وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Thursday, February 15, 2007

أسطورة الجانب المظلم

جالي تاج تاني...المرة دي تاج غلس جدا..التاج ده جالي من مدونة -بكسر الواو وفتحها - قريبه من قلبي قوي.. مدونة اختي الصغيرة الكلام نوعان كلام مليان وكلام فارغ...أوم ايه بقي هي بعتتلي تاج قال اقول عن 5 حاجات محدش يعرفها عني خالص..الصعب بقي في الموضوع اني بحاول افاجئها بحاجة هي متعرفهاش اساسا ...

أولا: عندي فوبيا المرتفعات..برغم من ان شغلي مرتبط بالادوار العليا الا اني مش بحاول ابين الموضوع ده خالص..مش بحب اقف كتير في الشباك..ومش بحب انزل السبت لحد عشان في اوقات معينة بيجيلي دوار

بالمناسبة احنا ساكنين في السادس وكل قرايبنا ادوار عليا كمان

ثانيا: بكره الطوابير جدا واكتر يوم اسود في حياتي يوم محد يقولي هات عيش ولا ادفع فاتورة..مش معني كدة اني مش بحب النظام بس الطوابير في مصر كابوس فعلا لاننا -سوري -شعب همجي..اكره فعلا اني اقول كدة بس احنا كدة فعلا وشوف اي طابور في اي فيلم امريكاني حتحس باللي بقوله

ثالثا:مواعيدي وحشة جدا جدا..يعني لو معادي 8 بنزل من البيت 8...واي مشوار بعتبر انه بيتاخد في 10دقايق حتي لو في اخر الدنيا...علي رأي والدي"فاقد زمن"..بس علي فكرة انا مواعيدي بدأت تتظبط ..يعني الموضوع حياخد وقت بس في تقدم يعني

رابعا:في ثانية ممكن اطلع حجة مقنعة جدا لاي حاجة بعملها..ومقنع جدا علي فكرة لدرجة ان لو حد زعلان مني بسبب اي حاجة بيغلط نفسه علي طول...بصراحة مش بحب اطلع غلطان..بس ده مش في كل الاحوال يعني لما بكون مزنوق قوي"مش كدب عمال علي بطال..ده بس فك زنقة"..طبعا الكذب حيفضل اسمه كذب صح ..بس مفيش انسان كامل ولا ايه

خامسا واخيرا الحمد لله:انا بتأثر بسرعة جدا بس مش بيبان عليا..وبهرب من احساسي ده بالسخرية والضحك..جايز محدش يعرف بس اول مرة شفت فيلم القلب الشجاع عيني دمعت في اخر الفيلم..حنين قوي كمان بس برضه مش ببين

بره الموضوع يوم وفاة جدتي الله يرحمها..جدتي دي كانت امنا كلنا وهي اللي كانت مجمعانا..متربيين في حضنها يعني هي ربت ولادها وولاد ولادها..انا وولاد خالتي اخوات وانا اخوهم الكبير..يوم وفاتها كنت عايز اعيط..فعلا بس مسكت دموعي عشان اخواتي وولاد خالتي ووالدتي وخالاتي لو كانو شافوني ببكي كانو فعلا انهاروا..قعدت اهدي فيهم وانتهزت فرصة اول مدخلت اوضتها لوحدي عشان اشوفها لاخر مرة وقريتلها الفاتحة عيني دمعت ومسحت دموعي قبل مخرج

تتردلك في الافراح ياميهو..بس خلي بالك التاج اللي جاي اصعب وانتي مردتيش علي التاج ده لسة اساسا

يلا سلا..اه صحيح نسيت..مين بقي اللي ندبسه في التاج ده؟

اللي دبستهم في التاج اللي فات

فتافيت سمسمة...تفاصيل علي...الكلام نوعان ...سيرنديبتي..وهج الشمس..زحل الفلكي...دكتور زيفاجو..ميمو مها

وكمااااان

مها غربة وطن-انا افكراذن انا موجود-محمد جودة

وأي حد موصلوش التاج ده يجاوب عليه انا مش عايز ابعت التاج لحد يكون وصله قبل كدة

يلا سلام بقي

وياويله اللي مش حيرد

6 comments:

maha said...

سلام عليك يا احمد
هييييييييييييييييه
انا اول واحدة ارد علي البوست
اولا هية تدبيسة جمدة لان بما ان الخمس حاجات محدش يعرفها تبقي اسرار الي حد ما
بس ححاول ارد عليها بشكل دبلوماسي "شفت دبلوماسي دي جامدة صح؟؟:)
علي فكرة موضوع الخوف من الارتفاعات برده عندي بس انا بخاف اكتر لما بتخيل شكل السقوط من اعلي "ربنا يستر
كمان المواعيد و انا كمان بنزل في المعاد المحدد بالضبط و مش قبله عشان الحق و برده كل الطرق بالنسبة لي مش بتاخد في عقليتي الا 10 دقائق بس و برده ماما بتقول لي انتي معندكيش تقدير للوقت
الظاهر اننا فعلا اخوات .....
حاضر ان شاء الله اجاوب عليه و ميرسي يا احمد
سلام
مها

maha said...

اه نسيت ااقول لك ...فين الجزءالتاني من القصة"اصداءالنهاية"
انا مستنياها جدا لا تتأخر في اتمامها لو سمحت
سلام
مها

أحمد عيسي said...

منوراني يامها والله وعاملة حس للمدونة..
اصداء النهاية خلصت يامها..انتي مكملتيهاش ولا ايه؟..اقريها تاني من الاول وقوليلي رايك النهائي بقي
احنا اخوات فعلا حتي لو مكنتش بتخافي من الاماكن العليا..ابقي شوفي اخوكي بقي بحاجة حلوة ولا بيتزا ..ولا مش بتعرفي اطبخي

يلاسلام

علي الألفي said...

انت كنت قلتلي انك مش هاترد ع التاج ده
المهم اعذرني انا مش هارد ع التاج ده فعلا
لان المطلوب حاجات محدش يعرفها عني
و بصراحة لو كان ينفع حد يعرفها انا متكنتش هاخبيها





وبردو النتيجة بيئة جدا

فوضى الحواس said...

جميل موضوع الأختبار ده
أنا جديد على المدونات نسبيا رغم انى متابع قديم لكن هعتبر الأختبار ده موجه ليا انا برضه وممكن ارد عليه فى اى وقت

لأنى عاوز اتكلم كتير على منطقة الحزن والدموع دى

esraa said...

ياعيني ساكن في الدور السادس وعندك خوف من المرتفعات, أكيد دي مشكله كبيره
ربنا يرحم جدتك يارب.