Sunday, August 31, 2008
Thursday, August 21, 2008
اخبار خفيفة
الحمد لله علي كل حال
الصورة اللي تحت دي معناها اني كالعادة متأخر في الاعلان عن حفل توقيع العدد التاني من مدونات مصرية للجيب
احب ان انوه بمنتهي الفخر ان تم اختيار احد اعمالي في الكتاب..احم...هو مش من باب الاعلان يعني بس اللي يعرف انا نزلي ايه يقولي..اصلي بعتلهم حاجات كتير جدا لدرجة اني خفت يزهقو مني ومينزلوش حاجة
بس بجدبجد انا حاسس احساس جميل جدا وفخر ان حاجة ليا نزلت مع مدونين جامدين جدا..اكيد جامدين منا وسطهم بقي
ربنا يوفق جميع فريق العمل..انا مهما كتبت واتكلمت مش حوفيهم حقهم في الشكرولولا اني بره مصر كان زماني وسطهم دلوقت
لكل اللي اكيد قلقان علي امتحان السواقه احب اطمنه..الحمد لله سقطت..هو مكنش حد متوقع في الشركة اني اخد الرخصة من اول مرة يعني..الابطال بس بياخدوها من اول مرة وانا مش بطل..ولله الحمد مخيبتش ظن حد فيهم وسقطت,,يلا بقي خيرها في غيرها
مستريح..؟كويس...؟..الحمد لله علي كل حال..اول امبارح السرير اتكسر...مفيش في البيت لا جاكوش ولا مسامير ولا حتي سلوتيب عشان اصلحه..النهاردة عملت فيها مهندس الموقع الشاطر...اخدت شوية مسامير من الموقع..جاكوش...حتة خشبة صغيرة ييجي 60 سم...الخشبة دي حتطها في ركن السرير عشان تمسك الجنبين ببعض اسمها في لغة الصنايعية شيكال..قلت هم اربع خمس مسامير في تختة ستين سنتي وكل سنة وانت طيب...اكتشفت ساعتها ان في ناس ربنا خلقها عشان تبقي نجارين..التختة اللي قعدت نص ساعة اعملها كان ييجي واحد نجار في اقل من 3 دقايق ويخلصها وتبقي مية مية...خلاني افكر النجار بيدق كام تختة وكام مربع وكام مسمار في اليوم...يمكن بعد اللي شفته ازود النجارين اوفر تايم..الناس دي بتتعب فعلا
بس علي مين...عملتها وصلحت السرير وبقي زي الفل
Saturday, August 16, 2008
تهييس
في عز المعمعة اللي انا فيها وفي درجة حرارة 63
وفي وسط خلافاتي مع الفورمان السوري المجنون والحداد الباكستاني اللي عنده شلل رعاش"شخصيات حقيقية حتكلم عنها بعدين في قصة حياتي كفاحي يا ولاد الـ....
الاقي تاج طاير حاير جامد جدا باعتاه ليساندرا
ولان التاج عاجبني جدا عايز اجاوبه وانا رايق
في خبر تاني مستني يجيني خبر تأكيده اول متأكد منه حقوله علي طول
وعندي بكرة امتحان الرخصة..ومن اللي بسمعه حاسس اني ممكن اسوق طيارات بالرخصة الاماراتي دي
وحاسس ان المدونة بقت زي الخرابة محدش بيزورها والتراب فيها معشش في كل حتة
وحاسس ان البوست ده ملوش لزمة اصلا بس انا عايز اتكلم وافضفض
في كلمة شفتها في مسلسل scrubs
علي لسان البطل جي دي
"من المزعج ان تشعر بالوحدة حينما يكون حولك العديد من الاشخاص"
Friday, August 08, 2008
Wednesday, August 06, 2008
ياتري ايه اللي حيحصل لو اختفيت؟؟؟
مش بهرج..ايه اللي ممكن يحصل لو اختفيت؟؟؟
ليه بحس ان العالم حيحكون احسن كتير من غيري
اي حد مضايق من وجودي فجاة حيصحي الصبح مش حيلاقيني...اكيد حياته حتبقي احسن كتير
اي حد بيخاف او بيقلق عليا حيختفي سبب خوفه وقلقه..اكيد برضه حياته حتبقي احسن كتير
اي حد معطله مش حيبقاله سبب يعطله...وده اكيد حيخلي حياته احسن كتير
اي حد جرحته حياته حتبقي احسن كتير
..
..
..
انا عايز اخلي كل واحد في الدنيا حياته احسن
انا عايز اختفي
..
..
..
انا عايز اخلي كل واحد في الدنيا حياته احسن
انا عايز اختفي
Monday, August 04, 2008
Subscribe to:
Posts (Atom)