وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Monday, August 13, 2007

ارغي يا عم الامووووووور

اكتشفت الفترة اللي فاتت حاجة لذيذة قوي
انا مصاب بمرض اسمه العصاب الاكتئابي الانبساطي
طب والله فرحت قوي قوي...لولولولولولييييييي
ال انا ناقص
عارفين لما الواحد يبقي مبسوووط قوي وبيضحك ويهزر
يشوف الدنيا منورة قوي
خطواته واثقة بتدب في الارض...عينه بتلمع..ضحكة ثقة في وشه
وفجأة
الدنيا تسود زي هجوم السحاب الرمادي علي نور الشمس في نوة شتا مفاجئة
يتخنق ويحس بتقل علي صدره
يبقي حاسس انه حتي مش طايق يشيل رجله من ع الارض
عارفين الاحساس ده؟؟؟
اهو هو ده بالضبط العصاب الاكتئابي الانبساطي
******************************
يا سبحان الله
اقرا الاهرام ولا الاخبار الاقي الدنيا حلوة قوي ومصر ام الدنيا وجميلة ومفيهاش مشاكل
كل الناس عايشة كويس وكل المرافق شغالة
وفكو الحزام فكو الحزام
اقرا الدستور وصوت الامة احس ان البلد بتغلي
مفيش مسئول مش بيرتشي
مفيش قسم بوليس مفيهوش تعذيب
مفيش واحد في السلطة مش بيعمل مؤامرة
جالي اقتناع غريب ان في مقالات جرايد فكو الحزام دي بيبقي ناقصها جملة لازم تتكتب
مراسلنا في كوكب الارض!!!!
******************************
صحيح حد شاف مسلسل ليلة القبض ع البلكونة؟؟؟؟
ده مسلسل اجنبي جامد جدا لسة حينتجوه قريب ان شاء الله
بيتكلم عن بلكونة سيكو بتموت المصريين في لندن وسكوتلانديارد بجلالة قدرها مش عارفه تقبض عليها
والبلكونة السايكو دي عاملة زي القتلة المتتابعين بتوع امريكا اياهم اللي تلاقي الواحد فيهم ماشي بعربية فان طول الليل عشان يموت البنات اللي شعرهم اصفر
او الرجالة الزنوج
او تلاقيه مثلا مش بيموت حد الا يوم تلات او بيقول ان نداء الرب قاله انه يموت 41 تشكيلة رجالة علي اطفال علي ستات وبعدها يرمي نفسه من ع الجبل
البلكونة دي مش بتموت الا المصريين اللي ناويين يكتبو مذكراتهم وينشروها
وطبعا البلكونة دي في قمة العبقرية انها تخدع بوليس زي سكوتلانديارد اللي بيقبض ع المتهم من بصمة دخان سيجاره مارلبورو
بصراحة بقي المصريين هم اللي غلطانين
يعني خلاص كانت الدنيا ضاقت بالليثي ناصف قائد الحرس الجمهوري ايام عبد الناصر والسادات انه يكتب مذكراته في لندن؟
ولا سعاد حسني اللي انتحرت كانها فوق منط حمام سباحة ولاقوها بعيد عن البلكونة السايكو بعشرين متر؟
ولا اشرف مروان اللي الموساد بجلالة قدره معرفش يوصله وكان قاعد مجعوص في البلكونة السايكو اياها ال عامل بيتعالج ال ؟؟
لا وايه كمان دي بلكونة قادرة وواصلة وجبارة
دي احتمال كمان تكون هي اللي رمت دودي الفايد بعربيته بسواقه بالاميرة ديانا ولفقت التهمة للعمود الغلبان اللي العربية خبطت فيه وزمان سكوتلانديارد قابضه عليه ظلم دلوقتي وبتحاكمه علي جريمة مرتكبهاش
******************************
ماما الحكومة عايزة تحول مصر كارت مش خط
ده اللي جه في بالي وانا راكب تاكسي النهاردة سمعت السواق بيتكلم مع محصل كهربا علي نظام جديد حيخلو فيه الكهربا بالكارت
وطبعا عشان انا كنت لسة صاحي من الكهف وخايف العملة اللي معايا متعجبش السواق مسألتش وسبتهم يتكلمو
يعني اذاي كارت كهربا؟
يعني لو انا شحنت الكهربا بكارت والكارت خلص الدنيا تظلم؟؟
ولا حلاقي العداد بيقول لقد نفذ رصيدكم وخلي بقي الظلمة تنفعكم؟
المهم ان واحد دخل في الحوار وقال ده كمان الميه حيخلوها بكارت
يا نهار ..ملوش لون؟؟؟؟؟
الميه كمان بكارت؟؟؟؟؟؟؟
هو احنا كنا لاقيين الميه عشان يعملوها بكارت؟؟
ده انا حتي سمعت وانا في الكهف ان في تورة عطشي في مصر وان مرافق المياه بتنهار رغم التأكيدات ان كله تمام والميه مغرقه الدنيا ده احنا حتي عايزين نعمل ترشيد للميه اللي بالهبل اللي مش عارفين نوديها فين
طب افرض الشبكة وقعت وانت الصابون مغرقك تحت الدش
تستني بقي لما حد ينزل ويجيب كارت ويشحن؟؟
ولا ممكن تشحن ع الهوا اسرع عشان الصابون ميعميش عينيك وتروح المستشفي متلاقيش معاك رصيد في كارت العلاج؟؟؟
كنت قريت علي ان استهلاك الاسرة المصرية في الانترنت 2 جيجا بس في الشهر عشان كدة ماما الحكومة حتعمل كارت نت فيه 2 جيجا بس حجم تبادل معلوماتي (يعني داونلود وابلود وكاش وكوكيز بينزل عندك ع الجهاز) ولو زودت تجيب كارت زيادة رصيد الجيجا بــ8جنيه
زي الـ800 مكالمة المجانية فاكرنهم بتوع المصرية للاتصالات اللي مكنش حد بيعرف بيروحو فين ولحد دلوقتي تلاقي في بند مكالمات زيادة يعني زيادة عن الـ800 اللي اتلغو اساسا
شفتو بقي ماما الحكومة خايفة عليكو اذاي
يعني بدل متسهر انت وهي ع النت تعملولكو حاجة مش مفيدة زي اي بحث عن اي كتاب محترم ولا حاجة تساعدك في الدراسات العليا مثلا مثلا تقوم تنام احسن عشان تصحي بدري
لا وايه كمان دي حتعلمكو اذاي تستفيدو بوقتكو ع النت وتعملوحاجات مفيدة زي الشات وتنزيل الاغاني الهادفة زي العنب والخضار لان الاغاني الوحشة التانية مساحتها كبيرة وحتخنقك
صحيح يعني ايه احتياجات الاسرة المصرية في استهلاك الانترنت... يعني قاسوها اذاي..وياتري عارفين الجيجا دي بتتاخد اذاي ولا حيجيبو حاجة ياخدو فيها؟؟؟؟
******************************
وانا في اولي اعدادي كان معايا واحد كان مهزئة الفصل
امعة وملوش شخصية من الشخصيات الباهته اللزجة اللي لما كنا نحب نضحك كنا بنوقفه ونقوله غني يا حجازي
وكان بيغني اغنية السد العالي ويقلد عبد الحليم حافظ
كبر حجازي وسمعت انه بقي شاعر..عادي
كبر وسمعت انه في حركة كفاية...عادي جدا
كبر وسمعت انه مسيحي من وهو عنده 16 سنة لأن السيد المسيح جاله في رؤيا في المنام وده خلاه يدرس المسيحية واللاهوت واقتنع تمام الاقتناع ان المسيحية هي الدين الصح وان الاسلام يدعو للارهاب وبيغرس جوه المسلمين الخوف والرعب من العذاب عشان كدة بيتعبدو غصب عنهم مش حبا في العبادة
اه انا بتكلم عن محمد حجازي اللي رافع قضية علي الدولة عشان يشهر مسيحيته هو ومراته وابنه
كان صاحبي وزميل دراسة
ومن معرفتي بيه غاوي شهرة وامعة وملوش شخصية ومش من النوع اللي له موقف اساسا في اي حاجة
بالضبط عامل زي عادل امام في شاهد مشفش حاجة..نفس الطريقة ونفس الطباع
السؤال اللي بيفرض نفسه
انجلترا او فرنسا مش فيها مسلمين؟؟
والمسلمين هناك اقليات؟؟
حد من مسلمي فرنسا طلب تعديل دستوري يمنع ان يكون الديانة الرسمية هي المسيحية؟؟؟
السادات قال قبل كدة انا رئيس مؤمن لدولة اسلامية
لا جدال في ان مصر دولة اسلامية وان المسيحيين فيها اقلية
بس مش اقلية مضطهدة
لا جدال في ان الدين عند الله الاسلام
وان جميع الديانات كانت تمهيد لنزول خاتمة الرسالات
الديانة الشاملة لجميع التعاليم والشرائع
لا جدال انه لا اكراه في الدين
من شاء ليؤمن ومش شاء ليكفر
الجميل بقي انه استشهد بالايه دي بالذات وقال ان الاسلام بيدي الحرية للانسان انه يكفر لكن ميديهوش الحق انه يؤمن بديانة تانية
اكيد شايفين حجم تفاهة التفكير...تفاهة كومبو حجم عائلي مش كدة؟؟؟؟؟؟؟؟
معتقدش ان الاسلام خسر كتير لما محمد حجازي ارتد عنه واعلن انه مسيحي
ومعتقدش ان حد مصدق المسلسل البايخ اللي بيقوله
اللي يسيب دينه عشان مش مقتنع بيه سهل يخون بلده عشان مش مقتنع بالنظام سهل يرمي مراته لو حد اقنعه بست تانية وسهل يرمي ولاده عشان مش مقتنع بيهم
ومش محمد حجازي اللي يستاهل الضجة دي

19 comments:

girl's meekness !!! said...

بعد السلام عليكم يا احمد عيسى
اولا انا اول مره اسمع عن مرض اسمه العصاب الاكتئابي ده بس لو انت بتقول ان الاعراض دي هيا اعراض المرض الانبساطي ده يبقى اكيد انا كمان عندي المرض ده و كمان كل واحد مصري طموح حبتين .. لما تلاقي دكتور للمرض اللي شاغل كل شاب خريج مش لاقي شغله عدله قولي نروح معاك..
ثانيا يا احمد ما تتعبش نفسك .. ماما الحكومه فعلا لو عايزة تخلي الكهربا و الميه زي كروت الشحن هتعمل .. انا سمعت كمان عن موضوع النت اللي يديك 2 جيجا بس في الشهر .. اللي 2 جيجا دول اللي بينزلوا اصلا من غير ما تعمل اي داونلوود من النت اصلا..
ثالثا حجازي ده ما يستاهلش اني اشغل سطور اكتب فيها عنه لان ده انسان مريض اصلا و ده لو عرف دينه الاسلامي اصلا ما كانش ارتد عن دينه و بعدين ثواني ما كلنا مسلمين لفظا فقط فينا اللي متمسك بدينه و فينا اللي اسمه بس كده مسلم بس هوه يعرف ايه عن دينه ؟؟هيا دي المشكله.. ممكن اي حد يضحك عليه ب اي كلمتين و يعمله غسيل دماغ و يخليه يرتد عن دينه تحت مسمى انه اقتنع قوي بالدين الجديد...... احنا ماخسرناش اي حاجه لتركه لدينه ..وربنا يهدي الجميع
طولت عليك يا بشمهندس .. انا سعيده لاني اول المعلقين.. نورنا بزيارتك

SAKAyAR said...

فيه ايه يا عم ابو عيسى؟؟
داخل شاايط في الجميع وضارب اتنين على أول البلوج علشان أعرف أقابلك ... ايه الكلام الجامد ده؟؟
أولا علشان تريح أعصابك متقراش جرايد خااالص
وثانيًا المشكلة مش في شحن المياه ولا الكهربا ... المشكلة تبقى شااحن ويقولك الشبكة واقعة
والبلكونة أديك عرفتها متبقاش تكتب مذكراتك هناك يا سيدي
ومحمد حجازي ده ممكن ربنا يهديه ويصلحه ويبقى حد كوييس ... وإن مبقاش كده وفضل على ما هوه عليه يبقى ربنا يحرقه ومفيش مشااااكل خاااالص
انت منرفز نفسك ليييه ياااا عم ... أديني حليتهالك ببساطة
بس خلااااص
تحياتي

buffy said...

ahmed b3d elshar 3lek ya gamil mt2olsh kda b2olk hwa men m7md 7egazy dah

Ana keda said...

اللي يسيب دينه عشان مش مقتنع بيه سهل يخون بلده عشان مش مقتنع بالنظام سهل يرمي مراته لو حد اقنعه بست تانية وسهل يرمي ولاده عشان مش مقتنع بيهم
ومش محمد حجازي اللي يستاهل الضجة دي

عفارم عليك عفارم يعنى
انت راجل جدع والله
بص قول وسمعنا كمان وكمان

gogo we bas said...

تمااااام يا بشمهندس كلامك بيأكد وجهه نظر عظيمة قوى.. هما فاهمين اكتر

دى جملة قالها اجدى الوزراء المبجلين امبارح فى المؤتمر القومى للشباب لما واحد قام قاله ليه حضرتك محسسنا ان ماعدش فيه اى مشاكل فى مصر وبتقول ان فرص العمل مافيش اكتر منها طب يبقى العيب فى مين ؟شهادات واخدنا تعليم واتعلمنا قولى بس.. رد الوزير المبجل قالو (مش ذنبى)وبعدين حس انه اتزنق وقال كلمة غلط قام صلحها وقاله الحكومة ادرى بحال الشعب وعارفين ان الحياة كل يوم فى تحسن والمستوى الاجتماعى للشعب بيعلى ...
حاجة تحرق الدم والله

**********************
بالنسبة لفكرة الكهربا والمية اللى بكارت فبصراحة فكرة عظيمة من شخصيات اعظم (هنقول تانى.. هما ادرى)ده احنا شعب غريب والله دايما نعترض كده !!!يا سااااتر

one true thing said...

ههههههههههههههههه
هو أكيد الطبيعي اني مش اضحك
بس اصل انا كمان عندي
العصاب الاكتئابي الانبساطي
بس يعني وبعدين ماهي البلد كده
لا بتصلح ولا هتتصلح سعد زغلول قال ايه مفيش فايده
هدي نفسك بس انت فيه عيله محتاجلك
وبورسعيد تتضيع من غيرك
هتودي نفسك في داهيه وتعمل فتنه طائفيه علشان محمد حجازي
المهم انك تعيش وخالص
من غير مشاكل ولا وجع دماغ
تحياتي يافندم
عودن احمد بعد غياب طويل
يارب يكون كان خير

بندقه said...

السلام عليكم
ازيك احمد

سلامتك من العصاب المش عارف ايه ده
وده جالك من ايه بس خليك فى جرايد الحكومه
مالك انت والحاجات الوحشه التانيه دى

الحكومه ناويه تخلى كل حاجه كارت
الميه والنور والغاز
واخرتها تدى الشعب كارت احمر وتخلص مننا

البلد دى بلد اقليات
مين معاه فلوس.... اقليات
مين عايش مبسوط...اقليات
مين بيشتغل فى البلد... اقليات
هى دى مصر

dr.Roufy said...

ليلة القبض عل البلكونة
ههههههههه
تفتكر؟

فعلا الواحد جاله كل انواع العصاب الاكتئابي والانبساطي..والبتنجاني كمان
مابقيتش عارفة..ايه آخرتها
والمشكلة اني مش باعرف أكبر ..أو انفض

حياتنا كلها..ازدواجيات..ومتناقضات
وغليان..والواحد ماعندوش غير دماغ واحدة والله

maha said...

سلام عليك يا احمد
احم انا عارفة انك زعلان مني ...خلاص بقي معلش
..
البوست محسسني بجو من الاحباط غلب بسيكوباتية عالية من الاحاسيس المتداخلة في ال..
ايه الكلام الكبير ده ؟؟؟الظاهر ان الفيوزات عندي ضربت خالص ...بس ما هو ده النتيجة الطبيعية و التطور الطبيعي للعقل البشري لما يشوف العالم من منطلق حقيقي بطريقة فيها كل الصراحة دي ... البوست صورة جميلة اوي للكوميديا السوداء
....
تحفة بجد البلكونة دي ...دي طلعت مافيا لوحدها ..تفتكر كانت سبب في كام ازمة ..و كام حرب و انقلاب ؟؟
و النت و الكهربا و المية ؟؟؟
طريقة الكتابة بالعامية مبتكرة منك لانها مش دايما بتكون وسيلتك في المدونة للكتابة و ان دلت اظن بتدل علي النفسية المتفاجئة من الواقع اثناء الكتابة
...
هو الي حد ما كلامي في الرد ده انا مستغرباه اوي ...بس الظاهر ده برضه نتيجة لمنظور جديد من اثر البوست
اااا ...م ..ززز <<
...يلا انا همشي قبل ما اكتب حروف هندي ..انا مش عارفة انا بكتب ايه
:)
سلام
مها

عين ضيقة said...

أممممممممم

طيب ماانت قلت كل حاجة اهو

أقول انا ايه بقى؟

أقولك... أنا هاجى تانى

سلام

أحمد عيسي said...

ونرجع تاااااني نرد ع التعليق بس في ملحوظة..
طبعا كالعادة اعتذار اني مش منتظم في اني ارد علي كل اللي بيشرفوني بس بجد انا في ظروف نفسية اكتر من سيئة وده واضح من عدم اهتماماي حتي بالتعليق عند اصدقائي او ردودي ع التعليقات او شكل المدونة اللي زي مهو بقاله فترة
ربنا ييسر الحال وسامحوني معلش

مكنيز:زيزي اللي جوه عالم المدونات بقالها كتير بس مكنتش بتعلق شرفتيني بتعليقك يا زيزي وباول تعليق ومش زيارة عندي
انا اتعمدت اني اقول اسم المرض عشان اللي بيقول انه متضايق من غير سبب يعرف ان حتي ده له اسم طويل عريض باللاتيني في علم النفس!!
وده يحسسك بفخر ..في عالم جامد قوي عرف انتي عندك ايه ياسلاااام..حاجة تشرف بجد
ماما الحكومة مستكترة علينا نبقي شعب حلو شغال كل حاجة خط سايبه يعني قالت لا بقي..لازن يتعلم التوفير زي اعلان فيري..واهي ورانا لحد متعلمنا الا..التوفير
وحجازي...لسة الموضوع مخلصش
شرفتيني يا زيزي

ساكايار:ايه ياعم ابو ساكايار؟بقي انا اللي شايط؟طب انا معنديش حد يمسح الدم الطرطش علي باب المدونة
والله تصدق بعد كلامك هديت..لا عندك حق فعلا..كل حاجة محلولة والموضوع مش مستاهل نرفزة
بس تعالي المرة اللي جاية من غير متموت حد
شرفتني في اول زيارةل يك عندي واتمني متنساش بقي العنوان

بافي:حجازي زي مانتي قريتي واحد امعة شاف انه حيسلط الاضواء عليه لمجرد انه يفبرك قضية انه عايز يبقي مسيحي وان الحكومة مش موافقة انه يبقي مسيحي وحيموت مجرد ان الاضواء تتشال من عليه
واحد ميتساهلش اساس كل الضجة دي
احتمال البوست اللي جاي اتكلم عن الموضوع ده بالتفصيل
نورتيني يا نهي

انا كدة:طلباتك اوامر يا باشا
اكتشفت الفترة اللي فاتت حاجة لذيذة قوي
انا مصاب بمرض اسمه العصاب الاكتئابي الانبساطي
طب والله فرحت قوي ...
...
يارب بس متزهقيش من كلامي عشان بيبقي دمي تقيل ساعات لما بتكلم جد وفي السياسة..جايز عشان بشوف الدنيا بنظارة شمس ريبان فيميه ..انا بقي اللي كدة
نورتيني..مع انك اتاخرتي بس منوراني

أحمد عيسي said...

جوجو وبس:انتي بتتكلمي ايه اكيد هم فاهمين اكتر
هو احنا بنفهم؟؟؟
ربنا يخليلنا ماما الحكومة

وان ترو ثينج:مممم
ممممممممممممممممم
والله يابنتي انا كنت في حالي بس مرة بالليل كنت بهيس كتبت الكلام ده
انا عارف ان بورسعيد متمشيش من غيري
يعني لو حصل لي حاجة البلد تضيع؟؟؟
ولا فتنة طائفية ولا حاجة كل سنة وانتي طيبة والله البني ادم ده ميستاهلش
نورتيني


بندقة:اخر التعليق ده عجبني قوي مع ان فيه نظرة شبه تشاؤمية
فعلا بمرور الوقت مصر بلد اقليات
وللي قرا الة الزمن اهربرت جورج ويلز
مصر حتبقي مورولوك وايلوي
نورتيني يا بندقة

دكتور روفي:ايه رايك بقي في البلكونة
افتكر وافتكر كمان
اصل مش معقول الصدف توصل لكدة يعني ولا ايه؟؟؟
برضه اخر التعليق بتاعك جامد بجد
مشكلتنا ان عندنا دماغ واحدة رغم كل المتناقضات
تحياتي يا دكتور ونورتيني

مها:يا مهااااااااا
ايه يابنتي انتي فين
ايه التعليق العجيب ده..هو انا توقعت كمية استغراب معينة عشان البوست جديد بس مش لدرجة انك تعلقي بالهندي!!!
انا عارف ظروف النت عندك مش حقولك متتأخريش تاني
بس متتأخريش تاني!!
يلا سلام ونورتيني كالعادة

عين ضيقة:يبقي حستني بقي لما تيجي تاني
بس نورتيني

يلا سلام

princess dodo said...

العصاب الاكتئابى الانبساطى

تعرف ان المرض ده طلع منتشر اوى س محدش يعرف اسمه
*******

نفس الشعور بيجيلى لما اقرا الاخبار وبعدين الدستور
بحس ان كل جريده بتتكلم عن بلد غير التانيه

***********

وموضوع مسلسل البلكونه ده
جامد اوووى
انا شخصيا لو اتعرض هتفرج عليه
وعندى استعداد انتجه واخرجه وامثل فيه كمان
بس اى دور غير دور البلكونة

هههههههه

بوست جميل اووووى

تحياتى ليك

شباب روش طحن said...

التضارب ف المشاعر ده مشكله كبيره جدا ساعات بتحصلي لكن انا بقيت ما بفرحش إلبا لما أكون أتكدت إن نا مش حازعل في القريب العاجل وبناءا علي ذلك بقيت بفرح قليل جدا لأ هو انا تقريبا ما بفرحش خالص

وبصراحه التضارب في كلام الجرايد بيجيب إكتئاب وبيخلي سؤال غريب يزن في دماغك هو فين الحقيقه؟؟ علي رأي محمد منير

وقصه حجازي في إعتقادي الشخصي هي مجرد تمسيليه يعني هو موجه من الخارج لأهداف معينه ربما لا يريدها أقباط مصر أساسا

أحمد عيسي said...

برنسس دودو:مهو عشان منتشر ومحدش يعرف اسمه مكنش حد عارف انهممكن تكون حالة مرضية
دلوقتي زي اوسكار وايلد مبيقول الطبيعة حتحاكي الفنان..يعني كل واحد حيحصله كدة حيقول انا عندي عصاب اكتئابي انبساطي زي الواد عيسي ماقال وممكن يكون دي حالة عرضية وخلاص
يعني مش اي حد يحصله كدة يبقي عنده الليلة دي
بلاش دور البلكونة..تحبي تاخدي دور العمود؟؟؟؟
نورتيني يا دودو ..

شباب روش طحن:انا مش من هواة نظرية المؤامرة
مش معني ان حاجة حصلت يبقي موجه من بره لاهداف معينة ممكن يكون غاوي شهرة والسلام
اهداف معينة ربما لا يريدها اقباط مصر اساسا..ان مش عارف من امتي كان فيه اهداف سياسية معينة بتحرك مسلمي واقباط مصر..عن نفسي انا عمري محسيت بالموضوع ده الا اليومين دول
ارائك جامدة..وكل رد فيها عايز رد لوحده
نورتني وشرفتني ولينا كلام تاني

يلا سلام

بيجاسوس المصرى said...

زغرط يا بيجاسوس
البلد بتخرب يا جماعة
الله اكبر البلد بضيع
لوللولولولولولولولولولولى
المشكلة يا احمد اننا كل ما نفتح جريدة نلاقى حاجة شكل
كل جريدة بتتكلم عن كوكب تانى مش بتاعنا
و اللى يغير دينه
و لسه البد هتخرب اكتر من كده وربنا على الظالمة اللى ضيعوا البلد و حسبنا الله ونعم الوكيل

أحمد عيسي said...

بيجاسوس:صباح الخير يا عم الثورجي انت لسة واخد بالك انها بتضيع دلوقتي؟؟؟
اذيك يا معتز
فكرتني بهنيدي
زغرطو يا مطربين مصر العندليب بيولع
ماعلينا يعني
مفيش كلمة تتقال بعد كلمتك
حسبنا الله ونعم الوكيل في الناس اللي خلتنا فس اسفل الهرم مع اننا المفروض نبقي في قمته

الخيط الرفيع said...

مش عارفه ارد علي ايه ولا ايه
بس تعرف انا اتخضيت جدا من المرض اللي قولت عليه
ومش عايوزة اقولك انه عندنا جميعا ولو هبط بيقوم تاني من الهموم بتوع كل يوم
والبلكونه دي انا قررت اكتب مذكراتي هناك عشان اعرف ايه زتونه اللي بيحصل هناك

وحجازي صاحبك دا سيبه ماهو عامل زي اللي بيخبط راسه في حيطه وهو الخسران

والكروت دي لزوم عربيات ومزاجات اولاد الوزراء تقدر تتكلم
ولا حد فينا يقدر يفتح بقه

بلدنا عيزة معجزة بإيدينا
بس للاسف ايدينا مش فاضية

will said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
情趣用品,情趣用品,情趣用品,情趣用品.情趣,情趣,情趣,情趣.
視訊聊天室

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人