وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Tuesday, January 09, 2007

كل سنة وانت طيب

كل سنة وانت طيب!!

السنة دي موسم اعياد..عيد الاضحي ..راس السنة...اعياد اخواننا المسيحيين لذلك اقول للجميع كل سنة وانتو طيبين جميعا و....اه انا فين؟معلش مسمعتكش انا موجود ياسيدي بس والله معرفش اني وحشتكو..بس تصدقو بجد وحشتني مدونتي..وانتو كمان...

ايوة..سامعك ياستي متزعقيش...انا اتشغلت جدا...معلش ظروف مرض مفاجئة مكنتش اتوقعها..وبعدين جالي شغل جديد في الحكومة – متضحكش شايفك اه في الحكومة – مهندس مشروعات في الحي..الله يبارك فيك ياسيدي...كنت بقي بلف اللفة العادية بتاعة الحكومة..ورق ثم ورق ثم ورق...موظف يكلمك كويس وتاني يكلمك وحش..يلا ماعلينا ربنا ياخـ...يسامح الجميع..!!

جينا بقي ليلة راس السنة واحد صاحبي قالي تعالي ننزل..عادي...انا منزلتش راس السنة من حوالي..يعني10سنين كدة ..اه والله من ثانوية عامة...عند بيتزا بينو – مطعم مشهور في بورسعيد – بيحتفلو براس السنة العاب نارية وصواريخ ..عادي ايامها كنا صغيرين بقي ..المهم بقي قلت حيبقي زي ايامها وحتبقي سهرة حلوة ..قرب الساعة 12 لقيت تجمهر..عربيات امن كتير واقفة مفهمتش ليه - بس فهمت بعدين -..شباب كتير واقف قلت عادي الاحتفال بدأ..وبعد كدة بقي..!!

قمة الهمجية...مش ممكن يكون في همجية بالمنظر ده..تكسير زجاج من الشبابيك..شباب بيكسر مصابيح نيون في الشارع..لا وزعلانين ان الشرطة مانعاهم!!..جايز انا مش عارف اوصفلك المنظر كويس عشان ده ميتقالش..لكن ممكن لقطات سريعة تقربلك الموقف. راجل كبير شرطة بيقول انا خايف عليكم ...شباب بيجري..زعيق..واحد واقف بيصور بالموبايل..زجاج بيتحدف..واحد بيجري مع اصحابه ويقول"حكومة حكومة"..واحد بيسال امين شرطة طب نروح منين؟..كوردون ادام بنك بيقع..شباب بيجري من رصيف لرصيف خايف يقع عليه زجاج...يلا يا ولاد ال..مش حتمسكونا...عربيات بتجري خايفة يقع عليها اي حاجة..واحد بيكلم واحد في الموبايل..خلاص حستناك عند محطة البنزين..

هل ياتري قمة الرجولة والاحساس بالذات انك تتحدي شرطة بلدك ؟معتقدش..هل احتفالك بسنة جديدة او سنة غارت في داهية يخليك تخرب البلد اللي انت ساكت فيها..مظنش..طب فيه ايه..؟نتخيل الموقف من غير شرطة كانت حتبقي مدبحة..كله بيدوس علي كله..بس مايحتسب بجد لشباب بلدي انهم مقربوش لبنت ماشية..الموقف بجد اللي يحتسب يحتسب لرجال الشرطة..بجد الله كان في عونها اليوم ده..صحيح كانو في قمة العصبية لكن مفيش ايد اتمدت تضرب حد..مفيش عصاية جت علي حد..

صحيح احنا مش في قمة التحضر لكن علي الاقل ممكن نقبل بحد معين من الهمجية ..الهمجية اللي متحولكش لانسان غابة كل همه يتحدي السلطة..اللي تخليك حيوان متعطش للعنف والمزيد من العنف..
عن نفسي..انا ححاول معملش اي تصرفات همجية في 2007 ..تعالو نبدأ بجد نقيم نفسنا واللي بيعمل اي تصرف ميلقش بأدميته والتكريم اللي ربنا ادهوله ميعملوش..نساعد بعض ونحمس بعض لحاجة كويسة اولها..نبطل همجية..وللهمجية انواع..

و...طبعا للحديث بقية...!!