تكون الكون كله لانسان بعيد عنك ..و ممكن ناس قريبة منك تكون بعيده عنك
ممكن تفكر تاني ..و اسال نفسك بهدوء ..هوانت فعلا لوحدك ؟

وحد اسمه مش مهم اسمي دخل ع الشات بوكس وقال
وافتكر ان فى ناس كتيييييييييييير اوى بتعزك ويمكن بتاخدك قدوه ليها واتعلمت منك حاجات كتير اوى افتكر اصحابك ووالدك ووالدتك اللى مستعدين يضحوا باى حاجه فى سبيل اسعادك وفرحك بذمتك حد يبقى عنده كل دول ويستسلم للحزن كده؟

وغالية قالت
ابعدي وخدي نفس عميق قولي انا اقوي من الالم واوعي تندمي علي مشاعر حلوة حستيها بالاحري اوعي تندمي علي الاطلاق وافتكري مالا يقتلني يزيدني قوة واوعي تحسي بوحدة واحنا جنبك
ده كلامك اللى كنت كاتبهولى فى بوست وقت ما كنت متضايقة وأنا كمان بقللك أوعى تحس بالوحدة واحنا جنبك
يلا بقى فك كدة يا بو حميد
وعشان ابقي صريح سؤال جوجو هو اللي صدمني بجد وفوقني لنفسي..امتي ناوي تخرج نفسك من المود المهبب ده؟

زي الصورة مبتقول انا تعبت اني اقول اسف من الحاجات اللي معملتهاش
وكتير قوي اعتذرت اني مش برد علي تعليقات في بوستات قبل كدة
بس المرة كانت قلة ذوق قوي اني اشوف حد قلقان عليا كدة وبيحاول يقف جنبي وانا مش برد عليه
عشان كدة بعتذر جدا اني مكنتش برد
مش تزويغ يا جوجو والله..بس مكنتش عارف اقول ايه..اللخبطة اللي كانت جوايا مكنتش مخلياني حتي عارف ارد
كل الردود كانت منطقية ولو كنت انا احسن كنت حقولها لاي حد
واعتذر طبعا اني مكنتش عارف اتابع كل اللي اتكتب الفترة اللي فاتت

عايز اعتذر علي حاجة تانية
اعتذر لاي حد كان شايفني في صورة معينة وانا اثبتله عكسها
اعتذر لاي حد انا خذلته من غير محس ولا اعرف

عايز اعتذر علي حاجة كمان
اعتذر لنفسي اني مش مديها حقها
اعتذر لنفسي اني شايفها في صورة اقل من اللي هي فيها
اعتذر لصورتي الشخصية اللي قللت من قيمتها جدا وبقيت شايفني صغير جدا في نظري ونظر اللي حواليا
اعتذر لاحلامي اللي أجلتها ونسيتها وسط حالة الاكتئاب اللي كنت فيها
افتكراسراء في بوست قبل كدة
احنا مابنتكسرش , احنا بنقع اه لكننا بنقوم تاني احنا زي طائر العنقاء لما بيتحرق, بنقوم من تحت الرماد أقوي من الأول
كل شئ بيتولد صغير وبيكبر الا الحزن والألم والغضب , بيتولدوا كبار وكل يوم بيصغروا عن اليوم اللي قبله
وافقنا او ماوافقناش هو بيحبنا , رضينا أو مارضيناش هو بيختارلنا الأحسن وبيعمله , يمكن بنبص لناس كتير وبنلاقي انهم بياخدو اللي عايزينه لكنهم بيرجعوا يندموا علي ده بعد كده ويقولو ياريتنا ماكناش اخدناه, وياريت اللي اتمنناه مكنش اتحقق
الموقف اللي كتبت له البوست ده يمكن شخصي شوية لكن الكلام نفسه في العموم قعد يرن في دماغي كتير قوي الفترة اللي فاتت
احنا مابنتكسرش , احنا بنقع اه لكننا بنقوم تاني احنا زي طائر العنقاء لما بيتحرق, بنقوم من تحت الرماد أقوي من الأول
احنا مابنتكسرش , احنا بنقع اه لكننا بنقوم تاني احنا زي طائر العنقاء لما بيتحرق, بنقوم من تحت الرماد أقوي من الأول
احنا مابنتكسرش , احنا بنقع اه لكننا بنقوم تاني احنا زي طائر العنقاء لما بيتحرق, بنقوم من تحت الرماد أقوي من الأول
انا كمان..واثق اني زي العنقاء...اقع اه..اتكسر لا...واقوم اقوي من الاول
عارف قدراتي كويس جدا
عارف ان مالايقتلني ..يزيدني قوة
عارف ان الوحدة حفرة بنختار نبقي فيها بارادتنا
عارف ان الضعف مش عيب..الاستسلام للضعف هو اللي اكبر عيب
عارف اني لو طال بيا العمر حكسب كل معاركي..لاني مش بخسر..لاني بختار كويس المعارك اللي بدخلها..لاني مش بضيع وقتي ومجهودي في قضايا خسرانة ومعارك نتايجها مش محسوبة
واثق في قدرة ربنا..عارف اني مهما غلطت او قصرت..ربنا يعاملنا بما هو اهله لا بمن نحن اهله
Success is my only option, failure's not...Eminem -Lose Yourself
مش عارف اشكر اللي وقف جنبي واقوله ايه
جوجو وزيزي ومها وسدرة واوركيدا ويوسف المصري وامير الهدوء وليساندرا واسامة وبافي ومني ووينكي ودكتور حماس وسويت هارت..ومعلش لو مذكرتش باقي لاسامي ده مش انقاص لقدر اي حد
ومش مهم اسمي اللي معرفهاش
في الاخر انا عمري مطلبت الطلب ده لكن انا محتاجه بجد
ادعولي ..لاني خايف اتكسر تاني..احساس وحش قوي احساس الانكسار ده
ادعولي قوي

19 comments:

gogo we bas said...

احمد باشا

والله اسفة جدا ان كلامى صدمك
واسفة فعلا على الاسلوب الجامد اللى اتكلمت بيه


بس سؤال تانى

اخر سؤال برئ

طالما انت
واثق انك زي العنقاء...تقع اه..اتكسر لا...واقوم اقوي من الاول
عارف قدراتي كويس جدا
عارف ان مالايقتلني ..يزيدني قوة
عارف ان الوحدة حفرة بنختار نبقي فيها بارادتنا
عارف ان الضعف مش عيب..الاستسلام للضعف هو اللي اكبر عيب
عارف اني لو طال بيا العمر حكسب كل معاركي..لاني مش بخسر..لاني بختار كويس المعارك اللي بدخلها..لاني مش بضيع وقتي ومجهودي في قضايا خسرانة ومعارك نتايجها مش محسوبة
واثق في قدرة ربنا..عارف اني مهما غلطت او قصرت..ربنا يعاملنا بما هو اهله لا بمن نحن اهله


طب تماااااااااام


عارف كل ده ياعم ومستكتر انك تفكها على نفسك الغلبانة شوية؟!!! ايه


خلاص خلاص
منغير ضرب
اخر مرة اتحشر ياعم
ولا تزعل نفسك

وعموما

ربنا يكرمك يارب ويوفقك للى بتتمناه ويبعد عنك الاحباط والملل واى شئ يهدم جواك اى معنى جميل

Doaa Ebrahim Aaql said...

ان شاء الله مفيش انكسار ولا حاجة
ومبسوطة اوى ان حصلت مبادرة منك
عشان تصلح الوضع وتخرج من المود دا
فعلا لازم ناخد خطوة
وانت مش ضعيف يا احمد
بالعكس اللى بيعترف بألمه
انسان قوى مش ضعيف

وربنا يريح بالك يا جميل
ويقدر لك الخير

.
.

تحياتى

Ahmed EIssa said...

جوجو:اسفه ان كلامك صدمني.طب ارجعي بقي شوية فوق
وعشان ابقي صريح سؤال جوجو هو اللي صدمني بجد وفوقني لنفسي
قد السؤال مصدمني فوقني لنفسي وحسيت ان فعلا مش لوحدي وان في ناس خايفه عليا
لا وابقي اتحشري علي طول ياستي ملكيش دعوة انتي..ومتعتذريش ع الاسلوب الجامد اللي اتكلمتي بيه ولا حاجة والله انا مزعلان قد مانا مبسوط
اخر سؤال برئ...؟؟يعني مفيش اسئلة بريئة تانية؟؟؟
مش عارف اشكرك اقولك ايه..كويس انك استحملتيني مضربتنيش بالنار من الخنقة..والحمد الله ربنا مايعودها ايام

برنسس دودو
انت فين ياعم..بقالك كتير مش بتيجي
ميرسي علي كلامك ده جدا..الحمد لله علي كل حال
ابقي تعالي بقي متنسينيش ها؟؟

Unknown said...

مااااااااالك ... مانت كنت كوييييس

لا حول ولا قوة الا بالله

انا كدة ابتديت اتأكد ان فى حاجة فى الجو فعلا .. مش معقول كدة .. اساسا كل الحزن اللى انت عايش فيه ولو اختلفت التفاصيل طبعا حتلاقى كتيييييييييييييييييير عايشين فيه منهم انا

مش مصدق؟؟

اقرا الاسئلة دى وانت تعرف الحال واصل لفين
http://2insana.blogspot.com/2008/01/blog-post_15.html

بس تعرف انا اخد قرار
انى مش مزعلش نفسى .. الحياة اصلا مش مستاهلة .. قررت اخرج برا الحزن بنفسى واعيش واكمل

عارف بعمل ايه عشان منفجرش؟؟ .. بقعد اقرا قرآن عشان اعرف اكمل فى الدنيا دى .. بجد بيصبر جامد اوى

ويمكن بعد ما بقيت اعمل الوصفة دى الأسئلة اتغيرت وبقت كدة
http://2insana.blogspot.com/2008/01/blog-post_20.html


وعايزة اقولك فى الاخر .. الدنيا لو جارحة؟؟ .. لونها لون فرحة بجد

اى احساس بالفرحة بيجى من جوانا بجد والله يا احمد محدش بيصدرلنا الإحساس ده

وعشان تفرح لازم ترضى بكلللللل حاجة مريت بيها وعشت فيها او حصلتلك او فيك انت .. ارضى عن اى حاجة وكل حاجة فيك وانت حتفرح

واتأكد ان كل حاجة مكتوبالك من قبل ماتتخلق اصلا وثق فى ربك خير ان بعد الضيقة سعة وبعد الحزن فرح لان ربنا دايما شايل لنا الخير

ولو اطلعتم على الغيب لاخترتم الواقع

يمكن الكلام ده اتقالك كتيييييييييييييير

بس بجد حاول تحسه .. وحاول تحس بطعم الحاجات الحلوة اللى حواليك


كان فى مقولة جميلة اوى لجببران خليل جبران بتقول

أحياناً يغرقنا الحزن حتى نعتاد عليه .. وننسى
أن في الحياة أشياء كثيرة يمكن أن تسعدنا..
وأن حولنا وجوهاً كثيرة يمكن أن تضيء


قرر انك متغرقش فى بير الحزن عشان الحزن بيجيب حزن .. لكن أملك فى ربنا ماينقطعش ابدا


يلا فكها وبما إنك محضرتش الحفلة عندى انا وكاميكاز وبما انه مش حيرضى يدخلك من باب المدونة من اصله عشان ماجتش .. فأنا حتوسطلك عنده عشان تعرف تدخل

وانت داخل بس قوله انا تبع إنسانة .. مش حيدخلك خاااااالص هههههههههه

http://2insana.blogspot.com/2008/01/blog-post_24.html


ربنا يشرح صدرك يارب .. وابقى قول سورة الشرح كتييييييير

يلا سلام عليكم
:))

Anonymous said...

بجد عفارم عليك
خليك صلب وقوى وواقف
اتحدى كل احزانك
انت مش لوحدك
واحنا لا يونكن نسيبك
استمر

Lyssandra said...

السلام عليكم ورحمة الله وبركاته
والله يابشمهندس انا حقيقي اتصدمت لما قرأت الموضوع ده لأني ماكنتش أعرف انه فيه حاجه خانقاك اوي كده . بس سعيده بحق انك قدرت تتخلص من المود ده او علي الاقل قدرت تتنفس وتحاول الاتزان تاني لأني عارفه انه اكيد لسه المود ده سايب اثر ..
انا عارفه انه كل انسان بيمر بالحاله دي علي الاقل مره في حياته وممكن كتير اوي من غير اي اسباب زي ماحصلت معايا. انا وصلت فيها لحالة كان ميؤوس مني اساسا . وكنت طريحة الفراش لمدة لا بأس بها اطلاقا . وكنت حاسه انه الحياه مالهاش معني ووجودي مالوش مبرر وحاجات كتير سودا اوي .. انا اسفه طبعا اني باتكلم عن السوداويه دي بس انا اللي اقصده اننا ممكن نمر بمواقف كتير في حياتنا ونتخيل انها النهايه . لكن رحمة ربنا أوسع حتي من أملنا فيها لأننا ممكن نيأس في لحظه ولحظات لكن رحمة ربنا ابدا باقية .
عارف يابشمهندس انا لغاية دلوقتي ولهول ما رأيت في الفتره دي مش مصدقة اساسا اني قدرت أتخطي المرحله دي من حياتي وده الحمد لله حصل بس علشان ربنا
كان جنبي فتخيل بقي لما ربنا يبعتلك الصحبة الطيبه اللي تخاف عليك وتقلق عشانك وتفرح معاك يبقي اكيد ربنا بيحبك .. ولما ربنا يحبك يبقي اكيد عاوزك سعيد .. والسعاده عمرها ماكانت مرتبطه بموقف يعني مش لازم نجاح او شغل او حب جديد او ترقية .. السعاده مالهاش مناسبه .. ساعات الواحد يلاقي نفسه سعيد اوي من غير سبب زي مابيلاقي نفسه ساعات مخنوق من غير سبب .. في ناس عندها من اسباب السعاده كتير بس مش سعدا .. ليه ؟ لأنهم مابيعرفوش يفرحوا ..
بص .. م الاخر كده .. لما تبقي عارف ان ربنا بيحبك بجد يبقي ده كفايه عليك انك تكون انسان سعيد .. بل الاوفر سعاده .. لما تقرأ كلامي ده ابتسم وقول يارب انا عارف انك بتحبني وده كفايه عليا اكون سعيد .. صدقني هاتحس كتير براحة ..
المهم اننا نكون راضيين عن نفسنا ومش مهم احنا ايه في نظر الناس لأن الناس ممكن ماتعرفش قيمتك زي مانت والقريبين منك عارفينها .. وماتحسش ابدا انك قليل .. انت كبير اوي ولنفسك عليك فعلا حق الاعتذار .. لما نحس نفسنا صح ونعرف اننا مش صغيرين اكيد هانكون راضيين عن نفسنا وده سبب كمان عشان نكون سعداء .
يابشمهندس مود الكآبه والاحباط والملل واليأس ده أمر صحي ولازم كل واحد يجربه علشان لما يرجع يبقي سعيد يعرف قيمة السعاده دي ..
افتكر كلامي كويس يابشمهندس .. واتمنالك دايما حياه موفقه ان شاء الله هي حقا حياة لن تخلو من الألم ولكن اتمني ان يكون نصيبك فيها من الابتسامات اكثر من الدموع وتذكر دوما انه لولا الدموع ما شعرنا بروعة الابتسامة ..

حمدلله ع السلامه مره تانيه يابشمهندس .. عوداً حميداً ويارب دايما نشوفك علي خير .

اه كنت هانسي .. ياريت سيادتك تبقي تشرفنا بمرورك الكريم علي مدونتي الغلبانة
هههههههه
سلام
lyssandra

بحاول اكون said...

اللى انكسر يطوح هنلاقي غيروا جديد والحزن يوم هيروح ويجينا فرح وليد واللى انكسر نمحيه مع اللى فات نرميه في البحر ونخبيه من قلبنا وعينا
على الشط انا واقف وحدي ومش خايف في ايدي كبشت حزن اضحك واقوم حاتف يخدها موج البحر يضحك يقول شايف في لحظة راح الحزن اجري ياواد روح
انسى اللى فات وافرح وعندي تلاقى الحل لا تتعب ولا تصلح
وجيه عزيز جبهالك من الاخر
ربنا يفرح دايما يا احمد ويبعد عنك اي حزن واكتئاب
ياريت مش تتأخر في دفع فواتير الكهربا خلي المدونة دايماً منورة بيك
هستناك تيجي تعلق على البوست الجديد
موني

البِـئرُ والظمّأْ said...

احمد

مش عارفه قولك ايه
بس بجد انا فرحانه قوي انك بجد فكرت في كل ده
سعيده قوي انك فكرت في كل كلمه حد قالهالك
فرحانه انك فقت بقا لنفسك
والله يا احمد الدنيا دي فيها حجات خلوه قوي
بص يا احمد للحجات الحلوه اللي فيها

فين احمد المتفائل
فين السعاده اللي كنت بسمعها في صوتك
فين الامل اللي كنت بتدهولي بجد
و بتديه لاي حد اكيد في وقت مخنوق او مجروح
خلاص بقا يا احمد
انسى كل اللي فات
هنبص بس للي جاي
و للحلو اللي جاي كمان
خد بالك كمان من حاجه
ماما دايما لما بتشائم و اكتئب
تقولي
تفائلوا بالخير تجدوه
تفائل بقا يا احمد
تفائل
تفائل
اضحك بقا و اتبسط
ابسط نفسك
انت مش بتتحنق لما تلاقي كل الظروف اللي حواليك مخلياك مخنوق
مش بتتخنق لما حجات تافهه و بسيطه قوي تقيدك

عيش لنفسك يا احمد
فكر في نفسك بقا
حب نفسك كمان قوي
لاتقلل من شأنها ابدا
و على فكرة يا احمد
انا واثقه ان ربنا هيفرجها يا احمد
واثقه ان ربنا هيديك ,, و هيديك كتير قوي كمان




تحياتي
زيزي

Ana keda said...

بجد يا احمد هدعيلك وادعيلى معاك كل الكلام الى انت كاتبةه ده انا لسه بقوله لواحدة صاحبتى بجد انا كمان نفس الكلام ده وقالتلى انتى الى عاملة فى نفسك كده

الفكرة ان مفيش فكرة
الوحدة بادرتنا اه انا معاك بس لو نظرات ليه وازاى موجودة حواليك لازم تفكر تبقى لوحدك

الحزن والياس والالم والاه موجودة
عارف مفيش اسهل من اننا نقول مفيش حاجة تستاهل ولا اى حاجة منى دى

مش عارفة متلخبطة

انا بس جحاية اسلم عليك واقولك ربنا معاك

sahr said...

تصدق اه

orkida said...

اذيك يااحمد
اولا الاعتذار تقبلناه تقبلناه هوة فيه برضه بينا اعتذارات
انت معاك حق احنا نقع اه ننكسر لا
ومفيش في الدنيا حاجة تستاهل وكفاية ان فيه ناس حولينا متاكدين انهم بيحبونا مهما عملنا وانا هدعيلك وانت كمان ادعيلي انا كمان محتاجة لدعائك ومش بنسي انك برضه وقفت جنبي كتير اوى وخففت عنى حاجات كتير اوى

YHYيــوســف الـمصـرى said...

السلام عليكم ورحمة الله وبركاته
...........................
عيسى حبيب قلبى

اولاً كده قلى هو الواد الى بيغنى فى البلوج ده بيقول ايه بظبط ؟
شكله مضايق اوى من حاجة ؟
برغم انى مش فاهم منه حاجة وبرغم صوته الى باين عليه حزين ألا ان الاغنية حلوة !
مش قلتلك يا صديقى
مفيش حاجة تستاهل لأنها حلوة حتى لو مش فاهمين حاجة :D
خليها على الله يا أبو حميد وكله هيبقى زى الفل ..
وحشنى يا واد كتير بجد مش ناوى تنزل القاهرة قريب ؟
تحياتى يا اجدع بور سعيدى
:D

Unknown said...

أنا مبسوطه اوي ان كلامي فرق معاك يااحمد

ومبسوطه أكتر انك نويت ترجع تاني وتخرج من المود ده

صدقني لو فكرت كويس هتلاقينا بنقع بس

مهما الوقعه طولت بنرجع نقوم تاني وبنكون اقوي كتيييير من الأول

تحياتي

. said...

سعيدة بقرارك
واشعر بهمسة حماس متخفية وارء الكلمات
كل ما اود ان اقوله لا تتسرع وتتحمس كثيرا فجأة لاني اعلم وعن تجربة
كيف تؤلم لحظة الانكسار وكيف تؤلم اكثر لحظة الانكسار بعد القوة
لا تتسرع
فقط ابدأ بالتبسم
لا تبدأ بالضحك
اتمنى الا تتغير اذا اخرجت قلبك من هذا المخبأ
وسأدعو لك بكل ما اوتيت من قوة
تحياتي

تــسنيـم said...

بص يا أحمد أنت أكيد عارف ان بوست احنا بنقع أه لكن مبننكسرش اللي كانت كاتباه إسراء .. كانت كاتباه علشاني وموجه ليا أنا

انا مش هقولك هيا عندها حق واصحابك عندهم حق وكده
لأ.. أنا هقولك حاجة تانية الحياة اللي احنا عايشنها دي محسوبة علينا مش هنعيش غيرها وفي النهاية هنتحاسب عليها فليه نتحاسب على حاجة معشنهاش ومش هتتعوض؟؟


:)

Hadota ... حدوتة said...

كلنا بنمر بلحظات ضيق وخنقة يا احمد
ساعات فى اللحظات دى بتهون علينا نفسنا واحلامنا وناس غاليين علينا
كل دا بيبقى حاجات عرضية بتزول مع زوال الحالة النفسية الوحشة

يس اوى انك عارف ان ربنا مع الناس ويقف جن الجميع مبينساش حد

واكيد كل حاجة بتحصل لينا بتكون خير

حب حياتك وحب نفسك وخليك على طول قوى عشان تقدر تعيش

وخلي عندك قناعة قوية وشيلها جوه دماغك وامشى اقنع الناس بيها

ان الانسان ممكن يمر بلحظات صعبة كتير انما الخير جاى .. بس عاوز حبة صبر .. ولازم نتعب شويه عشان نحس الحياة حلوة بعد كده .. بس هيا ان شاء الله هتحلو


وبعدين يا سيدى الناس الجميلة اللى ربنا موقفها جنبك عشان يشجعوك وياخدوا بايدك


تحياتى وربنا يكرمك

Ahmed EIssa said...

انسانه:بس تعرف انا اخد قرار
انى مش مزعلش نفسى .. الحياة اصلا مش مستاهلة .. قررت اخرج برا الحزن بنفسى واعيش واكمل
هو ده القرار اللي فعلا اخدته
كلامك مريح قوي علي فكرة يا ياسمين
علي فكرة انا جيت وكنت حتخانق مع كاميكاز بس بيني وبينك يعني من غير فضايح راضيته بخمسايه ودخلت
كل سنة وانتي طيبة وعقبال 20000000000000000 سنة

وينكي:في اول ظهور لها بدون اعلانات..انا كمان لايونكن احس بوحدة تاني ان شاء الله
ميرسي يا مروة

ليساندرا:بص .. م الاخر كده .. لما تبقي عارف ان ربنا بيحبك بجد يبقي ده كفايه عليك انك تكون انسان سعيد .. بل الاوفر سعاده .. لما تقرأ كلامي ده ابتسم وقول يارب انا عارف انك بتحبني وده كفايه عليا اكون سعيد .. صدقني هاتحس كتير براحة ..
المهم اننا نكون راضيين عن نفسنا ومش مهم احنا ايه في نظر الناس لأن الناس ممكن ماتعرفش قيمتك زي مانت والقريبين منك عارفينها .. وماتحسش ابدا انك قليل .. انت كبير اوي ولنفسك عليك فعلا حق الاعتذار .. لما نحس نفسنا صح ونعرف اننا مش صغيرين اكيد هانكون راضيين عن نفسنا وده سبب كمان عشان نكون سعداء
الحمد لله علي كل حال
سعيد بتعليقك اللي ربما كان اطول من البوست ..سعيد جدا والله
من زمان يمكن من يوم مبدات تدوين ولحظات بتعبر جدا عن حالتي النفسية..اللي متابعني من زمان عارف كدة..يارب تتابعيني علي طول
انا جيت علي فكرة ومدونتك ملهاش حل...جامدة جدا وكلامك راقي قوي
ابقي تعالي تاني بقي بعد مدفعنا فاتورة الكهربا

Ahmed EIssa said...

زيزي:كلامك بالفعل رسم بسمة كبيرة قوي وخلاني متفائل جدا
ميرسي يا زيزي قوي

انا كدة:انا زعلان منك عشان بقالك ييجي قرن مجيتيش..من ايام الحملة الفرنسية تقريبا
بس يلا سماح..نورتيني تاني
فعلا الوحدة دي بتبقي باختيارنا احنا..
اه كدة ادعيلي وادعينا جميعا
ميرسي لمرورك وابقي تعالي

سهر:تصدقي؟؟؟

يوسف :حبيبي والله مان عندك حق فعلا
الراجل اللي بيزعق في الاغنية بيقول كلام حلو قوي حبقي اترجملك الاغنية وابعاتهالك
قريب ان شاء الله حنزل ونسهر سوا

اسراء:نورتيني بجد
وكلامك فعلا فرق معايا جدا وهو تقريبا مع حاجات تانية كتير خلاني وقفت تاني
انتي بتجيبي الكلام ده منين ها؟؟؟
ميرس لمرورك يا اسراء وتعالي بقي مش محتاجة عزومة انتي صاحبة مكان..

Ahmed EIssa said...

سدرة:انتي دماغك كبيرة قوي علي فكرة وكلامك صح جدا
ابتسم الاول وبعدين اضحك
متشكر يا سدرة جدا

تسنيم: الحياة اللي احنا عايشنها دي محسوبة علينا مش هنعيش غيرها وفي النهاية هنتحاسب عليها فليه نتحاسب على حاجة معشنهاش ومش هتتعوض؟؟
انتي عارفه اني فكرت اعمل بوست مخصوص للجملة دي؟؟؟

حدوتة:عندك حق بجد
الواحد من كتر مبيكلم نفسه ممكن يقتنع بحاجة مش جواه اصلا وده مخليه مضايق ومخنوق علي طول
لكن اللي يحب نفسه ويقتنعن بيها ويرضي بيها زي مهي..حيرتاح كتير
انتي بقالك كتير مش بتيجي علي فكرة وحدفعك غرامة تأخير
متطوليش في الغيبة كدة ها
وميرسي لمرورك