وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Thursday, August 21, 2008

اخبار خفيفة

الحمد لله علي كل حال

الصورة اللي تحت دي معناها اني كالعادة متأخر في الاعلان عن حفل توقيع العدد التاني من مدونات مصرية للجيب

احب ان انوه بمنتهي الفخر ان تم اختيار احد اعمالي في الكتاب..احم...هو مش من باب الاعلان يعني بس اللي يعرف انا نزلي ايه يقولي..اصلي بعتلهم حاجات كتير جدا لدرجة اني خفت يزهقو مني ومينزلوش حاجة

بس بجدبجد انا حاسس احساس جميل جدا وفخر ان حاجة ليا نزلت مع مدونين جامدين جدا..اكيد جامدين منا وسطهم بقي

ربنا يوفق جميع فريق العمل..انا مهما كتبت واتكلمت مش حوفيهم حقهم في الشكرولولا اني بره مصر كان زماني وسطهم دلوقت

لكل اللي اكيد قلقان علي امتحان السواقه احب اطمنه..الحمد لله سقطت..هو مكنش حد متوقع في الشركة اني اخد الرخصة من اول مرة يعني..الابطال بس بياخدوها من اول مرة وانا مش بطل..ولله الحمد مخيبتش ظن حد فيهم وسقطت,,يلا بقي خيرها في غيرها

مستريح..؟كويس...؟..الحمد لله علي كل حال..اول امبارح السرير اتكسر...مفيش في البيت لا جاكوش ولا مسامير ولا حتي سلوتيب عشان اصلحه..النهاردة عملت فيها مهندس الموقع الشاطر...اخدت شوية مسامير من الموقع..جاكوش...حتة خشبة صغيرة ييجي 60 سم...الخشبة دي حتطها في ركن السرير عشان تمسك الجنبين ببعض اسمها في لغة الصنايعية شيكال..قلت هم اربع خمس مسامير في تختة ستين سنتي وكل سنة وانت طيب...اكتشفت ساعتها ان في ناس ربنا خلقها عشان تبقي نجارين..التختة اللي قعدت نص ساعة اعملها كان ييجي واحد نجار في اقل من 3 دقايق ويخلصها وتبقي مية مية...خلاني افكر النجار بيدق كام تختة وكام مربع وكام مسمار في اليوم...يمكن بعد اللي شفته ازود النجارين اوفر تايم..الناس دي بتتعب فعلا
بس علي مين...عملتها وصلحت السرير وبقي زي الفل

4 comments:

maha said...

سلام عليك يا احمد
...اولا انا فرحانه جداااااا اوي خالص ان الكتابات بتاعتك هتنزل في كتاب و يتحقق حلم جميل ليك ...ربنا يحققلك احلامك كلها يا رب ...
ثانيا معلش بقي انت مهندس مش نجار ..بس شاطر اهو عرفت تصلحه مؤقتا ...بس فعلا فرحانه جدا بالبوست و اول ما ينزل الكتاب هجيبه و اقولك رائي من جديد ..سلام يا اديب و يا باشمهندس
سلام
مها

lyssandra said...

ألف مبروك لنزول موضوع بالعدد التاني
وعاوزين نسخه وتوقيع لو سمحت
-----------------

بالنسبة لرخصة السواقه
مش مشكله خيرها في غيرها
انت كنت عاوز تخيب أمل الناس فيك ؟؟
ودي تيجي برده ؟؟

-------------------

حلة أوي حتة خشبة صغيرة ييجي 60 سم .. يعني معدية النص متر بمرحله

والله برده فيك الخير انك هاتزود النجارين أوفر تايم

وكله بسبب شيكال

-------------------------

ياللا كفايه كده

تعليق مختصر أهو

سلااااااااااااام

Lyssandra

أحمد سلامــة said...

الف مبروك يا ابو حميد
إحنا يا سيدي اخترنالك قصة :
" قبل العاشرة "
ومكانش في اي زهق ولا أي حاجة
والقصة جميلة وهادفة ولغتها حلوة وفيها لمحة درامية جميلة وانا حسيتها اكتر كسيناريو أدبي قصير احييك عليه
سعدنا بمشاركتك معانا وعقبال المجموعة المستقلة ان شاء الله
بالنسبة لامتحان السواقة بقى يعني مبروك انك امتحنت مش مهم النتيجة المهم انك امتحنت :) احنا بتوع رخص
من امتى يعني ؟
ومبروك عليك الشيكال كمان
بقولك ؟؟
ليك في الشبابيك ؟

youssif said...

مدونتك ظريفة و بسيطة و رائعة في نفس الوقت الف مبروك النشر ساكون متابع دائم لمدونتك بإذن الله