وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Sunday, December 30, 2007

وعدت سنة


زي النهاردة السنة اللي فاتت كنت قاعد ع المسنجر مع علي الالفي وبعتلي لينك وقالي اقراه...وقتها مكنش ليا اي علاقة بالتدوين ولا المدونات ولا اعرف عنها حاجة اصلا الا المقالة اللي كنت قريتها في الدستور عن مدونة جمال مبارك..يومها ضربت في دماغي وقلت من باب التجديد يعني اعمل مدونة..يومها كنت لسة شغال في بحر البقر وعارف ان معنديش وقت للكلام الفارغ ده - ايامها طبعا كنت فاكر كدة - بس من باب اني الاقي حاجة اعملها لما ارجع البيت مش أكتر

يومها ...اخترت اسم للبلوج لحظات..اللي مقلتوش فعلا ان اسم لحظات ده كان اسم تجريبي ..مجرد اني كنت عملت مجلة حائط قبل كدة وسمتها لحظات وده كان اول اسم جه علي بالي..ظبطت التمبلت والسيتنج..وكتبت اول بوست اللي كان عنوانه



ولاني مش بعرف انتظم في اي حاجة ولولا ان التنفس لا ارادي كنت زهقت منه, حاولت اكتب زي مذكرات كدة بس طبعا انا مش مصطفي كامل ولقيت مذكراتي عبارة عن حاجات عبيطة زي صحيت وكلت وزعلت من مش عارف مين عشان عمل ايه..دلوقت الموضوع اختلف..بقي فيه صراعات وافكار ومعارك وافكار بتخبط في بعض وخايف بعد فترة -لما اوصل للاستقرار- انسي المرحلة دي من حياتي


كنت براهن نفسي اني حنتظم فعلا..اللي عرفني عرف اني ملول لدرجة فعلا لا تصدق...فرحت قوي بتعليق نهي كراكيب اللي كان اول تعليق لاول بوست في حياتي بعد تعليق علي الالفي


دلوقت...بعد سنة كاملة..و56 تدوينة ..نظرتي اختلفت كتير قوي لحاجات كتير قوي..الحاجة الوحيدة اللي فعلا فرقت معايا قوي في حياتي ..لدرجة اني بسأل من سنة كنت بعمل ايه ع النت قبل مبدا ادون...كتير ببقي قاعد في شغلي او في مواصلات..اضايق من موقف..افرح...اسمع اغنية تعجبني مثلا..الاقي عقلي ترجمه لا اراديا لتدوينة واقعد افكر حكتبها اذاي وحختار صورتها اذاي..حسيت ان حتي لو رايي غلط فده رايي انا وفي اللي بيهتم وبيسمع وبيناقش وبيعلق...اتعرفت علي مجتمع محترم رغم تناقضاته وشباب دماغه وزنها دهب..زي مقريت لناس تافهه وكلام عبيط قريت كلام ناضج ورؤية عميقة..عرفت اذاي ممكن تقابل حد اول مرة وتحس انه صاحبك من سنين


انا مش مرتب اي كلام اقوله في البوست ده

لكن لكل حد دخلي وقرالي وعلقلي..ودخلي وقرالي ومعلقليش...دخل يسلم او حتي دخل يهزر او يشتم..انا سعيد جدا جدا بكل كلمة اتكتبتلي ووصلتني في شات بوكس..ليا كل الشرف بكل مدون عرفته وشفته ..واتمني اني اعرف واشوف باقي المدونين


بس فعلا حتي لو انا مش مدون قوي..ليا كل الفخر اني اكون في مجتمع المدونين المحترمين


ملحوظة..في مثل بلدي بيقول بعد العيد ميتوزعش كحك او حاجة زي كدة...لكن الاحتفال باول سنة تدوين مش حيبقي احتفال عادي...تقام السرادقات والانوار وحنوزع شيكولاته وبيبسي علي الغلابة مدمني الشيكولاته والبيبسي..وحتكلم كتير عن التدوينات والتعليقات ...بس فعلا دلوقت انا عندي صداع جامد جدا ويادوب مخلص البوست ده...مازالت للاحتفالات بقية اول مالصداع يروح





14 comments:

gogo we bas said...

هييييييى...... انا اول واحدة
happy birth day to la7zat

اولا سلامتك من الصداع يا باشمهندس
ثانيا كل سنة وانت والمدونة بخير
وعقبال يارب مايبقا عند خمستلاف بوست وخمسين سنة تدوين

وبمناسبة مرور سنة ماحضرتش منها الا كام شهر اواخر (بس قريت كله والله)ممكن تسمحلى اختار اجمل تدوينة؟

كريشيندو.. بجد تقريبا احلى ماكتبت من وجهة نظرى
رقيييييييييقة جدا

مغامراتك فى القاهرة العامرة
عشان بتفكرنى بايام عجيبة


رقصة زفاف
الحياة دون شبكة امان

ودول ملخص لاحلى ماقرأت عندك مؤقتا

راجعة تانى اخد الشيكولاتة بتاعتى
سلام مؤقت

princess dodo said...

ل سنة وانت طيب
بمناسبة العيد الجميل دا

والسنة الجديدة


تحياتى ليك

maha said...
This comment has been removed by the author.
maha said...

سلام عليك يا احمد
ايه ده ..هو فات سنة واحده بس ؟
امال انا ليه دايما حاسة ان فات كتير اوي علي المدونة بتاعتك ؟؟
يمكن لانها مليانة احداث و كلام
..
انا فاكرة اول مرة دخلت المدونة عندك حسيت ان كل حاجة عايزة تقول "انا هنا ...شايفني ؟؟انا بعبر عن احمد هو حاططني هنا عشان عايز يوصل رسالة معينة لكل واحد يدخل هنا ..دي اللعبة اللي بيلعبها و ده الفيلم اللي اثر فيه و دي جمله بيحبها و ده موقف تعبه و لحظة تانية بيحلم بيها ...
مدونتك فيها حياه جميلة اوي ..طبيعية نادرا و مجنونة في اغلب الوقت لكن جنونها واقعي يتناسب مع العصر اللي احنا عايشين فيه ..عقبال 3 سنين بعد المية للمدونة و دايما تكون معاك في اجمل لحظاتك و متكونش فيها اوقات حزينة ابدا
:)
كنت هقول ايه كمان .مممم
....
الف سلامة من الصداع ..بطل تفكير بقي :)
سلام يا احمد

إنـســـانـة said...

ياه ده انا مدونتى اكبر من مدونتك بيومين بس

يلا ع البركة .. كل سنة وانت طيب ولحظات طيبة وعقبال ال100 سنة تدوين من غير ما تمل مننا
:D

Meekness !!! said...

سلام الله عليك يا احمد
اولا كل سنه و انت طيب
و كل سنه و مدونتتك طيبه يا رب




عجبتني قوي كلمه بحر البقر دي

مش عارفه اجمع كلام اقوله بجد
بس يا رب نستمر لغايه لما نكمل سنه احنا كمان



و ليا الشرف اني عرفت مدون زيك يا احمد...............سلامتك







زيزي

tota_fm said...

كل سنه وانت طيب وكل سنه والمدونه طيبه وعقبال كده 100 سنه بجد المدونه رائعه والف سلامه عليك من الصداع
يا ريت الشيكولاته تبقي كتير علشان انا هاجي اعمل هجوم عليها ومش هسيب فتفوته وربنا يكرمك ويوفقك وتبقي المدونه دائمة الروعه

YHYيــوســف الـمصـرى said...

السلام عليكم ورحمة الله وبركاته
...........................
احمد باشا اجمد بشمهندس فى بورسعيد
كل سنة وانت طيب يا باشا عام جديد سعيد عليك يا رب

وعقبال كده 10000000000 سنة تدوين

تحياتى

dr.Roufy said...

سلامتك من الصداع يابشمهندس
ويارب سنين كتير تعدي عليك وعلينا واحنا مدونين ..محترمين
:)
كل سنة وانت طيب

علي الالفي said...

مقصر معاك
و مقصر مع كل الناس
و مقصر مع نفسي شخصيا
ما تزعلش
و بجد
كل سنة و انت طيب يا صديقي اللدووووووود

فوكيره said...

البوست ده ... طالع من القلب يا كونت

التدوين اثر فينا بطريقه عجيبه ...

انك تسجل احداث حياتك ... المواقف الي بتحصلك و اول حاجه تفكر فيها ان الموقف ده يكون تدوينه

ويوحيلك بأفكـار كتير

--
اكتر حاجه بحبها هنا ان المدونه دي مختلفه وليها طابع خاص ...

طريقه الكتابه الي عامله زي الكتب الاجنبيه المترجمه ...سعات كتير

الطـابع الخـاص الي كتير بيصدمني في نفسي قبل ما يصدمنى بواقع حواليا ...

تحفيذ دماغى انها تفكر مع كل بوست بيتكتب ...


الاغاني الانجلش القديمه ...

حــاله ...

بجد ...

كـل سنه والمدونه دي طيبه ولسه بيتكتب فيه ...

كلام ...يأثر فينا اكتر واكتر

تحياتى ...

ghalia said...

سلامتك من الصداع يا أحمد
حقيقى كنت فاكرة انك قديم فى مجتمع التدوين عن كدة مش عارفة ليه
أنا بحب أقرالك جدا وبتعجبنى جدا أفكارك
ومتتصورش اد ايه انبسطت بسؤالك عنى برغم انى كنت مقصرة أوى معاك ومع ناس كتير
كل سنة وانت طيب وان شالله تكون سنة جميلة كلها انجازات وسعادة وحب

أخف دم said...

ازيك يا أحمد
كل سنة وانت طيب يا احمد بمناسبة كل مناسبة سعيدة عليك
السنة الجديدة والتدوين كمان
ويارب كل سنة تعدى عليك تبقى على خير وف تقدم ان شاء الله

bos bos said...

كل سنه وأنت طيب
وعام تدوينى سعيد عليك
وعقبال مليون عام تدوينى