وعدت سنة

زي النهاردة السنة اللي فاتت كنت قاعد ع المسنجر مع علي الالفي وبعتلي لينك وقالي اقراه...وقتها مكنش ليا اي علاقة بالتدوين ولا المدونات ولا اعرف عنها حاجة اصلا الا المقالة اللي كنت قريتها في الدستور عن مدونة جمال مبارك..يومها ضربت في دماغي وقلت من باب التجديد يعني اعمل مدونة..يومها كنت لسة شغال في بحر البقر وعارف ان معنديش وقت للكلام الفارغ ده - ايامها طبعا كنت فاكر كدة - بس من باب اني الاقي حاجة اعملها لما ارجع البيت مش أكتر

يومها ...اخترت اسم للبلوج لحظات..اللي مقلتوش فعلا ان اسم لحظات ده كان اسم تجريبي ..مجرد اني كنت عملت مجلة حائط قبل كدة وسمتها لحظات وده كان اول اسم جه علي بالي..ظبطت التمبلت والسيتنج..وكتبت اول بوست اللي كان عنوانه

أول كلامي سلام

ولاني مش بعرف انتظم في اي حاجة ولولا ان التنفس لا ارادي كنت زهقت منه, حاولت اكتب زي مذكرات كدة بس طبعا انا مش مصطفي كامل ولقيت مذكراتي عبارة عن حاجات عبيطة زي صحيت وكلت وزعلت من مش عارف مين عشان عمل ايه..دلوقت الموضوع اختلف..بقي فيه صراعات وافكار ومعارك وافكار بتخبط في بعض وخايف بعد فترة -لما اوصل للاستقرار- انسي المرحلة دي من حياتي

كنت براهن نفسي اني حنتظم فعلا..اللي عرفني عرف اني ملول لدرجة فعلا لا تصدق...فرحت قوي بتعليق نهي كراكيب اللي كان اول تعليق لاول بوست في حياتي بعد تعليق علي الالفي

دلوقت...بعد سنة كاملة..و56 تدوينة ..نظرتي اختلفت كتير قوي لحاجات كتير قوي..الحاجة الوحيدة اللي فعلا فرقت معايا قوي في حياتي ..لدرجة اني بسأل من سنة كنت بعمل ايه ع النت قبل مبدا ادون...كتير ببقي قاعد في شغلي او في مواصلات..اضايق من موقف..افرح...اسمع اغنية تعجبني مثلا..الاقي عقلي ترجمه لا اراديا لتدوينة واقعد افكر حكتبها اذاي وحختار صورتها اذاي..حسيت ان حتي لو رايي غلط فده رايي انا وفي اللي بيهتم وبيسمع وبيناقش وبيعلق...اتعرفت علي مجتمع محترم رغم تناقضاته وشباب دماغه وزنها دهب..زي مقريت لناس تافهه وكلام عبيط قريت كلام ناضج ورؤية عميقة..عرفت اذاي ممكن تقابل حد اول مرة وتحس انه صاحبك من سنين

انا مش مرتب اي كلام اقوله في البوست ده

لكن لكل حد دخلي وقرالي وعلقلي..ودخلي وقرالي ومعلقليش...دخل يسلم او حتي دخل يهزر او يشتم..انا سعيد جدا جدا بكل كلمة اتكتبتلي ووصلتني في شات بوكس..ليا كل الشرف بكل مدون عرفته وشفته ..واتمني اني اعرف واشوف باقي المدونين

بس فعلا حتي لو انا مش مدون قوي..ليا كل الفخر اني اكون في مجتمع المدونين المحترمين

ملحوظة..في مثل بلدي بيقول بعد العيد ميتوزعش كحك او حاجة زي كدة...لكن الاحتفال باول سنة تدوين مش حيبقي احتفال عادي...تقام السرادقات والانوار وحنوزع شيكولاته وبيبسي علي الغلابة مدمني الشيكولاته والبيبسي..وحتكلم كتير عن التدوينات والتعليقات ...بس فعلا دلوقت انا عندي صداع جامد جدا ويادوب مخلص البوست ده...مازالت للاحتفالات بقية اول مالصداع يروح