وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Thursday, January 11, 2007

التفكير المزدوج..1

العلاج السحري وازدواجية التفكير...
معظم الشعب المصري ان مكنش كله.. فهلوي
اه والله..كلنا نعاني من شئ ما اسمه العلاج السحري..العلاج السحري ببساطة انك عايز نعمل اللي يعجبك وتأيف عليه ظروفك..خد عندك مثلا:
"ياباشمهندس..انا بشرب 3 علب سجاير في اليوم وبكح كتير وصدري واجعني" شئ طبيعي اللي يشرب سجاير بالكمية دي يحصله كدة قوله"خلاص متشربش او قلل السجاير" يقول"مقدرش والعيال والقرف ودي اللي بننفخ فيها بدل منطق ونموت .."..ومش حتخلص من الفوايد العظيمة للسجاير اللي حيطلعهالك,يعني انا المفروض اطلع من جيبي العلاج السحري اللي يخليه يشرب 3 علب في اليوم وميكحش..!!
"والله مخنوق ومفلس والمرتب بيخلص في 10 منه..انت عارف بقي كرت التليفون والخروج والفسح..مش عارف احوش حاجة ولا اكون نفسي ولا ولا.."مين مرتبه مش بيخلص اول ميقبضه اصلا ده لو كان شغال؟ تيجي تقوله"خلاص قلل مصاريفك شوية..بلاش 3 او4 كروت في الشهر " يقولك"اذاي..انت مش عارف الظروف والتليفون مهم بالنسبة لي وانا محتاج اغير جو واتفسح و...و..."تقوم انت بقي المفروض تعمل ايه؟برافو..تطلع العلاج السحري اللي يخليه يصرف زي مهو عايز والمرتب يتبقي منه اللي يحوشه عشان يكون نفسه ويتجوز..قال يعني
قيس علي كدة بقي"بحب ومش عارف ارتبط باللي بحبها....باكل كتير ومش عارف اخس.."ودي بقي ازدواجية التفكير..الموضوع ده كبير ومش كفاية كلام عليه مرة واحدة بس بجد انا ببقي متغاظ جدا من اللي ييجي يقول كدة..
اللي خلاني اتكلم في الموضوع ده مشكلة كبيرة مقابلاني اليومين دول...بسهر كتير وانام متأخر ومش بعرف اصحي للشغل بدري..ولو صحيت بيبقي بالعافية..محدش عنده حل....؟
و...اكيد اكيد - ان شاء الله - للحديث بقية...
يتـــــــــبع

6 comments:

Unknown said...

موضوع جميل بجد
وحقيقي جدا
بس دي مش مشكلة اليومين دول بس
دي مشكلة الانسان اللى عاوز كل حاجة ف نفس الوقت
ف كل زمان ومكان
بس يمكن زمان الناس ظروفها كانت أحسن لكن دلوقتي ضغوط كتير بتحكمها
وانا رأيي أن تحط في دماغك هدف معين وتركز عليه كل طاقتك وبعدين بمجرد ما تحققه تنقل على اللى بعد تقدرتحقق اللى بعده
العلاج السحري يا سيدى

ابدأ بالضروري ثم أفعل الممكن تجد نفسك قد صنعت المستحيل

بس انا عندي مشكلة
عاوزة اشتغل في مؤسسة أجنبية واخد مرتب خمس تلاف جنيه بس معرفش لغات ولا كمبيوتر وماليش مزاج اتعلم حتى ومعنديش واسطة
معندكش حل سحري لمشكلتي ;)

علي الالفي said...

العيال غلابة يابو حميد
و مهما حوشوا بيبقى قليل و مش هايعملوا بيه حاجة
يبقى يبعتروه و خلاص
ماهو ضايع ضايع
يعني اللي عايز يشتري حاجة ب عشرين الف
على ما يحرم نفسه و يحوش هاتبقى ب سبعين الف
و هكذا و هكذا

قصاقيص said...

بوست جميل
وفعلا معاك حق ازدواجية التفكير مأساة فعلا...بس ممكن ده يكون بسبب انعدام المقاييس الثابته اللي في حياتنا
وده خلي المجتمع يعيش حاله فصام في التفكير
الحل لمشكلتك.............."سيب الشغل"0
منتظرين بقية الحديث
وميرسي علي الدعوة الرقيقة لزيارة مدونتك

karakib said...

مصباح علاء الدين ... مين مش بيشتكي حاله .. ده شيء أصيل جوا كل واحد فينا
أنه يكره و يحب الشيء في نفس الوقت

أحمد الشمسي said...

لذيذة القفلة الساخرة الأخيرة دي!
كلنا بنعمل كده على فكرة... بس رأيي دي مش مسألة ازدواجية تفكير قد ما هي في العيب اللي عند الكل... كلنا عايزين ناخد كل حاجة من غير ما ندي اي حاجة في المقابل ومن غير ما نقدم ولو حتى شوية تنازلات تخلي الحياة تعدي!

Ahmed EIssa said...

أولا مرسي جدا علي التعليقات الجميلة قوي دي
جيرونيمو:انتي لخصتي الموقف:ابدأ بالضروري ثم افعل الممكن تجد نفسك قد حققت المستحيل..اهم حاجة ترتيب الاولويات..اعرف انت عايز ايه ومتبقاش مشتت.مشكلتك ملهاش حل سحري دي هايزة معجزة..صاحب المؤسسة يموت وانتي تاخدي مكانه

علي:مجتش علي موضوع التحويش وبس..لكن عندك حق

قصاقيص:الموضوع مش بيحب ويكره نفس الشئ الموضوع عباره عن معادلة الطرف الايمن لازم يساوي الايسر يعني عشان توصل لكذل لازم تعمل كيت وتستغني عن كيت..لو الطرفين بقو طرف واحد يبقي الناتج يساوي صفر..صح؟
وانا اللي مرسي علي زيارتك ليا واتمني متقطعيش الزيارات..!!

كراكيب:وتفتكر الواحد لما يشتكي حاله حيعمل حاجة ولا حيضيع الوقت في الشكوي؟

احمد الشمسي:عندك حق بس دي مش تنازلات دي اساسيات واسباب نجاح..و1+1 لازم يساوي 2