المحاكمة

دخل القاضي صارم النظرات اشيب الشعرالي قاعة المحاكمة فوقف الجميع برهبه حتي جلس

الفاضي يقول بصوت ملول منهك..صوت من شهد عشرات القضايا من قبل

قضيتنا ايها السادة قضية ليست بالسهلة..وهي تشغل الرأي العام منذ شهرين..المتهم

يقف المتهم ومحامي الدفاع بانتظار مايقوله القاضي

انت مذنب ام غير مذنب؟

محامي الدفاع شاب واعد ممتلئ حماسة:غير مذنب ياسيادة القاضي

القاضي يهز رأسه في ملل من توقع هذا

وكيف تبني دفاعك؟

محامي الدفاع يبتسم بثقة:نحاول اثبات انها حالة جنون مؤقت ياسيادة القاضي دفعته لارتكاب مافعل

يلتفت القاضي لممثل الادعاء فيقوم من مجلسه بثقة قائلا:نبني قضيتنا علي انه مذنب ياسيادة القاضي

فكر القاضي..ستكون معركة شرسة اذن..ينظر لممثل الادعاء قائلا في ضيق

المتهم لك

ممثل الادعاء ينظر لي شذرا ثم يبدأ استجوابه

اسم مدونتك ؟
لحظات

لماذا اخترته.. ماذا تقصد به ؟
الحقيقة ان الاسم ده كان في دماغي من زمان..تفكيري في منظومة عمر الكون كله حضارات قامت واندثرت وناس عاشت وناس ماتت واختراعات وثورات وحروب..فعلا اي وقت بيعدي عبارة عن لحظة في عمر الكون ساعات مش بحس للوقت اهمية الا لما فعلا يبقي له اهمية .

هل فكرت في إغلاق المدونة.. والسبب ؟
لا..لاني عايز اقول كتير..ممكن ابتعد شوية..وممكن اعمل تنحي تكنكيكي عن المدونة زي عبد الناصر اشوف مين اللي متابعني فعلا ومين اللي حيحمد ربنا اني بطلت اكتب وقفلتها..بس اغلاق المدونة لم يخطر ببالي خالص لدلوقت.

صورتك فى المدونة ..رمزيتها ؟
صورتي ياباشا والله صورتي..مالهاش رمزية ولا قصدي بيها اي حاجة..يعني لا انا شيوعي ولا انا يساري ولا اي حاجة…انا في السليم ولو مش عاجباك اشيلها ياباشا

طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
انا بكتب اللي بحب اكتب فيه....وممكن يكون كل اللي انت قلته..سياسة ..قصة ..عبث ..كلام فاضى اي حاجة بلاقيها اتبلورت في شكل معين والاقي سيل كلمات نازل بيزن علي دماغي..

لماذا تدون أصلا ؟
مش احسن منحرف واشرب بانجو
بدون لاني بحب الكتابه..بدون عشان احقق حلم قديم عندي محدش يعرفه وهو الصحافة..اني اكون صحفي..بدون لان الفترة دي من حياتي فترة خصبة جدا ومحتاج اعبر فيها عن نفسي..
ده غير اني اساسا قريت كتير..والافراز الطبيعي للقراءة هو انك يبقي لك اسلوب وفكر ورؤية تكنب بيها…انا مش كاتب من بتوع الخنفشارية ولا بعتبر نفسي كاتب اساسا انا مجرد واحد عادي في ايده شوية كلمات بيعبر بيها عن اللي جواه..

أحلى جملة قيلت لك فى وصف مدونتك ؟
ها…؟
اعترض ياسيادة القاضي لانها لا تخدم الغرض الاساسي من الاستجواب
اعتراض مقبول

التعليقات بالنسبة لك ..أهميتها ؟
التعليقات معناها ان في حد قرا وعجبه اللي قراه فدخل يقول رايه..اكيد التعليقات مهمة لانها مؤشر التفاعل بينك وبين المدونين ..ده اللي يضمن ان مدونتك تعيش لانك تكتب ليقرأ الاخرين مش عشان انت اللي تقرا
اكيد ببقي سعيد بتعليقات مدونين جدد-يعني تبقي اول مرة ليهم -وببقي سعيد بتعليقات مدونين مخضرمين-زي مثلا سمراء النيل وجيرونيمووقصاقيص مشاعروالدكتور الشمسي..في ناس ببقي مستني تعليقاتهم مع ان فيهم ناس مخاصماني زي روزاليا..مها غربة وطن و اسراء وتسنيم وعلي وزيفاجو
بس في ساعات بكتب ومش بهتم بالتعليقات..قلت لاختي الصغيرة مها كلام فارغ قبل كدة انتي بتكتبي عشان تعبري عن اللي جواكي ولا عشان تزودي الرقم جنب كلمة التعليقات؟ هي دي الفكرة اني بعبر عن حاجة جوايا..محدش يقدر يقول ان الثورة الفرنسية ركيكة او مفتعلة لانها واقع حصل فعلا ..وانا بعبر عن اللي جوايا برغم تفاعل الناس معاها او لا بس ده ميمنعش اني ببقي سعيد جدا بالتفاعل...والتعليقات
اي حد يتفضل ينورني والله ببقي سعيد جدا بتشريفه عندي..واللي مذكرتش اسمه اكيد مش حيزعل لان..لان محدش بيزعل مني اساسا…
رجاء من السادة المحلفين عدم الالتفات للاجابة ويتم حذفها من مضبطة الجلسة لانها لا تخدم سياق القضية

أحلى بوست كتبته ..ضع اللينك ..ثم اذكر لماذا ؟
كل مرة ببقي عايز اكتب البوست اللي حيغير تاريخ عالم التدوين..وحيتفاعل معاه االناس كلها والاقي اراء وردود ومناقشات …بس للاسف بنسي فبكتفي بالموجود
بس فعلا انا بحب اي بوست اكتبه حتي لو طلع عيني ونشرته الساعة 3الصبح والنت بعدها فصل ومشفتوش الا بعدها بيومين علي البلوج عشان الويندوز وقع..انت لو مخلف عيال حتحب واحد اكتر من التاني؟

أفضل مدونة قرأتها ..يمكن اختيار عدة مدونات ؟
علي ايدك اليمين وانت داخل ياباشا..لحظات اخرين..ناس جامدة قوي وانا بتابعهم جميعا

لا مزيد من الاسئلة يا سيادة القاضي

يلتفت القاضي الي محامي الدفاع قائلا

المتهم لك

أفضل بوست قرأته ..يمكن اختيار اكتر من لينك ؟
فيه كتيييييييييييييييير..انا مش حعلم بطباشيرة حمرا علي البوست الكويس اللي بقراه..لكن في حاجات كتير بتعلم معايا قوي..بس الجملة اللي هزتني فعلا كانت كتبتها نهي"هيه فلسطين احتفلت بعيد الحب النهاردة؟..حسيت بمنتهي السطحية اللي العالم بيفكر فيها وسط الماسي اللي بتحصل

هل خسرت صديق بسبب كتابة هنا ؟
لا طبعا..والاختلاف في الرأي لا يفسد للود اي قضية..بس في قضايا معينة و

حد قل ادبه فى التعليق ..ايه رد فعلك ؟

واحد بس..ورديت عليه في يومها في بوست فلتمت غيظا..انا مش بسيب حقي ياباشا..
واحد مجهول لسبب مجهول دخل بيشتمني قمت انا قافل تعليقات المجهولين..اللي يدخل يلعب بقواعد اللعبة بقي ويحترم نفسه..

اعترض ياسيادة القاضي لما فيه من تهديد ضمني
مرفوض…للمتهم الحق في ابداء وجهة نظره

أسوأ مدونة ..الاجابة اجبارية ..يمكن اختيار عدة مدونات ..هما كتير اصلا ؟
والله ..شوف ..كل المدونات المحتوية علي بذاءات اي كانت..انا بشوف مدونات بيبقي فيها كلام خارج ..وقلة ادب بصراحة بحس ان الناس دي نفوسها مريضة ..المريض يتعالج بس ميقرفناش
مدونات المثليين…انا مش عارف اذاي واحد عنده الجرأة انه يقول "انا ربنا خالقني كدة بميل للجنس بتاعي"..واحد او واحدة وتلاقي كلامهم بصراحة يقرف..ممكن يكونو ذوق علي المستوي الانساني بس زيهم زي الحشرة الزرقا الغريبة اللي بتطير حواليك…مش مضرة بس انت بتشمئز منها..اي حاجة بيعملوها حرام وبتهز عرش الرحمن …

انا ضد اي حاجة يبقي حد عارف انها غلط وبيحاول يقنعني انها صح..بهائيين علي مثليين علي اي تقاليع تانية بتطلع..انا ضد حرية الرأي لما يبقي الغرض منها اني اطلع عشان اشتم وبس ..حرية الراي اللي اعرفها عبارة عن نقد بناء انا مش موافق عشان كذا..مش يلا يا ولاد المش عارف ايه ويبقي اسمها حرية راي..

أسوأ بوست ؟أسوأ مدون .. ؟
حضرتك اجابتي صريحة…اسوأ مدونة مش حيكتبها جزار اكيد حيكتبها اسوأ مدون واسؤأ بوست حيبقي في اسوا مدونة اللي كاتبها اسوأ مدون..شفت الواد ابو جيل في شعره اللي بيــ

هدوء في المحكمة

تحديث

يؤجل الحكم حتي استدعاء كل من

مها غربة وطن

تفاصيل علي

الكلام نوعان

سيرنديبتي

وهج الشمس

قصاقيص مشاعر

دكتور زيفاجو

ميمو مها

انا افكراذن انا موجود

محمد جودة

فوضي الحواس..شيرمين

هبه قلب يحترق

بيجاسوس المصري

عمر مشروع بطل

اميرة

شيماء..صحفية مع ايقاف التنفيذ

محض روح

مواطن منصوراوي

همسات قلب

ساهر

محكــــمة

ولكل من حضر المحاكمة رجاء اللي عنده اي حاجة تفيد القضية يجاوب علي الاسئلة كفرد من المحلفين