وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Sunday, February 04, 2007

اعترافات تاجية

قلت في تصريح - غير رسمي طبعا مادام الصحافة منشرتوش - اني لو جالي تاج مش حرد عليه..بس اختي المشاكسة مها "غربة وطن" لقيتها بعتالي تاج مما اصاب تصريحي السابق في مقتل-حلوين الكلمتين اللي فاتو - وخلاي اغير رأيي..حييجي واحد سخيف وغلس يسألني "طب انت ليه غيرت رأيك؟"..وانت مالك ياحشري..رأيي وانا حر فيه
..
س: اية اللي حيحصل لايميلك لما تموت ؟
ج : بعد الشر عليا،وياتري يعني ايميلي اهم مني؟..كدة ممكن احط الباسوورد بتاعي في الوصية عشان انا لو مت الايميل يفضل عايش
نتكلم جد بقي الايميل ده حاجة شخصية جدا وشئ طبيعي لو مت حيموت معايا..."مفيش غير مافريك واحد بس
س: اديت الباس وورد لحد قبل كده؟
ج:لا طبعا..واساسا لو اديته لحد مش حيعرف يكتبه لانه معقد جدا
س: لو اه كانت طبيعة علاقتك بيه اية؟
ج : مديتوش لحد ياعم انت مسمعتش ولا ايه متركز شوية
س : اسمك؟
ج : أحمد
س: اسم الدلع المشهور وسط اصحابك؟
ج : دلع؟ربنا يسامحك قال دلع قال...بيصي النكس ينفع؟
س:عمرك؟
ج :حكمل 24سنة يوم 18/2
س : برجك؟
ج : احم..الدلو –عامة انا مش مؤمن بالابراج ..بس مؤمن بالاحصاء، والابراج ماهي الا فريق عمل احصائي بيشوف الصفات المشتركة في مواليد البرج الواحد وبيعرضها

س : مجال دراستك؟
ج : مهندس مدني
س : شخصيتك نوعها ايه؟
ج : بصراحة شخصية غريبة جدا..انا مش عارف انا مستحملني اذاي...بس ممكن تقول اني الصفة السا يدة في شخصيتي اني عصبي شويتين ودماغي دايما شغالة وناشفة وعنيد جدا

س : المود بتاعك؟
س : بيتغير حسب الحالة اللي حواليا..عامة مود طبيعي لحد ميحصل مصيبة
س: وقت فراغك بتعمل فيه ايه؟
ج : لو مخرجتش مع اصحابي بقعد ع الكمبيوتر ..علي فكرة انا بحب القراءة جدا بس اليومين دول تراجعت شوية عن القراءة عشان مش لاقي حاجة اقراها
س: الاكلة المفضلة؟
ج:اي اكلة ماعدا السبانخ والسمك الصغير..شبار وسردين والحاجات دي....انا علي فكرة بموووووت في الاكل المسبك
س:الصفات اللي اخدتها من بابا؟
ج:عامة انا نسخة بالكربون من والدي..مش تقليد بس شغل جينات بقي... بس اكتر حاجة مشتركة بيننا العصبية والدماغ الناشفة
ج:الصفات اللي اخدتها من ماما؟
تقبل الحقائق وسعة التفكير..يعني انا صعب اندهش من اي حاجة ومش بفكر بطريقة القوالب انا دماغي لامحدودة اقدر استوعب اي احتمال واتصرف علي اساسه
س: اكتر6حاجات بتكرهها؟
ج
اللي يتكلم بصوت عالي أوطريقة مستفزة من غير سبب..خصوصا بقي لو حد اعرفه والاقيه خد جنب او زعل مني لسبب معرفوش..احب احسن انه ييجي يقولي علي اللي مزعله وانا ارد لكن ميحكمش من غير ميعرف مني..عامة انا رد فعلي في الحالات دي بيبقي عنيف جدا ومش بسامح الا اللي يكون عزيز عليا قوي..بس باخد وقت طبعا لحد مرجع معاه زي الاول
لهجة الامر..اللي يطلب حاجة يطلبها كويس او ميطلبهاش اساسا
النصيحة الغير مبررة..يعني واحد ييجي يقول..اسمع كلامي بس..طب ليه ياعم..الايام حتثبتلك..محبش بقي كدة يا يقول يا ميقولش
كاظم الساهر..مع الاعتذار للجميع
الغموض..خاصة بقي لما حد يفتكر انه اذكي مني ويتكلم بلهجة اللي الدنيا كلها في دماغه وكلامه بحساب..لانه مش بيقدر ذكاء اللي قدامه

الخيانة..محبش حد يضربني في ضهري خصوصا بقي لو صاحبي
الازدحام الشديد والصوت العالي
س:اكتر 6 حاجات بتحبها؟
انا عمري مفكرت في الحاجات اللي بحبها..بس عامة انا بحب الافلام الاجنبي والمسلسلات الكوميدية القصيرة الاجنبي..بحب الموسيقي الكلاسيك...بحب اللون الازرق وبحب البحر..بحب الشخصية القوية..بحب الصداقة اللي بجد ..بحب والدي والدتي واخواتي..بحب القراءة والعاب الاكشن..بحب المغامرة..بحب الشعر..بحب شغلي جدا..بحب بلدي..بحب ديني ورسولي ..في حاجات صعب جدا انك بتقول انك بتحبها لانها جواك اساسا
س:الشغل بالنسبة لك ايه؟
الشغل ده حياتي..فعلا انا اكتشفت اني بحب شغلي جدا ونفسي اعرف عنه كل حاجة..وطموحي ابقي متمكن جدا من شغلي..فعلا اتعلمت كتير في الفترة القليلة نسبيا اللي اشتغلتها
س:السفر؟
ج:حاجات كتير..الكمبيوتر ده عالم لوحده ..وقت فراغي معظمه علي الكمبيوتر..شغلي علي الكمبيوتر..الانترنت بالنسبة لي معظمه اليومين موظفه للماجستير بتاعي..والمدونة طبعا
س: هل لديك اقوال اخري؟
والدعوة عامة للناس اللي موصلهاش التاج ده
وياويله اللي مش حيرد...!!

10 comments:

علي الألفي said...

الصفات اللي اخدتها من بابا؟
ج:عامة انا نسخة بالكربون من والدي..مش تقليد بس شغل جينات بقي... بس اكتر حاجة مشتركة بيننا العصبية والدماغ الناشفة



هي دي احلى و اكتر حتة حسيتها في الليلة كلها

شكرا على تمرير التاج
بس انا هاعمل و لا كانه جالي اساسا

أحمد عيسي said...

حنشووووووووووووووووووووووووف ياعلوة والناس دي كلها شاهده عليك

مزمز said...

إجاباتك لذيذة وصريحة ودمها خفيف أوي

بس ليه مش لاقي كتب تقراها؟

فيه أعمال أدبية جميلة جدا نزلت قريب

زي كلبي الحبيب كلبي الهرم لأسامة الدناصوري

أو التلصص للأستاذ صنع الله إبراهيم

أو واحة الغروب لبهاء طاهر أو شيكاغو لعلاء لأسواني ده غير إن ميريت منزلة كذا عمل جيدين لشباب زي باسم شرف وغيره

عموما ما علينا

أنا جيت أهو في بقى الشاي والقهوة؟

أحمد عيسي said...

ياباشا الشاي موجود والقهوة موجودة وكله في التمام دانت شرفتنا ومدونتنا نورت والله

الموضوع مش كدة الموضوع اني لي مزاج خاص شوية في الكتب اللي بقراها

ابقي تعالي تاني..انا حعمل قعدة في التكعيبة بره قريب..علي ايدك اليمين وانت جاي ع المدونة

esraa said...

اجاباتك صريحه وظريفه

أحمد عيسي said...

ميرسي يا اسراء فينك من زمان

أحمد الشمسي said...

أنا مش عارف ايه حب التدبيس في التاجات ده؟
عموما أنا مش حهرب من التاج...
أنا بس هستنى شوية

أحمد عيسي said...

ياباشا براحتك المهم ترد..عشان مبقاش دبستك وانت خلعت

maha said...

سلام عليك يا احمد
لا بجد بداية للتاج قوية جدا و بعدين محدش له دعوة انت حر تغير القرارات ....:)هههههههه
بصراحة ردودك جميلة اوي
بالنسبة للقراية فيه كتب حلوة انا بقراها لو تحب تقرا معايا موجود
عناونها في المدونة بتاعتي
........
" كاظم الساهر..مع الاعتذار للجميع"
اغلب الرجال يكرهونه و ده انا لقيته مؤخرا طبيعي مع ان اصبح فيه ناس بتحبه ....الناس اذواق بقي و كل واحد حر

ميرسي انك رديت علي التاج و فعلا انا فرحت بردودك
سلام
مها

mohamed gouda said...

تصدق زى ما انت لسه عسول ياض
وحشنى كتير و عيب اشوفك ع النت بس لازم اشوفك قريب تمام
معلش انا مقصر مع مدونتك الجميلة اوى ده
بس أنا جاى جاى اهو
اخوك الكبير جودة :)