وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ

Friday, October 19, 2007

تاج.اه والله تاج

تاج لذيذ جدا جالي من غالية صاحبة مدونة بكرة اكيد احلي..وزيزي صاحبة مدونة البئر والظمأ...وانا بقالي كتير مجاليش تاج..والفقي لما يسعد بقي يجيله نفس التاج مرتين..صحيح التاج ده اتاخر في نزوله كتير..بس لظروف انقطاع النت عندي وسوء الحالة المزاجية فترة أجلت نزوله

بس الاول انا عايز اقول كلمتين كدة

توضيح بالنسبة لبوست الحياة دون شبكة امان..مع احترامي لكل التعليقات اللي جت واللي اتفق معظمها في ان ربنا هو شبكة الامان اللي الواحد بيرتكن ليها بس ده مكنش قصدي من البوست
ببساطة انا كان قصدي..انت بتقعد تفكر..تحط كذا احتمال..علي اساس لو احتمال منهم فشل يبقي عندك بديل..ممكن ده يخليك تحس بامان ويديك ده نوع من الاستهتار لوجود البديل..تخيل بقي لو مفيش بديل؟؟؟
حتتمسك قوي بالاختيار اللي في ايدك..تمام؟

بس ده كان قصدي

والحق يقال يعني انا كتبت البوست ده في ظروف معينة كنت مذبذب وبفكر في موضوع البدائل ده

بس مع تغير الظروف دي انا بحمد ربنا ان في شبكة امان بدل الواحد ميقع علي جدور رقبته


الحاجة التانية انا بقالي فترة مش برد علي الردود وده للاسباب اللي ذكرتها قبل كدة..مزاجي مش حلو وبفكر علي طول..والنت كان مفصول فترة...يمكن مش مبرر بس محبش ردود من نوع شكرا ع المرور
في حاجة كمان..بتغاظ قوي قوي من الردود اللي ملهاش علاقة بموضوع البوست..زي العدد الجديد من مجلة كذا او تعالي شرفني وزور مدونتي المتواضعة وكدة... مش عارف انا لوحدي ولا باقي المدونين معايا في الموضوع ده..انا مش بعارض الموضوع ده بس علي العموم في شات بوكس ..ارمي السلام..خد فنجان قهوة ..نسكافيه..حاجة ساقعة...وقول اللي يعجبك ..ولا ايه؟؟
اخر حاجة بقي قبل ممشي...دوت سبوت متوقفة لمدة لا يعلمها الا الله..نظرا لظروف النت الوحشة عند مها المشاكسة اللي بتخطف الميكروفونات مش عارفين نعد اي حاجة جديدة برغم الافكار الكتير اللي في الدرافت اه والله..بس اعداد البرنامج نفسه بياخد مجهود خصوصا ان نص الحلقة بنخطف من بعض الميكروفون..لحد ربنا يسهل ميدخل عندها النت تاني ونشتري عدة جديدة ميكروفونات وخلافه حتلاقو بلالين ومارشات عسكرية وانوار وحنعمل افتتاح تاني لدوت سبوت ان شاء الله
يلا مش حطول عليكو...سلام بقي ونتقابل البوست اللي جاي

اه صحيح نسيت التاج

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟
عصر جمال عبد الناصر
مش حنقول بقي عبد الناصر كان صح ولا غلط..كان ديكتاتور...كان شايف اخطاء أعضاء قيادة الثورة ومكنش بيحاسبهم عشان اصحابه..مفيش حد ينكر ان ايام عبد الناصر كان الشعب المصري كله بيحلم نفس الحلم وعايش نفس الطموح ورا زعيم واحد قدر بكاريزما قوية جدا انه يبقي محط انظار العالم

اول اولويه فى حياتك عيلتك ولا شغلك ولا اصحابك؟
بنفس الترتيب كدة
عيلتي
ثم شغلي
ثم اصحابي

ايه اكتر حاجه بتحبها فى رمضان؟
الهدوء
رمضان دونا عن شهور السنة كلها بيبقي فيه جو هدوء وصفاء نفسي غريب
حتي النهار في عز الزحمة بحس ان في هدوء
صوت محمد رفعت في الراديو قبل الفطار
صلاة المغرب الجماعة اللي بابا بيبقي مصر نصليها سوا كلنا قبل الفطار جماعة
اصوات الجوامع ساعة التراويح
عصير قمر الدين
السحور
والصلاة وقراءة القران والقيام

اوصف ليا اجمل فطار ممكن تفطره
مفكرتش حقيقة في الموضوع ده قبل كدة لاني مجربتش رمضان بره البيت اصلا
بس افتكر اننا مرة انا واصحابي فطرنا عند واحد صاحبنا وكان فطار جوه جميل قوي خصوصا اننا كنا لسة في اول سنة لينا في الكلية وكنا بنتعرف علي بعض

اول مرة فعلا الاحظ ان اللي كانوا في الفطار ده هم اصحابي اللي لحد دلوقتي مسبناش بعض

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟

العدالة مش سهلة ولو انا حاكم علي مجموعة من الافراد حيختلف منظور العدل نفسه
لو مجموعة افراد اعرفهم حيبقي الموضوع صعب لان ممكن تفرق قوي العلاقات الشخصية في الحكم
لكن بالنسبة لي انا اعرف اذاي وامتي اكون حيادي جدا والحيادية اهم صفات العدل
جايز لو معرفهمش حيبقي تحقيق العدل اسهل كتير
واللي حعمله عشان اعرف اني عادل حعمل استفتاء واضربه واخلي نسبته 99% لان اكيد حيبقي في معارضة
لكن كفاية قوي اني احس بصدق ابتسامة المجموعة اللي انا بحكمها لما تشوفني وتسلم عليا عشان اعرف اني عادل
لان الابتسامة دي بالذات صعب قوي تتزيف


اللى بيبوظ الحكام .. نفسهم؟ ولا الشعب؟ ولا الحاشيه المقربه؟

اللي بيبوظ اي حاكم بعده عن رعيته
وده اللي بيسمح لأي حاشية مقربه انها توصله تقارير مزيفة عن اوضاع مش موجودة
والشعب كمان ممكن يبقي سبب في بوظان الحكام لما يتساهل في معرفة حقوقه وحدوده وتطبيق قانون بلده بصورة صحيحة
علي رأي المثل يا فرعون ايه فرعنك قال ملقتش حد يلمني

مين أكتر اعلامي مصري بتحترمه؟

حمدي قنديل..مني الشاذلي

قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟
لا .. ما قريتوش..ايه علاقته بالموضوع؟؟

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
معرفش ابقي حاجة تانية غير اني ابقي مهندس ودي حقيقة وعن تجربة
بس ميمنعش اني ادخل مجال التدريس..انا شايف ان فيا ملكة توصيل المعلومة ..يستحسن مدرس رياضة..فيزياء
ايه تانى بلد تتمنى تعيش فيها بعد مصر؟
إيطاليا.. أسبانيا .. او اليونان

اوصف ليا ترتيبات اجمل فرح ممكن تحضره؟؟
ممكن يكون فرح منظم جدا ومفيهوش غلطة بس ميعجبنيش
ترتيبات اجمل فرح ممكن احضره ممكن يبقي بسيط جدا او معقد جدا انا بطبيعتي متطرف جدا ومعنديش وسطية
لكن اهم حاجة ان اجمل فرح ممكن احضره الفرح اللي حبقي سعيد فيه من قلبي

بتراعي كلام الناس والقيل والقال؟ لو اه او لو لا قول لى ليه؟
سؤال صعب
بس لا مش براعي كلام الناس والقيل والقال
مهما عملت صعب جدا انك ترضي كل الناس ولا حتي نسبة كبيرة منهم
قريت مقولة - اعتقد انها لتشرشل - اننا نخسر ثلاثة ارباع انفسنا لنكون مايريده الاخرين
وبصراحة كفاية اللي خسرته قبل كدة ..من الاخر معتش عندي حاجة اخسرها
يعني مادام مش بغلط في حد ولا بتعدي حدود ولا عادات المجتمع اللي انا فيه يبقي مفيش بني ادم ممكن يقول عليا حاجة غلط الا اذا كان هو عايز يغلط اصلا
وده انا مش حسعي اني ارضيه او اني اعرف رايه فيا اصلا


صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والاحصنه هتكون سعيد؟
سعيد؟؟؟؟؟؟؟؟؟؟؟
من غير موبايل ولا كمبيوتر؟؟
معتقدش لاني معرفش اركب حصان ومش حبقي سعيد لما اعدي جنب حد راكب حصان يعفر الدنيا

السعاده هى؟

المعني الوحيد اللي صعب جدا توصفه او تسمكه
لكن سهل قوي انك تحسه

عندك أمل ؟؟ أسبابك ؟
اكيد عندي امل
والاسباب اني لو مفيش عندي امل مش حعرف اعيش ولا اخطط لمستقبلي

لما تحب تهرب من كل شئ بتروح فين؟

انا متعودتش اني اهرب

بس في حالات الغضب والنرفزة الشديدة بيبقي ليا تكنيك عشان ابعد لحد مبقي هادي

لاني في عصبيتي لا بشوف ولا بسمع وممكن اعمل مصيبة..بجد مش تهريج

وانا متنرفز
بجري ع الكمبيوتر احط السماعات الهيدفون في وداني
اشغل اغنية مايكل جاكسون
Bad
وبعدين اغنية
Beat it
واقعد افكر بقي في اللي مضايقني وغالبا بوصل لحل

لما ببقي مخنوق قوي بتوضا واصلي ركعتين

لما ببقي متنرفز قوي بلعب
Medal of Honor
لأنها فعلا بتمتص كل الطاقة اللي جوة الواحد سواء ايجابية او سلبية


امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟

ياااااااااااااااااااااااااه
انا قلت الكلمة دي كتير قوي الفترة اللي فاتت
لما معتز صاحبي جاب يوسف
في حفلة خطوبة اختي الصغيرة
لما ابن خالتي الصغير دخل الكلية
بس المشكلة اني مش حصدق اني كبرت ويوم محموت وعندي 70 سنة وحواليا احفادي برضه مش حصدق اني كبرت!!!

لما بتعمل عمل خيرى بيكون ايه هو دافعك الاول؟
اي خير بيتعمل بيبقي لوجه الله

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
الحمد لله مش بشرب سجاير
واشمعني ست يعني؟؟انا في العام بشمئز جدا من اي بني ادم بيشرب سجاير

بتعرف ايدك اليمين من الشمال ازاي؟
ايدي الشمال لابس فيها الساعة
ايدي اليمين بمسك بيها الماوس


ايه اكتر اله موسيقيه بتحبها
الجيتار الاسباني زي موسيقي ارميك
والناي الشرقي جدا والقانون والعود

فى رأيك ليه الذوق والنخوه اتعدموا؟
هم اتعدمو؟؟؟
يعني كل اللي عايشين دلوقتي معندهمش لا ذوق ولا نخوة...؟؟؟
مش نحسس ع الكلام ولا ايه؟؟
هم متعدموش والدليل علي كدة شوف اي ست عجوزة بتعدي الشارع ولا راجل وقع من طوله تعبان وشوف كام واحد حيساعده
شوف لو واحد عربيته اتعطلت في الشارع كام واحد حيزق معاه
بس يمكن عشان احنا مش بنعرف نبص علي نص الكباية المليان وبنحب نقول علي نفسنا اننا وحشين شايفين انهم اتعدمو


ايه الحاجه اللى لو حصلتلك تبقى سعيد قوى؟؟؟
أحس اني فعال جدا في مكاني وان صعب قوي حد يستغني عني..دي حاجة بتخليني سعيد قوي

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
اجنس عربيات


البحر و لا النيل؟؟؟
البحر...بدون تعليق
انا لسة متعرفتش علي النيل!!

مركب و لا طياره؟؟
حقيقة انا لا جربت ده ولا ده بس الشئ لزوم الشئ
يعني لو رحلة عايزة انجاز يبقي طيارة
لو استجمام يبقي
بس الاغلب طيارة لاني بتخنق بسرعة

مجنون و لا عاقل؟؟
اعقل المجانين
او يمكن اجن العاقلين
بس عاجبني قوي التناقض ده لان محدش حيقدر يقول انه فاهمني
لاني مش فاهمني انا شخصيا

تقرأ كتاب و لا تتفرج عليه فيلم؟
انا اساسا غاوي قرايه جدا
يعني بحس اني بتفاعل مع الكتاب اكتر
غير ان الفيلم بيقولب دماغك وخيالك في صورة معينة
كتير كتب قريتها وشوفتها سينما وتليفزيون وحسيت انها كانت احسن كتير لما قريتها
زي الحفار مثلا والكافير
وكتييييييييير جدا

تحب بقي تمرر التاج ده لمين؟؟

نياهاهاهاهاهاهاهاهاهاهاهاها

مستني السؤال ده من بدري

اكيد اكيد مها غربة وطن زميلة الكفاح

اكيد اكيد علي الالفي تفاصيل..رخامة يعني عشان انا عارف انه مش بيحب التاجات

الناس دي بقي اول مرة ابعاتلها تاج يارب متكسفنيش

عقد فل

One True thing

ميزو..بيجاسوس المصري

مزمز شجرة بداخلي

بيرو..احلي حب

رضوة..ساعة الغروب...نياهاهاها شرير انا ها؟؟

ايه..الوان ايويه

جوسي

بحاول اكون

حكايه..محمد العدوي

حقل التيوليب الاحمر

يوسف المصري...الساعة 6

Me Myself&the world

عيون السهر

حدوتة

دكتور روفي...انين الناي

عيون ضيقة

Noony's Stuff

Nado

ونتقابل التاج اللي جاي..انا مسبش حقي ولازم لازم ادبس زيزي وغالية في تاج







21 comments:

Meekness !!! said...

سلام الله عليك
بحجز مكان لغايه اما اقرا و اكتب تعليق

ياااه اخيرا جاوبت

سلام مؤقت

Meekness !!! said...

ممممممممممم
ازيك بقى يا رب تكون كويس
و مزاجك رايق الوقت



دوت سبوت
؟؟؟؟؟؟؟
يااااااه انت شايف انك هتتكلف ميكات بس
يابني انتو عايزين تعملو اعلانات من اول و جديد عشان خلاص المحطه فقدت المصداقيه
قلتو هتعملوا هتعملو و ما عملتوش حاجه
يالله بالتوفيق مستنينكو عموما ب نوع خناقات جديد







ايه ده؟
ياه اخير لقيت حد اتفق معايا
اصل كتير قالي اني ندله لاني بفضل الشغل الاول بعدين الاصحاب
بس ما زلت مصرة برضه



يا فرعون ايه فرعنك قال ملقتش حد يلمني




الجمله دي ضحكتني قوي
ههههههههههه



مدرس رياضة..فيزياء

ياه يا احمد انت مش لقيت غير دول
بكرهم رغم اني درستهم



عموما تعالى عندنا و جرب النيل
حلو و هادي قوي


يالله با باشا بالتوفيق
اجاباتك كانت حلوه
و خليكط مصحصح علطوول



مممممممممممم هتدبسني ؟؟
طيب انا موافقه


عموما انا سبقتك و دبست سهر و نوني و هما الحمد لله بعد ضغوط و محاولات جبارة معاهم جاوبو



باي بقى لتاج تاني
.
زيــزي

نفسنا said...

نفسنا مجلة بتعبر عننا

بندقه said...

ازيك يا احمد
شكرا على التاج
وان شاء الله اجاوبه قريب جدا وماكسفكش

حلو اوى البانر بتاعك ده
عملته ازاى يا عفريت
:)

تمر حنة said...

ياه
التاج دة منتشر بسرعة البرق
لكن اجابات جميلة
تحياتى
تمر حنة

maha said...

سلام عليك يا احمد
عارف اجمل حاجة في موضوع التاج انه بيبين الشخصية فعلا اللي بتقرا له
غير ان البوست ممكن يحكي عن صاحبة انما التاج بيكون طريقة مباشرة اكتر للتعرف علي الانسان اللي بيجاوب
....

عجبني اوي مشهد انك و بابا و البيت كله بيصلي المغرب قبل الفطار ..ربنا يجمعكوا دايما في الخير :)
________
نظرتك للعدل او مفهوم انك تكون حاكم حلوة و الاجمل منها الابتسامة و ان من الصعب تزيفهها ..بس انت مش معايا ان ممكن النسان يتحول في اللحظة دي عن المبادئ بتاعته و المعايير تختلف لما حد يمسك زمام السلطة ؟؟هي بتختلف علي حسب قوة المبدأ جواك
...
هتشتغل مدرس ؟؟؟؟

مش عارفة ليه حاسة ان معندكش صبر
للموضوع ده ..تفتكر ؟؟؟
:)
_____
يااه عايز تعيش في اسبانيا او ايطاليا ...
مممم
:)
..اه انا عارفة حبك للجيتار :)
انت عندك جيتار يا احمد ؟؟

...
هو الاحسن فعلا اننا نراعي القيل و القال و لا لا ؟؟؟؟
سؤال جامد بصراحة ..
.....
احساسك انك كبرت بيختلف من انسان للتاني ..و انا شفت ده عندك من بوست انا كتبته و انت علقت فيه ..يمكن كان عكس اجابتك هنا ..بس في الحالتين مش بالسن بيكون الكبر يا احمد
صح؟؟
......
واضح انك مش صبور يا احمد ..انت مش بتروح البحر عندكوا و تصتاد و لا ايه ؟
___________
اظن انك لما تشوف فيلم و تقرا القصة مختلفة انك تقرا الاول القصة و تشوف بعدها الفيلم ..انهي يعجبك اكتر ؟؟؟
..............
علي فكرة اثبتت النتائج العلمية ان محدش فاهم نفسه ..بس اغلب الوقت فيه قلة بتكون فاهمة الانسان ...

تاج مقبول يا سيدي و ان شاء الله قريب اعمله
سلام
:)
مها

ba7re said...

عجبتى ردودك
و مهما كبرت فى عمر
انت من الشخصيات اللى هتفضل بقلب طفل شفاف جميل و عسول
ابيه بحرى :)

علي الالفي said...

كان نفسي جدا ارد على تاجك
لكنه فعلا عمل لى نوع من الاكتئاب"تقولش باتلكك"لانى السنة دى ما جاش رمضان و لا شوفته
و ده عامل لى حالة قهر رهيبة
نتقابل في تاج تانى خيرها في غيرها

مُزمُز said...

شكرا لأنك افتكرتني في التاج ده يا فندم

مش هاطنش إنشاء الله

ده أول تاج يجيلي بعد رجوعي للتدوين

شكرا جدا كمان مرة

Hadota .. حدوتة said...

ميرسى جدا على تمرير التاج
وكل تاج وانت طيب وتعيش وتتاج

جارى اعداد التاج ان شاء الله
:)

coca said...

اجاباتك لذيذه اوي
خصوصا
ميديل اوف اونر
حلو اوي

david santos said...

North-American terrorism killed yesterday more 19 innocent Iraqis. 8 children, 7 women and 4 men. They all were at its house to be dedormir. North-American terrorism continues to kill out of the innocent ones. The honest world and exempted EC what will finish with North-American terrorism. David Santos

أحمد سلامــه said...

كووول ده كلام في التاج
انا نفسي اعمل حملة ضد التاجات المرعبة دي
كل سنة وانت طيب اولا
وسوري متاخر جدا في الزيارة
عجباني اجابة اعقل المجانين والجيتار الاسباني دول
يعني فيهم مني كتير
تاج دمو خفيف بس طويييييييل

إنـســـانـة said...

ياسلام يعنى لما تتنرفز تجرى ع الكمبيوتر وتشغل عم مايكل ؟؟؟..طب افرض بقا اتنرفزت فى مكان مافيهوش كمبيوتر ولامايكل حتعمل ايه؟

حتقولهم هاتولى كمبيوتاااااااااااار
ههههههههههه

يلا كل تاج وانت بخير

:)

bastokka طهقانة said...

كل تاج و انت طيب

princess dodo said...

ده إيه الاحتفالية الجامدة دى
أولا كاتب اللينك بتاع مدونتى
ومشاهد تتكرر
ومررت لى التاج

ده كتير عليا والله
ربنا يخليك ليا
مااتحرمش


إجاباتك جميلة أووووى على التاج


تقبّل مرورى

وتحيـــاتى

dr.Roufy said...

بجد استمتعت بقراية اجاباتك على التاج..الجامد دا

ومرة تانية اشكرك على الثقة يا بشمهندس

تحياتي

أحمد عيسي said...

السلام عليكم ورحمة الله وبركاته
زيزي:ممم حجزتي مكان اول تعليق..محسساني اني في فرن عيش..ممكن مها تيجي دلوقتي وتقولك هاتيلي 5 معاكي عشان الطابور زحمة!!
عامة ياستي متشكرين ع التاج
نياهاهاهاها استني التاج بتاعي بقي

نفسنا:ياااااااااااراجل؟؟

بندقه:اما نشوف حتجاوبي اذاي ع التاج بقي
البانر جاي مع التمبلات والله
بس سيبك انا برضه عفريت
نورتيني يا بندقه

تمر حتة:شكلك انتي اللي موزعة التاج ده
بس فعلا تاج حلو

أحمد عيسي said...

مها:يااااااااااااه
يااااااااااااه
اذيك يامهاهو عشان مفيش دوت سبوت خلاص متجيش
شوفتي بقي الناس كلت وشنا علي دوت سبوت ..ال زيزي بتقول اننا فقدنا المصداقية
ماااااشي يا زيزي حنشوف
اكتر حاجة فعلا بتأثر فيا الضحية اللي بتبقي جلاد..فعلا بتبقي حاجة قاسية قوي وعندك حق دي بتبقي حسب قوة المبادئ اللي جوه الواحد
علي فكرة انا مض صبور خالص معنديش صنارة عشان اصطاد بيها ومعنديش كمان جيتار
مستني اجابة التاج وردك انتي اللي جميل يامها

ابيه جوده:انا من الناس اللي..الله يخليك ياسيدي
ربنا يستر بس ومكبرش ابقي حماده عزو !!

علي الالفي:مانا عارف انك بتتلكك ومش عايز ترد ع التاج
بس جايز الغلط مني انا اللي مراعيتش انك كنت في رمضان بره البيت لاول مرة تقريبا في حياتك
متزعلش بقي مني انا بس كنت قاصدها هزار مش اكتر
بس معايا التاج اللي جاي بقي

أحمد عيسي said...

مزمز:ياباشا هو انا نسيتك قبل كدة في تاج..ده انت من الزباين الدائمين ياعم
بس انت مردتش علي ولا واحد قبل كدة
بس بمناسبة عودتك المبجلة للتدوين حتجاوب علي ده
نورتني

حدوتة:وانتي بالصحة والسلامة بس يكون تاج خفيف خفيف بلاش التاجات التقيلة دي
وانا مستني اجابتك ع التاج بقي

كوكا:انا وميدال اوف اونور..بوست موجود في الدرافت بقاله ييجي شهرين..ومش عارف انزله..
شكرا علي المرور الكريم يا كوكا

دافيد سانتوس:طب وانا حعمل ايه؟؟

احمد سلامة:ياباشا ده انا اللي مقصر قوي
هو التاج كمدة جاي قطعية واحدة طب اعمل فيه ايه؟؟
ليك عندي المرة اللي جايه تاج حلو بس متكسفنيش بقي

أحمد عيسي said...

انسانة:لو ملقتش كمبيوتر بيبقي يوم مش فايت علي اللي بتعصب عليه
عارفه ..عامل قالي مرة وانا سهران معاهم في الموقع بنحشــ...ايه احم..بنشتغل
قالي انت يا باشمهندس لما بتتعصب لا بتشوف ولا بتسمع
والكلمة دي سمعتها قبل كدة من امي
يعني بحاول اتقي شر نفسي وانا متنرفز
بس مش اكتر
نورتيني والله

طهقانة:وانتي بالصحة والسلامة

برنسس دودو:بصي يا ست الكل انا حقولك اللي الكل زهق منه اصلا من كتر مقلته
ناا صعب قوي حد يدهشني
وبوست مشاهد تتكرر ده بجد من الحاجات اللي اذهلتني مش دهشتني بس

سيبك انتي من الكلام ده كله انا عايزك تردي بقي ع التاج ده...علي الاقل عشان تبقي زبون وابعاتلك تاجات تانية..
نورتيني وبجد انتي مدونتك هايله وانا اللي كسبان لما اضيفها عندي

دكتور روفي:انا مكنتش اعرف انك جاوبتي التاج ده قبل كدة اعذريني بقي
وشكرا علي مرورك والحمد لله ان الاجابات عجبتك
انا قلت التاج طويل ومحدش حيكمله اصلا

وللجميع نورتوني بجد وشرفتوني
يلا سلام