وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Monday, March 31, 2008

تدوينة طويلة جدا سببها الارق


مش جايلي نوم

يمكن عشان في كلام كتير قوي عايز اقوله لنفسي وبفكر فيه مش عارف انام

ويمكن عشان بقالي كتير قوي متكلمتش مع نفسي
انا بخاف قوي اتكلم مع نفسي علي فكرة..ساعات ببقي قاسي قوي عليا
التدوينة دي غريبة قوي علي فكرة..غريبة لاني مش حرتبها..حسيب كل حاجة في دماغي تطلع مرة واحدة..زي علم النفس مبيتكلم عن حاجة اسمها تداعي المعاني الحر...يمكن ارتاح..يمكن اهدي
اهممم

في الاول نتكلم ببساطة شديدة عن اهتماماات اي حد..كل واحد فينا بيبقي مهتم بحاجة..في اللي مهتم بالسياسة..في اللي مهتم بالفن..في اللي مهتم بالكورة
المشكلة اللي بتقابلني ويمكن بتقابل اي حد بتصرف طبعا تسفيه الاهتمامات..ببساطة لو انت بتحب الكورة وبتكلم حد عن الكورة يقولك ايه ياعم كورة ايه وبتاع ايه..يحسسك بالتفاهه برغم انه مش عيب انك بتهتم بالكورة..قيس علي كدة اي حد بيبقي مهتم بحاجة شايف انها مركز الكون...غريب ان اي حد ميبقاش مهتم بيها...يمكن عشان ارائنا بتبقي جزء من شخصيتتنا..محدش بيحب يطلع نفسه غلطان..صعب قوي انك تلاقي واحد بعد جدال بيقول معلش حقك عليا انت صح..الغرور اللي جوه اي حد فينا بيمنعه يشوف الصح والغلط..بمعني تاني بيشوف انه هو بس اللي بيعمل الصح والباقي غلط
مش غريب اني احب الافلام والمسلسلت الاجنبي..مش عيب اني اهتم بالكمبيوتر والاغاني الاجنبي القديمة...مش حرام اني احب التاريخ الحربي والميتافيزيقا والعلوم الفورتية والماورائيات...الغلط في تركيب فئة كبيرة من الشباب اللي اجتمعت انها تحب تامر حسني او محمد ابو تريكة او عمرو خالد او محمد حسنين هيكل وتيجي تسفه اللي بحبه وتطلعه غلط..اسمع ابراهيم الفقي حتلاقي اللي يقولك ياعم الراجل ده اهبل وبيتكلم بطريقة غريبة..سيبك منه وتعالي نتفرج علي ماتش الاهلي..نقعد ع الكافيتيريا نلعب دومينو..نتفرج علي برنامج هيكل...اللي يشوفك بتقرا كتاب عن نشأة اجهزة المخابرات او موسوعة الحروب او اي رواية عالمية يطبطب عليك ويقولك خد كتاب كذا حيفيدك اكتر..النقطة اللي بتضايقني قوي فعلا عدم الاحترام..زي مانت بتحب حاجة غيرك بيحب حاجة تانية وده مش عيب فيه ولا غلط يبقي العيب منك انت لما تسفهه وتتفه ارائه واهتماماته
ليا واحد صاحبي الانتيم جدا بيسمع اغاني تركي..اه والله تركي...اول معرفتنا من ييجي 8 سنين كدة كان بيننا ماصنع الحداد..هو بيتضايق اني بسخر من الاغاني التركي وانا بضايق انه بيسخر من الاغاني العربي اللي بحبها..بمرور الوقت انا اتعلمت اذاي اسمع الاغاني التركي وهو اتعلم يسمع الاغاني العربي..وكل واحد بقي بيحترم ذوق التاني وينقده ويدوقه
مش موضوع تافه قوي لو كل واحد فكر من غير تعصب
علي فكرة انا بعيد اليومين دول عن ربنا وده مضايقني وتاعبني جدا..للاسف مش منتظم في الصلاة..عايش حالة غريبة من التوهان والملل وعدم الرغبة في عمل اي حاجة..تقريبا بقيت مقيم ع الكمبيوترومش بعمل حاجة مفيدة تقريبا..ساعات بفتح منتديات الهندسة انزل كتب..برامج..ورق..مستخلصات وحصر..وطول منا بقلب في المنتديات دي اقعد افكر...الواحد قدامه قد ايه عشان يبقي مهندس بالقوة دي...؟؟حلم حياتي اللي فعلا حفضل اطارده ومش حسيبه اني اكون مهندس بجد...انا متخرج بقالي سنتين ونص دلوقتي..عرفت اللي عرفته ومعرفتش اللي معرفتوش..يمكن عشان البداية كانت غلط...يمكن انا اللي كسلت او الطريق تاه مني في نص السكة معرفتش اكمل..مش حرمي اللوم علي اللي اشتغلت معاهم في اول حياتي واقول هم اللي واللي واللي...اللي حصل حصل وانا مش ناوي ابص تاني ورايا ولا ادور علي مبررات... اللي جوايا دايما في اي حاجة ان بكرة اكيد احسن...مادام انا لسة عايش يبقي النفس اللي باخده دلوقتي احسن وافضل من اللي قبله....انا عارف اني مش غبي..ومش ذكي..انا عبقري
لماابقي مضايق قوي...احس ان السبل ضاقت بيا قوي اقعد افكر اني مليش مكان محدد اقعد فيه وانا مضايق..كتير بيحبو يمشو لوحدهم او يقعدو ع لبحر...مكاني علي كنبة في اخر صالون بيتنا اقعد والدنيا ضلمة افكر في اللي مضايقني..مكلمش حد غيري...من غير صوت افكر..اسرح..افتكر حاجات قديمة حصلت..اضحك اكشرازعق جوايا..بتبقي لحظات طويلة من الجنون..اعترف اني ببقي بيني وبين نفسي مجنون مش ناقصه غير الكسرولة
علي فكرة انا شايف نفسي مدمن...حاجة واحدة بعملها بقالي كتير جدا يوميا ولا هي مضرة ولا هي مفيدة...ويمكن ضررها اكتر من نفعها...ليه اعترفت النهاردة بالذات بالموضوع ده؟؟لاني النهاردة بالذات حسيت انها اقوي مني ..عشان كدة قلت لنفسي اني مش حسمح لحاجة تبقي اقوي مني..اعترفت قدام كل بني ادم حيدخل هنا اني مش حخلي حاجة في الدنيا اقوي مني...ومن النهاردة مش ـ...خلاص بقي مادام مقلتش من الاول يبقي مش حقول

الاسراف...مش قصدي الاسراف في الفلوس...الاسراف في كل حاجة..الاسراف في المشاعر...في العادات..في العبادات...مشكلتي اني لما بتحمس لحاجة ببقي مجنون بيها ومش ببطلها الا لما امل منها...ياريت اقدر ابقي معتدل لاني فعلا في حاحات كتير قوي ببقي مسرف فيها...مشاعري مسرف فيها جدا...صحتي مسرف فيها جدا...ساعات بحس حتي اني مسرف في كلامي..مسرف في صمتي

اكتر حاجة اتخنق منها البني ادم اللي يخبط علي بيت ناس يطلب بنتهم...وبعدين تلاقيه بيعاملها اسوأ معاملة ممكنة عشان فاكر انه لو سابلها شوية حتنحرف او تمشي كلمتها عليه..منتهي التخلف...قوة الراجل اللي انا شايفها تنبع من مدي اتساع افقه...الراجل من وجهة نظري هو اللي يبقي الكون كله متعتق في دماغه وبيطلع منه حتة حتة في كلامه...يفهم اللي قدامه ويعرف يقدره ويعذره...فرق كبير قوي لما خطيبتك تكلمك وهي مخنوقة ومضايقة وصوتها بيعلي وهي بتتكلم تقوم انت بمنتهي العجرفة ترد عليها وتقولها..وطي صوتك وانتي بتكلميني ولا وطي صوتك وانتي بتتكلمي...سوري بقي..لما عرق الرجولة ينقح عليك قوي وانت عارف كويس انها مش بتزعق فيك احتويها وهديها..رد فعلها الاول في موقف زي ده حيكون صدمة...انت مش حاسس بيها..اذاي بقي حتبقي راجلها وانت مش حاسس بيها؟؟
قيس علي كدة الراجل اللي بيشترط ان خطيبته ومراته متشتغلش...متشتغلش علي اساس انك عايز خدامة في البيت بقي مش زوجة؟؟؟
ولا متشتغلش علشان ايه...علشان هو راجل وعرق الرجولة ناقح عليه برضه ومش عايزها تكلم ده ولا ده...او يمكن مش عايزها تشتغل عشان متساهمش في دخل البيت وتبقي دايما في منزلة اقل منه..انا مش شايف لها تفسير تاني غير ان حد زي ده معندوش ادني احترام ولا ثقة بنفسه...لو رجعنا لورا شوية وعملنا كوكتيل مع علم النفس والوجدان الجمعي الشرقي حنلاقي تفسير يصدم
المجتمع الشرقي ربي البنت علي كبت واخفاء مشاعرها...في الوقت اللي بتتخطب فيه بيسمح لها بطريقة او بأخري انها تعبر عن المشاعر دي..ليه قلنا بقي ان الراجل اللي ميخليش خطيبته تشتغل معندوش ثقة بنفسه...اولا بيبقي خايف من انها تقابل حد احسن منه وتفكر فيه بعد متعودت انها تخرج جزء من مشاعرها اللي اتعودت انها تبقي جواها..قيس علي كدة كمان بعد الجواز...غير انه عايزها دايما في منزلة الاخذ مش المانح...الدرجة الاقل اللي بتستني راعي البيت اللي بيجبلها قوت اليوم وده بقي من الوجدان الجمعي العام من ايام رجل الكهف...منتهي التخلف فعلا

مااااااااااااااااعلينا الموضوع ده بيخنقني قوي..وللي حيسالني بعد كدة ..اه...انا حخلي خطيبتي اللي حتبقي مراتي ان شاء الله تشتغل مش حسيبها تقعد...مراتي دي اللي حتربي اولادي لازم تعرف تشيل مسئولية..لازم يكون عندها علم ودراية بالعالم من حواليها..لازم يكون ليها كيانها وشخصيتها متبقاش مجرد ضل ولا ست البيت اللي مش بتتكلم غير عن الطبيخ وقناة فتافيت و حواديت الجارة الفلانية ولا المسلسل العربي العلاني..علي الاقل لما ارجع من شغلي الاقي حد اعرف اتكلم معاه مش بني ادم امل من العيشة معاه

سؤال شاغلني قوي اليومين دول...ياتري انتماءك لبلدك جاي من ايه؟؟؟ياتري لو سافرت بره ايه اللي ممكن يوحشك قوي..البلد ولا اهلك واصحابك اللي في البلد ؟؟؟ياتري لو اخدت اهلك معاك وسافرت بره مش حتحس بوحشة ولا ضيق...مممم..مش عارف بس اللي اعرفه اني بسعي جدا اني اخرج من البلد دي...مش موضوع عدم انتماء واللي حيقعد يغنيلي مشربتش من نيلها وجربت تغنلها والكلام الحمصي ده...الموضوع ابسط من كدة..ببساطة سمعت في الراديو اعلان عاملاه وزارة القوي العاملة والهجرة بتخاطب الشاب اللي عايز يسافر بره يتوجهلها عشان يعرف المرتبات في البلد اللي مسافرها عاملة اذاي وايه حقوقك هناك وترجع وانت مكون مستقبلك بالف سلامة...طبعا حاجة تحسسك بمرارة وانت شاب وفي منتهي عطائك تسمع وزارة في بلدك بتقولك انت ملكش مستقبل هنا اخرج اعمله بره..ولو فضلت هنا ممكن تشترك في المشروعات الصغيرة مشروع المشروم او مشروع المليار ارنب وانسي شهادتك وانزل السوق واشتغل اي حاجة...انا قررت من فترة اني ابعد خالص عن السياسة...الحاج عبده بتاع الفول بيتكلم في السياسة..اي بني ادم مبيشوفش ولا بيفهم في اي حاجة بيتكلم في السياسة.. انا بس الي عايز اقوله لما سمعت الاعلان ده حسيت ان بلدنا متمسكة جدا بالقيادات فوق الستين والسبعين وشايفه انهم خبرة مابعدها خبرة ومحدش حيبقي زيهم في الوقت اللي بترمي شبابها بره عشان يكون مستقبله ويرجع ملوش اي انتماء ليها...
وبرضه محدش يرجع يغني مشرتبش من نيلها وجربت تغنلها..لسبب صغير احنا في بورسعيد معندناش نيل!

في مرة من المرات اتسالت سؤال..ايه اكبر غلطة عملتها في حياتك؟؟
انا قلت قبل كدة اني مش بندم علي اي قرار انا اخدته مادام انا اللي اخدته ..القصة كلها اني شايف الامور بمنظور
اي قرار بتاخده بيترتب عليه خط احداث ماشي بعد كدة
لو اخدته الاحداث بتمشي في اتجاه
لو مأخدتش الاحداث بتمشي في اتجاه تاني خالص
كدة ولا كدة حياتك ماشية علي حسب القرارات اللي بتاخدها
متقدرش تحكم وتقول اذا كان القرار ده غلط ولا لا لانك مشيت في خط الاحداث اللي جه بعد مأخدت القرار مش قبله ومتعرفش لو اخدت قرار تاني كان حيبقي مجري الاحداث اذاي
اللي شاف فيلم تأثير الفراشة
The Butterfly effect
حيفهم كلامي
شوف كلمات الاغنية دي
Que sera sera
whatever will be will be
the future is not ours to see
Que sera sera
خلاصة القول ان المقولة دي رائعة فعلا
لو علمتم الغيب...لاخترتم الواقع
انا حاسس ان دماغي فضت رغم اني كنت عايز اتكلم معايا اكتر من كدة كتير...لاني واحشني قوي..مشكلتي اني مش شايف نفسي وحش للدرجة اللي الناس شايفاني بيها وحاسس اني انتيمي
I am my best friend
قبل مقوم انام بقي مش معني انك تقول نفس الكلام في نفس المناسبة انك بتاع اسطوانات او بتقول كلامك لاي حد...في حاجة اسمها اللزمات او القوالب اللفظية..ابسطها لما حد يسألك اخبارك ايه..ممكن تقوله الحمد لله وممكن تقوله زي الفل الحمد لله في نعمة من ربنا..كل واحد والقالب اللفظي بتاعه...ان الموضوع ده يتاخد عليك بصورة او باخري انك بتتسلي او بتاع اسطوانات او بتقول كلامك لاي حد تقابله يبقي ضيق افق من حد كان اخدك تسليته مثلا ومستني منك كلمة قلتها لحد قبل كدة عشان يمسكها عليك من غير ميعرفك كويس وتبان علي وشه ابتسامة فخر بذكاؤه انه كشفك او
ماعلينا انا بس حبيت اوضح لمن يهمه الامر..واضح اني بهيس فعلا وسلمت نمر وعايز اناااام
صحيح الصورة دي قبل متطق في دماغي واحلق اقرع واخس يعني من الاخر انا بقيت حد تاني غير اللي في الصورة و
تصبحوا علي خـــــــــــــــ

8 comments:

gogo we bas said...

يخرب عقلك يا احمد
وانا اللى فاكراك عاقل

ياعينى عليك يابنى لسه صغير على الل بيجرالك ده...ده زمان كنبة الصالون اشتكت منك ونفسها تعزل

هههههههه


على فكرة .. حلو قوى الفضفضة
حلو انك تفضى دماغك... اللى ماشاء الله واضح انها مليانة حاجات غريبة بس على الاقل اهى ماوقفتش لسه ودى حاجة كويسة يا باشمهندس

وضع طبيعى انك تدخل تنام وتاكل رز مع الملايكة بعد كل الحديث الطويييييل ده

ده انت على كده بقالك سنة مانمتش يا راجل


بس ايه يا عم الكلام الجامد ده عن موضوع عمل المرأة

ده انت هيتهافت عليك نص بنات البلد بعد الكلمتين دول
ده احنا مش هنلاحق على خطابك

على فكرة

انا عملت زيك وبكتب الرد ده بنفس طريقتك... كل اللى بيجى فى دماغى بيتكتب ومنغير تفكير

تصدق حلوة الحركة دى

لينا كلام تانى

أحمد عيسي said...

جوجو:صباح الفل فاكراني عاقل؟؟؟
والله يابنتي كان في دماغي كلام اكتر من كدة بس واضح ان الكلام معايا بينيم
مين سمعك حاسس ان بقالي كتير منمتش
يتهافت عليا نص بنات البلد؟؟تفتكري؟؟طب يلا ايدي علي كتفك بقي
نورتيني ياجوجو بعد غياب طويل اعتقد انك كنتي في الاقصر واسوان حمد الله ع السلامة ياستي

Meekness !!! said...
This comment has been removed by the author.
Meekness !!! said...

قوة الراجل اللي انا شايفها تنبع من مدي اتساع افقه...الراجل من وجهة نظري هو اللي يبقي الكون كله متعتق في دماغه وبيطلع منه حتة حتة في كلامه...



جملتين عجبوني !!!
و ليكن انا اول و ربما ثاني الناس بعد جوجو فيما ذكر عن المعجبين





معاك في كل نقطه اتكلمت فيها،،،

حلو قوي كمان انك تتلكم بصوت عالي
كان ممكن الكلام و التساؤلات دي كلها تكون بينك و بين نفسك على الكرسي اللي في اخر الصالون في وقت لا يتعدى الثواني ..



بس من الاخر انت في زن و وش في دماغك

:)

زيزي

maha said...

سلام عليك يااحمد
الف سلامة عليك من الارق ..اللي واخد عقلك يا سيدي:)
..
نتكلم جد بقي
للاسف واقعنا الحالي بيحصل فيه خطة كبيرة جدا و نجحت بجميع المقاييس الا و هي "ازاي كل شباب الشباب العربي تتسفه عقولهم و ميعرفوش يفكروا ..ازاي كل حاجة حواليهم من تكنولوجيا و عليم تصيبهم بالملل و التفاهة و السطحية .."
و للاسف الهدف المطلوب وجوده هو الواقع اللي احنا عايشينه دلوقتي ..بنفكر غلط و نستخدم كل شئ حوالينا في اتفه و ابسط الامور في حين ان ممكن لو استخدمناها بطريق عاقلة اكتر ممكن نكون رقم واحد في الكون كله ..ده غير ان كل حد مهم "مهم و قوي "يهمه جدا اننا نكون ضعفاءو جهلا و متخلفين علميا .."
دي كارثة عصرنا يا احمد للاسف ..
....
ينرفز و يضايق فعلا ان حد يحسسك اد ايه انت غلبان في تفكير و "يا حرام ..ليه بتعمل في نفسك و تقرا الكلام العجيب ده ..يمكن يكون كسل من الاخرين انهم يدخلوا عالم جديد يفهم و لو جزء من الحياه حواليهم او يوسع مجال تفكيرهم ..لان ساعات بيكون فيه ناس تخاف من كل جديد
..................

موضوع انك بعيد عن ربنا فعل عندك حق انك تضايق و انا كمان زعلانه منك و من نفسي لاني كمان مقصرة مع ربنا ..بس ان شاءالله بما انك حاسس بتقصيرك مع ربنا يبقي اكيد ان شاءالله راح ترجع له بقوة ..يا رب يهديك و يرضي عنك يا رب يا احمد
..................
احمد متفضلش تفكر علي اللي فات عشان متضايقش و تتعب .فكر ايه اللي ممكن تعمله دلوقتي و يفيدك ...ايه الشغل و العلم و قبلهم العباده اللي تخليك تحس انك بتتقدم ؟؟؟
انت بس اللي تعرف ..لو لاقيت اول خطوة متفكرش في اي حاجة غير انك تكملها و متخليش اكتر من اختيار او فرصها تشوش علي تفكيرك ..ركز في حاجة محددة عشان تقدر تنجح فيها و تديها حقها من الشغل و العلم
...
"ايون انت عبقري :) و مجنون و اعقل العاقلين كمان :)
....

.................
"اعترف اني ببقي بيني وبين نفسي مجنون مش ناقصه غير الكسرولة"
ههههههههههه
كل مصر عارفة انك مجنون يا احمد ..مش محتاج كسرولة
...............
مسرف ...
ممكن في الفلوس ممكن في العصبية ..احيانا ..في الصمت ؟في الكلام ؟في المشاعر ؟؟؟؟
..
ساعات فيه حاجت متتحملش الاسراف فيها و ساعات لازم يكون الاسراف موجود
الاسراف في مشاعر جميلة دليل عليها و المحاوله للتقليل منها او معالجة اسرافه ممكن يألم اللي حواليك ..اسراف في الصمت احيانا يكون الصمت مطلوب و احيانا بيقتل يا احمد
اسراف في الكلام ؟؟؟
هو انت بتتكلم اصلا ؟؟
:)
.....
احمد ..حب نفسك زي ما انت و تقبل شخصيتك كده ..ممكن لو غيرت نفسك متعرفكش..انت كده ..
احمد =جنون عقل و خيال و رعب و اغاني قديمة و تفكير متطور دايما و كراهية للرتابة و الملل و حب المغامرة و الحياه و النجاح

انت كده حتي لو لاقيت جواك متناقضات حبها ..لانها بتشكلك ..
بتكون "احمد عيسي"
..............

ردك علي عرق الرجولة لما تطلب اوي مع واحد خطيبته تعبانة و بتكلمة رائع ...
لو هو فكر من الاول هيلاقي ان اول واحد لجأتله عشان تشكي له هو هو ..و المفروض انه يهديها الاول و يطمن عليهاو اي شئ بعد كده يكون ..و بعدين ليه منفكرش بالعكس ..لو هو متنرفز و كلمها و زعق فيها ..هي هتفكر في ايه ؟علي حسب ما هو عودها ..لو اتعودوا من الاول انهم يستحملوا بعض ..هتقدر انها تهدية علي طول ..لكن لو زي ما هو عمل معاها و زعقلها ممكن يكون رد الفعل منها غضب ينرفزه هو زياده :)
______________

احمد..شغل البنت مش لازم يكون مبرر عدم شغلها ه اللي انت قلته لكن ..ممكن يكون البنت اصلا كمان رافضه فكرة الشغل ..
يمكن فيه ناس تقدر توفق بين البيت و الشغل و ناس لا .
فكر فيها
..تحب تلاقي واحده مش عارفة تهتم ببيتها و تستولي فكرة نجاحها و شغلها علي حساب البيت ولا واحده ناسية كل شئ الا بيتها و اولادها ..؟؟؟
معادله صعبه ان تقدر واحده توفق بين الاتنين ..لكن محتاج تفاهم بين الطرفين عشان يقدرا يقدروا مشاغل بعض
...............
بتنرفزني جدا اعلانات الشغل لما يقولوا "يشترط 5 سنين خبره "
طب واحد لسه متخرج هيجيبهم منين ؟
و بعدين ناس مش لاقيه كيانها لازم تهرب ..عارف يا احمد شكل الناس اللي بتهاجر بيوجع القلب اوي ..لكن لما تفكر فيها تاني بعيد عن احساسك باللم تلاقي ان لازم ..ملهاش حل تاني و إلا مفيش حياه هيعيشوها ..مفيش بكرة لو مش ليهم يبقي مفيش بكرة لاهاليهم ...
...
انا شفت الفيلم ..جميل جدا و حسسني ان ابسط شئ و حركة و كلمة ممكن تعملها ..ممكن تغير مستقبلك للنقيض ..يكن عشان كده الواحد حذر شويتين ؟؟:)
...........
ايه ده احمد احمد ..انت نمت قبل ما تخلص اخر كلمة في لبوست ...:) تصبح علي خير يا اعقل مجنون
______________
هام جدااااااااااااااااااا

احمد انا حاولت اضحك معاك في الرد بتاعي لكن اوعي تفكر انه تسفيه لكلامك بالعكس ..كتير اوي بحس باغلب الكلام اللي انت حاسه من عدم راحة في الواقع اللي انا عايشاه ..لكن لاني واثقه ان ان شاء الله فيه احسن راح يكون ..ان شاءالله خير :)
اطمن ..ان شاء الله خير
ربنا ينولك كل اللي في بالك يا رب يا احمد
ربنا يوفقك و يهديك يرضي عنك يا رب
سلام
مها

Ana keda said...

السلام عليكم

زيك يا احمد يا عيسى

كل ده جواك عارف الحالة دى لما بتيجى كده بتخلص حجات كتير مع انى عاجبنى اللخبطة الى جواك دى اوى اوى
لانها بتدل عارف كلنا كده فى حالات بتيجى بتبقى فى حالة عد اتزان للامور الى حواليك واكتر حاجة بقى يا سلام سلم

لما تكون عارف الحجات دى وبتسعبط بقى ومش عاوز تبين حاجة

وانا جدع وايه
وبليل بس تشتغل كل حاجة فى دماغك ما علينا

اول حاجة حلوة موت النقطة بتاعة الراجل دى انا مش هقولك اكتر من اى علاقة اساسها احترام واحترام قبل حب
قدرت تحترمها
يبقى هتعرف ازاى تحتويها
زعقت مزعقتش بقى مش دى القضية هتبقى عارفاها خلاص ومش ممكن من زعيقة بقى هتتنطلها وتقولها انا وانا

بتحبها هتعرف ازاى تبقى معاها تسعدها
تعمل الى عاوزه

موضوع الشغل:
موضوع معيارى بيختلف من شخص بشخص ومن احتياج كل فرد وتفكيره بجد فى ناس مينفعش تشتغل تحب تقعد بقى مش معنى كده هتتفرج على فتافيت
وفى ناس تافهة يا سيدى ما تصدق

القضية برضه هتختلف كل واحد وتصوره فى الحياة دى عن الى نفسه يرتبط بيها او يتعامل معاها

وده بناء على الشخص والطيور تقع على اشكالها يا عم احمد

ربك يسهل

روق انت وربنا موجود

YHYيــوســف الـمصـرى said...

السلام عليكم ورحمة الله وبركاته
...........................
عيسى مش هقلك وحشنى اوى يا واد علشان انا مقصر فى حقك وانت كمان مقصر فى حقى ... عايز ارغى معاك كتير يا زميل

الفضفضة بتريح كتير اوى اوى مع ان البوست مقلش كتير من الى جوا عيسى

فاكر يا واد الرغى الى رغناه واحنا عندكم فى بور سعيد ! ؟

سعتها قلت الواد ده دماغه عالية وجواه كتير...

بص مش عارف اقولك ايه عن البوست غير انك عيسى ولازم تفضل عيسى سواء حلقت ظلبطة ولا لاء:)

لازم اتكلم معاك كتير شكل في نيو جديد عندك :)

وحشنى يا ابو عيسى يا جامد ووحشانى دماغك المتكلفة

تحياتى

mano said...

كلامك رغم انه فضفضه ورغم انه بيحكى على اللى جواك بدون رتوش بس جميل فعلا انت شخصيه مميزه اول مره ازور مدونتك وقصصك ككاتب رائعه