وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Sunday, January 21, 2007

التفكير المزدوج..2

الطنجيرة وفلسفة القينعور
تيجي تعدل -بلاش تعدل - تقول رأي ولا اقتراح معين في شغل حد نلاقيه يقولك "ياعم ده شغلي..ده أكل عيشي ..دانا
في المهنة دي من ايام الحملة الفرنسية ..".اهم حاجة ميطلعش نفسه غلطان ولا يسيب الورقة فاضية..ماشي
شوية ييجي يقولك..علي فكرة كدة غلط..المفروض تعمل كذا وكذا..أمال الخطبة العصماء اللي قالهالك من شوية دي ايه؟..رد عليه..قوله ..معلش ده شغلي يقولك "ياسيدي لاخاب من استشار..واسمع من هنا وارمي من الناحيى التانية لو كنت غلطان ...!!" بس شفت بقي سهلة اذاي؟
الله يرحمها جدتي كانت دايما تقولي "اللي ع الشط عوام..", شوف اي ماتش كورة أكيد الكلمة دي اتقالت"ماهو اصله مدرب حمار كان المفروض يهجم بـ 3 ويخلي حمادة راس حربه "..صح؟
أكتر من كدة؟.."ياعم دكاترة مين هم بيفهو حاجة؟ المثل بيقولك اسأل مجرب ولا تسأل طبيب عارف ليه..عشان بهايم مش بيهمهم الا الفزيته وبس"..مع الاعتذار للأطباء
حاجة تانية.."المفروض تبقي قوي معاها متعودهاش علي انك تسمع كلامها حتي لو صح..لازم تعرف مين الراجل ومين الست"ويضرب جرس التليفون يقوم اخينا ده عشان يرد تسمع طراطيش كلام.."ايوة يابنتي..صاحبي ع الكافيتريا...مش سهر ده الساع...خلاص مروح..سلام" وييجي بيضحك ويقولك..تعالي بقي موصلك ونكمل كلامنا في العربية عشان جايلي تليفون مهم علي تليفون البيت!!..علي فكرة الموقف ده حصل قدامي بالنص زي المواقف اللي فاتت
وبكدة أي حد ممكن يبقي في لحظة,خبير سياسي درجة اولي..حجة في الاقتصاد..عالم دين..دكتور باطني ..زير نساء..حلال مشاكل ..طبيب نفسي..مدرب كرة..الخ الخ الخ
لا واللي اكتر من كدة انه مثلا ميقولش ان ده رأيه هو..لا ده هو ده الصح وده المفروض اللي يحصل عشان الحياة تستقيم والسلام يحل و"تنام الحملان بجوار الذئاب"..وممكن ميكونش كمان رايه..ممكن يكون راي حد تاني ويتبناه لدرجة انه يدافع عنه اكتر من لو كان رأيه
لا وكمان ايه..قليل قوي اللي يقول معرفش..اسال اي حد عن اي حاجة لازم حيجاوبك..قوله مثلا"عارف الطنجيرة"..يقول وهو مكسوف..ايه الطنجيرة دي..قوله..الطنجيرة ياعم اللي بنبقي مع النجار اللي بيعمل بيها..علي طول حيقاطعك..ااااااه افتكرتها ياعم مسمهاش طنجيرة اسمها ..بالرغم من ان مفيش حاجة اساسا اسمها طنجيرة
فعلا "اللي ع الشط عوام",,,وان شاء الله للحديث بقية
يتبـــــــــــــع

4 comments:

smraa alnil said...

هييييييييه
انا اول واحدة اعلق
عايزة اقولك علي حاجة مهمة

طنجرة دي يعني حلة كبيرة بيطبخ فيها
ودي كلمة شامية

اما كلمة طنجيرة فهي معناها
غبية جدا
ودي كلمة اردنية بس محرفة
ومشتقه من طنجرة

بالنسبة بقي لباقي الكلام
فاللي انا عايزة اقوله ان احنا سمعتنا بره بان الشعب المصري كله بلا استثناء بيفتي
معروفين فعلا بالافتا

بس بجد انا كمان بلاحظها في مواقف مشابهة برضه انا مريت بيها
وبشوفها برضه
ليه بجد مش عارفة
انت عندك تحليل غير انا مش بنحب نطلع غلطانين

أحمد عيسي said...

هيييييييييه سمراء اول واحدة تعلق..
بصي ياست الكل انا كان قصدي ان مفيش عدة اسمها طنجيرة بيستخدمها النجار ..ده اولا
وحتي لو دي كلمة اردنية فانا معرفش العامية الاردنية عشان احكم انا استخدمت اول تحريف جه علي بالي وبيعبر عن حاجة مش معروفة اساسا مكنتش اعرف ان في حد مدقرم في اللغات زيك ممكن يقولي انها موجودة اساسا!!
وفيه كذا تحليل غير اننا مش بتحب تطلع غلطانين.."لاحظي...يتبع!!"
سعيد بمتابعتك جدا..

الكلام نوعان :كلام فارغ وكلام مليان كلام فارغ said...

انت عندك حق النماذج دي موجوده فعلا بينا وان كان يدل على شيء فانه يدل على ان الشعب المصري شعب فهلوي وابسط دليل على كده واحنا كلنا عارفينه
""مسرحيه العيال كبرت لما يونس شلبي قال على اخوه انه لازم يبقى (حدوه )لينا سعيد ثالح رد عليه وقاله اسمها (ندوه) يا جاهل""
طبعا وده ابسط مثال على الافتاءات الكتيره اللى بتحصل في مجتمعنا هنا
وربنا يجعل بيت المحسنين عمار
ويجعله عامر

Mony The Angel said...

lllllllloooooooooooooooolllllllllllz
hwa alsha3b almasry kda aboo al3oreef lol
kollo bifham fe kollo :D